ەشكىمنىڭ اۋزىنا قاقپاق بولا المايمىز. بىراق اركىم ءوز سوزىنە ءوزى جاۋاپ بەرەدى. الماتىدا بولعان قايعىلى وقيعالار كەزىندە كوبىمىز ابدىراپ، نە ىستەرىمىزدى بىلمەي جاتقان كەزدە كەيبىر ادامدار الەۋمەتتىك جەلىلەردە پوليتسياعا قارسى قارا وكپەسىن توگىپ جاتتى. ءبىر وتباسىلارى قايعى-قاسىرەتكە دۋشار بوپ جاتقاندا، ادامعا كوڭىل ايتۋ – مىندەت. تابالاۋ – كۇنا. ءتىپتى، پوليتسيا وبرازدىق ءسوز بولسا دا... ءوز باسىم پوليتسيا قىزمەتكەرلەرىن ەرەكشە سىيلايمىن. وسى جاسقا كەلگەنشە مەن كاسىبي بىلىكسىز پوليتسيا قىزمەتكەرلەرىنەن گورى دياگنوز قويا المايتىن، اقشانى كاسساعا ەمەس، تارتپاعا سالۋدى ءوتىنىپ، ىلعي تەك بەلگىلى ءبىر دارىلەردىڭ ءتىزىمىن جازاتىن دارىگەرلەرمەن، ءبىر انىقتاما ءۇشىن جۇگىرتىپ، قازاقشا سۇراعىڭا ورىسشا جاۋاپ بەرىپ، ءار سوزىڭە نەمقۇرايلى قاراپ، نە جەكىرىپ بەرەتىن، ماسەلەنى تەزىرەك شەشۋ ءۇشىن ءبىر-ەكى مىڭ تەڭگە دامەتەتىن تسون قىزمەتكەرلەرىمەن كوبىرەك كەزىكتىم. ال پوليتسيا قىزمەتكەرلەرى – ناعىز باتىرلار! مەن ءۇشىن!

كىشكەنتاي كەزىمدە ەكى پوليتسيا قىزمەتكەرى، ءبىرى – قازاق، ءبىرى – ورىس مەنى جوعالۋدان امان الىپ قالعان. شىنىن ايتسام، 15 جىل اتا-انام مەن اتا-اجەم اللادان تىلەپ العان پەرزەنتپىن. مارقۇم اتام 60-قا تاياعان شاعىندا تۇڭعىش نەمەرەسىن سۇيگەن سوڭ، بۇل وتباسى ءۇشىن قانشالىقتى قىمبات ادام بولعانىمدى باعامداي بەرىڭىزدەر. ول كەزدە ءبىز الماتىنىڭ الاتاۋ سوۆحوزىندا («قازاقفيلم» ىقشام اۋدانىنان جوعارى) تۇراتىنبىز. ۇيدە ەكى اجەم بار. قازاندا بيداي قۋىرىپ جاتقان. مەكتەپكە دە بارماعان شاعىم. ەسىمدى بىلەتىن كەز، ايتەۋىر. «ساعىز الۋىم كەرەك، مامانىڭ جۇمىسىنا كەتۋىم كەرەك» دەگەن وي كەلدى دە، ۇيدەن بىردەڭە ەتىپ شىعىپ كەتتىم. تومەن قاراي كەتىپ بارام، كەتىپ بارام... ءبىر كوشەمەن كەلە جاتقانداي ەدىم، ءبىر كەزدە ءبىر جولدىڭ ءوزى تورتكە ءبولىندى. باسىم اينالىپ كەتكەندەي بولدى. قورقا باستادىم. اپامدى ىزدەيمىن «جۇگىرمەك» دەپ شىبىعىن ۇستاپ كەلە جاتىر ما دەپ... ءبىر كەزدە بىرەۋ قولىمنان ۇستاپ الدى. قاراسام، كادىمگى ورىس ميليتسيونەرى. ورىسشا بىردەڭەلەردى ايتىپ جاتىر. تۇك ۇقپايمىن. ءبىراز ۋاقىتتان كەيىن قازاق ارىپتەسىن شاقىرىپ الدى. قالتالارىنان «ميشكا كوسولاپىي» دەگەن شوكولادتى شىعارىپ، قولىما ۇستاتتى. سول ساتتە-اق جەپ الدىم. «قايدان كەلدىڭ؟ اتا-اناڭ قايدا؟» - دەپ كۇلىمسىرەپ سۇراپ جاتىر. باسىندا اجەپتەۋىر جاۋاپ بەرىپ جاتىر ەدىم، كەيىن شاتاسا باستادىم. قۇداي وڭداپ، سول ماڭنان قاپيزا اپا دەگەن كورشىمىز جۇگىرىپ كەلىپ: «ويباي، مىناۋ بالا - اناۋ ۇيدە تۇراتىن سوعىس ارداگەرىنىڭ نەمەرەسى! ماعان بەرىڭىز!» - دەپ ەدى، پوليتسيا قىزمەتكەرلەرى قىراعىلىق تانىتىپ، «سىزبەن بىرگە بارامىز، بۇل بالا ءسىزدى تانىماي تۇر» دەپ سەنە قويمادى. سودان ءبىراز جەر ءجۇرىپ، ەكى پوليتسيا قىزمەتكەرى مەن قاپيزا اپا ءۇيدىڭ ەسىگىن قاقتى. اپام شىقتى. «نەمەرەڭىز قايدا؟» - دەگەن سۇراققا «ۇيدە!» دەپ جاۋاپ بەردى. «ال مىنا بالا كىم وندا؟» - دەپ ەدى، اپام شالقاسىنان قۇلاي جازدادى. ايتەۋىر، قان قىسىمى كوتەرىلىپ كەتتى. كەشتە اتام ء«بىر بالاعا قاراي المايسىڭدار» دەپ بارىنە ۇرىسىپ، ەسىكتى سىرتتان قۇلىپتاپ كەتۋ تۋرالى شەشىم قابىلداندى. سىرتتان قۇلىپتالعان ەسىكتەن شىعا الماي تالاي جىلاعانىم ەسىمدە. بىراق بۇل وقيعادان كەيىن پوليتسيا مەن ءۇشىن مەيىرىمدى، جاقسى بالالارعا شوكولاد تاراتاتىن ادامدار سياقتى ەلەستەيتىن. بالا قيالىمىزعا ەكى باتىر ازامات وسىلاي زور اسەر ەتكەن ەدى. 

