سارسەنبى, 13 قاراشا 2019
كاسىپ-ءتۇبى ءناسىپ 3885 0 پىكىر 28 ناۋرىز, 2016 ساعات 13:58

سكانديناۆيا ەلدەرى مەن اقتوبە ءوڭىرى بيزنەس-ارىپتەسكە اينالدى

سكانديناۆيا ەلدەرى اقتوبە وڭىرىندە بيزنەس-جوبالاردى ىسكە اسىرۋعا قىزىعۋشىلىق تانىتىپ وتىر. قازاقستان بيدايدى ەكسپورتتاپ، ونىڭ ورنىنا تەڭىز ونىمدەرىن الاتىن بولادى.

اقتوبە وبلىستىق كاسىپكەرلەر پالاتاسىندا قازاقستانداعى سكانديناۆيا ەلدەرىنىڭ، اتاپ ايتقاندا، نورۆەگيا، شۆەتسيا جانە فينليانديا ەلشىلەرىمەن كەزدەسۋ ءوتىپ، وعان وسى وڭىردەگى ورتا جانە ءىرى بيزنەستىڭ 20-عا جۋىق وكىلى قاتىستى.

وڭىرلىك پالاتا باسشىسى نۇرلىبەك مۇقانوۆ ءوڭىر ەكونوميكاسىنىڭ تاريحىمەن، ونىڭ قازىرگى حال-احۋالىمەن تانىستىرىپ، وبلىستاعى ينۆەستيتسيالار تارتۋعا بولاتىن سالالاردى جايىندا مالىمەت بەردى. ول، سونداي-اق، ءوڭىر كاسىپكەرلەرى مەن شەتەلدىك بيزنەسمەندەردىڭ ءوزارا تاجىريبە الماسۋىنىڭ ماڭىزى زور ەكەندىگىن، ەكى تاراپ اراسىنداعى سەرىكتەستىكتىڭ بەرەرى مول بولاتىنىن اتاپ ايتتى.

قوناقتار 2015 جىلى قازاقستاندا ينۆەستيتسيالار تارتۋ تۋرالى زاڭعا ەنگەن وزگەرىستەرمەن تانىستى. زاڭناما بويىنشا جالپى سومانىڭ 30%-نا دەيىن سالىقتىق جەڭىلدىكتەر مەن سۋبسيديالاۋ قاراستىرىلعان.  وعان قوسا، ينۆەستيتسيا كولەمى 13 ميلليون اقش دوللارىنان اسقان جاعدايدا مەملەكەت بارلىق شىعىنداردى وتەپ بەرەتىن بولادى، ءارى ينۆەستورلارعا قاۋىپسىزدىك كەپىلدىگى بەرىلەدى.

اقتوبەدە ينۆەستورلارعا قىزمەت كورسەتۋ ورتالىعى بار. ونىڭ قىزمەتكەرلەرى كاسىپكەرلەرگە باسىنان اياعىنا دەيىن، ياعني جوبا تولىق ىسكە اسىپ، اياعىنان نىق تۇرىپ كەتكەنگە دەيىن كومەك كورسەتەدى. سونىمەن بىرگە، وڭىردە ينۆەستورلارعا قاجەتتى دامىعان ينفراقۇرىلىمى بار يندۋستريالدى ايماق اياسىندا بيزنەس-جوبالاردى ىسكە اسىرۋعا بولادى.

قازاقستانداعى نورۆەگيا ەلشىسى ولە يوزان بەرنوي ءوز ەلىنىڭ مۇناي-گاز جانە تاۋ-كەن قازۋ سالاسىنداعى ىنتىماقتاستىققا مۇددەلى ەكەندىگىن جەتكىزدى. بۇدان بولەك، نورۆەگيالىقتار ءبىزدىڭ ەلدەن بيداي ەكسپورتتاپ، ونىڭ ورنىنا تەڭىز ونىمدەرىن يمپورتتايدى.

ال شۆەتسيا ەلشىسى حريستيان كاميلل اقتوبە وبلىسىنىڭ الەۋەتى جونىندە اقپارات جيناۋ ىسكە اسىپ جاتقانىن ايتتى، بۇدان ارى ولار ءوز وتانداستارىنا اۋىل شارۋاشىلىعى مەن تاۋ-كەن قازۋ سالالارى جوبالارىنا ينۆەستيتسيا قۇيۋدى ۇسىنباق نيەتتە.

اقتوبە ءوڭىرىنىڭ اتالعان ەلدەرمەن تاۋار اينالىمى ازىرشە شامامەن 150 ميلليون اقش دوللارىنا تەڭ،  دەگەنمەن اقتوبە وبلىسىنىڭ ەكونوميكالىق الەۋەتى بۇدان زور. تاراپتاردىڭ ايتۋىنشا، ءوزارا ءتيىمدى ىنتىماقتاستىق ءۇشىن باستى ىرگەتاس قالانىپ ۇلگەردى.

الداعى ۋاقىتتا سكانديناۆيالىق بيزنەسمەندەر مۇناي-گاز جانە تاۋ-كەن قازۋ سالالارىنا، اۋىل شارۋاشىلىعىنا، بالىق ءوسىرۋ، حيميا وندىرىسىنە، قاتتى-تۇرمىستىق قالدىقتاردى وڭدەۋ سالالارىنا ينۆەستيتسيا سالۋعا كىرىسەتىندەرىن مالىمدەدى.  سكانديناۆتاردىڭ تاجىريبەسى مەن مۇمكىندىگى قازاقستاندىق الەۋەتپەن ۇيلەسسە، بۇدان ەكى جاقتىڭ دا ۇتارى مول بولماق.

Abai.kz

 

 

0 پىكىر