الماتى وبلىسىنىڭ تۇرعىندارى جىلدار بويى شەشىلمەي كەلە جاتقان ماسەلەسىن توتەسىنەن قويدى. ۇيلەرىنە بارار جول، جارىق پەن سۋدىڭ جوقتىعىنا اشىنعان ساياجايشىلار اۋداندىق اكىمدىك الدىنا شاتىر قۇرىپ وتىردى.

ويتپەسە، تالعار اۋدانىندا شارۋا شەشەتىن شەنەۋنىك تابىلاتىن ەمەس. ءىس ناسىرعا شابا باستاعانىن كورگەندە عانا قيمىلداعان جەرگىلىكتى بيلىك ەندى ۋادەنى ءۇيىپ-توگىپ جاتىر دەپ حابارلايدى كتك ارناسى.

اكىمدىك الدىنداعى بۇل شاتىرلار ادەتتەگىدەي مەيمانداردى كۇتۋ ءۇشىن ەمەس، نارازىلىق ءبىلدىرۋ ماقساتىندا قۇرىلعان. تالعار اۋدانىنا قاراستى «كوكدالا» ساياجايىنىڭ تۇرعىندارى جەر ساتىپ الاردا ۋادەنى ءۇيىپ-توككەن توراعاعا الداندىق دەپ وتىر. جارىق جۇرگىزۋ ءۇشىن اي سايىن جۇرتتان اقشا جينالىپ، ورنىنا قولحات بەرىلگەن.

جول، سۋى مەن جارىعى جوق 28 ءۇيدىڭ يەلەرى وكپەلەرىن اۋدان باسشىلىعىنا وسىلاي جەتكىزبەك بولدى. ولار عيمارات الدىنا شاتىر قۇرىپ، كورپە-جاستىق پەن ىشەر اسىن دا كوتەرە كەلىپتى. ويتپەسكە امالدارى جوق. ارىز ايتىپ، اكىمدىككە تالاي كەلگەنىمەن، ءۋاج تىڭدايتىن اتقامىنەر تابىلماعان.

"70 مىڭ تەڭگەدەن جيناپ بەردىك. باعانانى اكەلىپ ورناتقانىمەن، جارامايتىن ەسكى بولىپ شىقتى. اقىر اياعىندا جەپ-جەپ جوعالىپ كەتتى", - دەيدى ساياجاي تۇرعىنى ەرلان بايىسوۆ.

اقشا جەدى دەپ ايىپتالعان بىرلەستىك توراعاسى كەلمەگەنىمەن، يەكتەرىنىڭ استىنداعى ايقايدى ەستىپ، اكىمدىكتەگىلەر تەز جەتتى. جۇرتتى سابىرعا شىقارعان شەنەۋنىكتەر، كەزەكتى ۋادەلەرىن ءۇيىپ-توكتى.

"اكىمدىككە  جەكە باۋ-باقشا ۇجىمىنىڭ جۇمىسىنا ارالاسۋعا بولمايدى. بىراق قانشالىقتى توراعانىڭ اقشا  العانىن ناقتى تالقىلايمىز. ارينە، ءبىز وسى سۇراقتى شەشۋگە تىرىسامىز", - دەيدى تالعار اۋدانى اكىمىنىڭ ورىنباسارى دارمەنيار قىدىربەكۇلى.

دەسە دە بۇل تۇرعىندار جاقىن ارادا جارىقتى كەلمەيتىنى انىق. سەبەبى، ءبىرىنشى كەزەكتە بىرلەستىك توراعاسى جاۋاپقا تارتىلىپ، جينالعان قارجىنىڭ قايدا كەتكەنى انىقتالۋى كەرەك ەكەن. ال ۋادەگە تاعى سەنگەن جۇرت كەلەسى نارازىلىقتىڭ الدەقايدا اۋقىمدى بولاتىنىن ەسكەرتىپ تارقاستى.

اباي-اقپارات