نارىق زاڭى قوعامنان باسەكەگە قابىلەتتى بولۋدى تالاپ ەتەدى جانە بۇل ونەركاسىپ ءورىسىنىڭ وركەندەۋىنە، كاسىپكەرلىكتى قولداۋعا بايلانىستى ەكەندىگى ءمالىم. قازىرگى كەزدە ەلىمىزدە كاسىپكەرلىكتى قولداۋعا بارىنشا كوڭىل ءبولىنىپ وتىر. سوعان سايكەس «كاسىبىم – ءناسىبىم» دەيتىن ازاماتتار قاتارى كوبەيىپ كەلەدى. ونىڭ ىشىندە قازاقتىڭ ۇلتتىق قولونەرىندە بۇرىننان بار ىسمەرلىك كاسىپتى تاڭداعاندار دا جەتەرلىك.   

 قولونەر سالاسىنىڭ شەبەرى، دارىندى سۋرەتشى، ۇزدىك كەسكىندەمەشى يرينا باكىروۆا – تىگىنشىلىكپەن اينالىسىپ جۇرگەن اتىراۋلىق كاسىپكەرلەردىڭ ءبىرى. ونىڭ ايتۋىنشا، بۇگىنگىنىڭ ادامىنا ءبىر كاسىپ ازدىق ەتەدى. ياعني، تۇراقتى جۇمىستان تۇسەتىن تابىسقا عانا سەنىپ وتىرا بەرۋگە بولمايدى.

- داعدارىس پەن دامۋدى قاتار كەشكەن قوعام تەك تازا ەڭبەك پەن ۇنەمشىلدىككە عانا يەك ارتۋى ءتيىس دەپ ويلايمىن. سوندىقتان، توقىما ونەركاسىبىنە ءوز ۇلەسىمدى قوسقىم كەلەدى. ىسمەرلىك ونەر  شىعارماشىلىق قابىلەت پەن اسقان توزىمدىلىكتى قاجەت ەتەدى. شۇكىر، قازىر توقىما جۇمىسىن جەڭىلدەتەتىن ءتۇرلى شەتەلدىك قۇرال-جابدىقتار جەتەرلىك. كادىمگى كىر جۋعىش ماشينا سەكىلدى بارلىق قىزمەتتى ءبىر ءوزى اتقاراتىن تىگىن قۇرىلعىلارى بار. توقىماشىعا تەك ماتانى نىعىزداپ، ينە مەن ءجىپتى دايىنداپ وتىرۋ عانا قالادى. كويلەكتىڭ ءبىر بولىگىن توقۋ ءۇشىن تىگىن ماشيناسىندا ءتىزىلىپ تۇرعان 400 ينەدەن قىرىق ينەنى مۇقيات ساناپ الۋ قاجەت. زاماناۋي تەحنيكادا قازىر اۆتوماتتى ەسەپتەگىشكە دەيىن ورناتىلعان. ول توقىما ءونىمىنىڭ ۇزىندىعى مەن ەنىن الدىن الا ولشەپ بەرەدى، - دەيدى يرينا.

جاڭادان كاسىپ اشقىسى كەلەتىندەر ءۇشىن جەڭىل ونەركاسىپ — تاپتىرمايتىن بيزنەس كوزى. بۇل — كوپ ۋاقىتىن توقىماشىلىق كاسىپكە ارناعان تاعى ءبىر تىگىنشى عاليا مۇقانوۆانىڭ پىكىرى. «ەلباسىنىڭ ءوزى كاسىپكەرلەر ەل ونەركاسىبىنە ءوز ۇلەسىن قوسۋ كەرەكتىگىن ايتتى ەمەس پە؟ بۇل ءۇشىن جەرگىلىكتى كاسىپكەرلەرگە كوپ بولىپ قولداۋ ءبىلدىرۋىمىز قاجەت. ءبىر ءسات شەتەلدىڭ ارزانقول الا-قۇلا كيىمىنە ۇمتىلا بەرمەي، ءوزىمىزدىڭ قازاقى ويۋمەن ورنەكتەلگەن كيىم-كەشەگىمىزدى كيسەك، نەسى جامان؟ كەرىسىنشە، ۇلتتىق كيىممەن بىرگە بويىمىزعا ۇلتتىق رۋحتى سىڭىرەمىز» دەيدى عاليا.