...ال 2010 جىلى ەقىۇ ءسامميتى ءوتتى. جۋرناليستەردى ارى-بەرى پوليتسيا قىزمەتكەرلەرى بار اۆتوبۋستار تاسىدى. سوندا ءبىر پوليتسيا قىزمەتكەرىمەن تانىستىم. جاسى ۇلكەندەۋ كىسى ەكەن. «سەندەر، جۋرناليستەر بايسىڭدار عوي، جالاقىلارىڭ قانشا؟» - دەپ قويادى. قاراپايىم، اقكوڭىل، اڭگىمەشىل ازامات ەكەن. جالاقىسى 50-60 مىڭ تەڭگەنىڭ ار جاق-بەر جاعىندا ەكەن. ايەلى – قاراپايىم مۇعالىم. ەكى بالاسى بار. استانادا پاتەر جالداپ تۇرادى. ايتەۋىر، تۇرمىستىق قيىنشىلىقتارىن كۇلىپ ايتىپ وتىر. بۇل بارلىق پوليتسيا قىزمەتكەرلەرىنىڭ ورتاق پورترەتى ەمەس پە؟ تاۋقىمەتى دە ءبىر. كەشتە جۋرناليستەر بوپ قوناقۇيلەرگە جيىلىپ، جىلى بولمەلەردە اڭگىمە ايتىپ وتىرعانىمىزدا، تەرەزەنىڭ ار جاعىنان مينۋس 40-تىڭ شاماسىنداعى سۋىقتا، قاقاعان ايازدا توڭىپ-ءبۇرىسىپ پوليتسيا قىزمەتكەرلەرى ءبىزدىڭ قاۋىپسىزدىگىمىزدى باعىپ تۇردى. قانشاسى سول سۋىقتا دەنساۋلىقتان ايىرىلدى؟! تەرەزەدەن قاراپ، جانىم اشىپ وتىردى. باعاناعى اڭگىمەشىل اعانىڭ سول سۋىقتا تۇرعانىن ويلاپ تاعى ۋايىمداي باستادىم. 
مەن وسى جاسقا كەلگەنشە پاتريوت، قازاق دەسە جۇرەگى ەلجىرەيتىن پوليتسيا قىزمەتكەرلەرىمەن كوبىرەك كەزدەسكەنىمە، سۇحباتتاسىپ، پىكىر الماسقانىما قۋانامىن. ارينە، كوبىنە-كوپ جول-ءجۇرۋ ەرەجەلەرىنە بايلانىستى كوپتەگەن نارازىلىقتارىڭىز بار. پارا دامەتەدى دەپ ءار جەردە تۇرعان پوليتسيا قىزمەتكەرىنىڭ شەشەسىن وتتاپ وتەسىزدەر... ال نەگە سىزدەر زاڭ بۇزاسىزدار، نەگە ايىپپۇلدى تولەۋگە ەرىنەسىزدەر؟ ەۋروپا، ەۋروپا بولامىز دەيمىز. وندا ەۋروپاداعىداي زاڭداردى ساقتاۋدان، پوليتسيانى قۇرمەتتەۋدەن نەگە ءبارىن باستاماسقا؟! 

ءبىز پوليتسياعا قارسى توپتاسقان ۇيىمدار نەمەسە جەكەلەگەن ادامدار بولسا دا، قانداي دا ءبىر شابۋىلداردىڭ ۇيىمداستىرىلۋىنا، قارسىلىقتىڭ ورشۋىنە جول بەرمەۋىمىز كەرەك. ولار قوعامدى قورعاۋدىڭ ءبىرىنشى ساپىندا تۇر! ولار قۇرمەتكە لايىق ازاماتتار. قازا تاپقان باتىرلارىمىزدىڭ جاندارى ءجانناتتا بولعاي! اللا الدارىنان جارىلقاعاي!

كامشات تاسبولات

Facebook-تەگى پاراقشاسىنان