دۇيسەنبى كۇنى ۇكىمەت وتىرىسىنان كەيىن جۋرناليستەر الدىندا ءسوز سويلەگەن يىلدىريم مەملەكەتتىك توڭكەرىس جاساماق بولعان بۇلىكشىلەر 208 ادامدى ءولتىردى دەپ مالىمدەدى. ولاردىڭ ىشىندە پوليتسيا قىزمەتكەرلەرى، ساربازدار جانە بەيبىت تۇرعىندار بار. مىڭ جارىم ادام جارالانعان. سوڭعى رەسمي مالىمەتتەر بويىنشا، تارتىپسىزدىك كەزىندە قازا تاپقاندار سانى 290 ادامعا جەتكەن.

يىلدىريم جەتى جارىم مىڭ پوليتسيا، اسكەري، سوت قىزمەتكەرى جانە ازاماتتىق تۇلعالار ۇستالدى دەيدى. 10 مىڭداي مەملەكەتتىك قىزمەتكەر مەن شەنەۋنىك، قارجى مينيسترلىگى، ءىىم وكىلدەرى جانە 30 گۋبەرناتور مەن 47 اۋدان اكىمشىلىگىنىڭ جەتەكشىسى قىزمەتتەرىنەن شەتتەتىلگەن. ولاردىڭ بارلىعى مەملەكەتتىك توڭكەرىس ارەكەتىنە قاتىسى بار دەپ كۇدىككە الىندى،- دەپ جازادى تۇرىك باسىلىمى "حيۋرريەت".

پرەمەر-مينيستر سونىمەن بىرگە تۇركيانىڭ اقش-پەن دوستىق قارىم-قاتىناسى سۇراقتىڭ الدىندا تۇر دەپ مالىمدەدى. انكارا ۆاشينگتوننان يسلام ءدىنىن ۋاعىزداۋشى فەتحۋللاح گيۋلەندى قايتارۋىن تالاپ ەتەدى. ول رەجەپ ەردوعانمەن ارالارىندا سىزات تۇسكەن سوڭ، امەريكاعا كوشىپ كەتكەن. بيلىك گيۋلەن مەن ونىڭ جاقتاستارى بۇلىكتى ۇيىمداستىردى دەپ ەسەپتەيدى. ال ءدىني ۋاعىزشى وزىنە تاعىلعان ايىپتاردى جوققا شىعارادى.

تۇركياداعى اقش ەلشىسى دجون باسس تۇركيانىڭ امەريكاعا تاققان ايىپتارى شىندىققا سايكەس كەلمەيدى دەدى.