ەستەرىڭىزگە سالا كەتەيىك، بىلتىرعى ۇكىمەتتىڭ كەڭەيتىلگەن وتىرىسىندا پرەزيدەنت ن.نازارباەۆ وتاندىق وندىرۋشىلەردى قولداۋعا شاقىرعان بولاتىن. وسىدان كەيىن ەل بويىنشا «قازاقستاندا جاسالعان» جالپىۇلتتىق اكتسياسى باستالدى.  قازىرگى كۇنى بارلىق ساۋدا جەلىلەرىندە ساتىلاتىن قازاقستاندىق ونىمدەر كوزگە بىردەن تۇسەردەي كورسەتىپ قويىلعان. وتاندىق وندىرۋشىلەردىڭ تاۋارىن ساتىپ العىسى كەلەتىن ازاماتتارعا بۇل وتە قولايلى. بۇل قازاقستاندىق تاۋار وندىرۋشىلەردى قولداۋعا ءارى تۇرعىنداردى ەلىمىزدە شىعاتىن تاۋارلار جونىندە «بىزدەردە مىناداي بار، مىناداي بار» دەگەندەي حاباردار ەتۋگە باعىتتالعان. باستاماعا  قازىر مەملەكەتتىك ورگاندارمەن قاتار، ۇلتتىق كومپانيالار، قوعامدىق ۇيىمدار مەن جاستار قوزعالىستارى  كەلىپ قوسىلۋدا.

وبلىس ورتالىعىندا بۇرىنعى كەڭەس داۋىرىنەن بەرى قىزمەت ەتىپ كەلگەن تۇرمىس ءۇيى قازىر «ونەرپاز» جاۋاپكەرشىلىگى شەكتەۋلى سەرىكتەستىگى رەتىندە كوپشىلىككە جاقسى تانىس. ەلىمىز تاۋەلسىزدىگىن العان تۇستا بۇل مەكەمەنى اتىراۋلىق كاسىپكەر ءاليا بەكقوجيەۆا ءوز باسشىلىعىنا العان بولاتىن. مىنە، توقسانىنشى جىلدارداعى توقىراۋ تۇسىندا تاۋەكەلگە بەل بۋىپ، ءوز ءىسىن باستاپ كەتكەن وسىنداي كاسىپكەرلەر اتىراۋدا جەتەرلىك. بۇل جەردەن سوڭعى ۇلگىدەگى سىرت كيىمدەر، كۇزگى، قىسقى ماۋسىمعا ارنالعان تريكوتاجدىق ونىمدەر شىعادى. وسىنداعى تريكوتاج تسەحىنىڭ مەڭگەرۋشىسى قالىش قابدولليەۆا تەحنيكانىڭ سوڭعى ۇلگىلەرى سانالاتىن «SilverReed-SR 280»، «SilverReed-SK-840» توقىما قۇرىلعىلارىن ەركىن مەڭگەرگەن.

- كەيدە ءبىر ءجىپ ۇزىلسە، ءبۇتىن شارۋاعا كەدەرگىسىن تيگىزەدى. بۇل كاسىپتى ۇرشىقشا ءيىرىپ كەتۋ ءۇشىن قولدىڭ يكەمدىلىگى وتە قاجەت. بۇكىل جۇمىستى ستانوكقا ارتىپ قويۋعا بولمايدى. تەحنيكانىڭ اتى تەحنيكا، ول ادام قولىن الماستىرا المايدى. شاعىن كاسىبىن توقىماشىلىقتان تاپقان ادامنىڭ  كوزى دە قىراعى بولۋ كەرەك. قازىر اينالاڭىزعا كوز جۇگىرتسەڭىز، ادامداردىڭ بارىندە تۇراقتى جۇمىسىمەن قاتار شاعىن ءبىر كاسىبى بار ەكەنىن كورەسىز. دەمەك، بۇل –  ۋاقىت تالابى. كيىم-كەشەك بۇگىن-ەرتەڭ ساننەن شىعادى، توزادى، ال ونى تىگۋشى مامانداردىڭ ونەرى – ماڭگىلىك، - دەيدى ول.

ءيا، و زاماننان ناپاقاسىن ءتورت تۇلىك مالدان تابا بىلگەن قازاق ءۇشىن قولونەر جات ەمەس. سونىڭ ايعاعى رەتىندە، اتا ءداستۇردىڭ شىراعىن سوندىرمەي، كەلەشەككە جالعاپ وتىرعان ۇرپاق بار بۇگىندە. ەندەشە، ينە-جىپتەن يگىلىك يىرگەن شەبەرلەردى قولداۋعا قاشاندا دايىن بولايىق.  قازاقستاندىق تاۋاردى ساتىپ الۋ – ەل ەكونوميكاسىنا قوسقان ۇلەسىمىز.

Abai.kz