شەشەن رەسپۋبليكاسىنىڭ پرەزيدەنتى رامزان قادىروۆ قر پرەزيدەنتى نۇرسۇلتان نازارباەۆقا جانە بارشا قازاقستان حالقىنا الماتىداعى قاندى وقيعاعا بايلانىستى كوڭىل ايتتى، - دەپ حابارلايدى قازاقپارات.

ء«بىز الماتىدا پوليتسيا قىزمەتكەرلەرى مەن بەيبىت تۇرعىنداردىڭ ءومىرىن قيعان لاڭكەستىك وقيعاعا الاڭداۋشىلىق تانىتامىز. بۇدان بۇرىن لاڭكەستەر اقتوبەدە قارۋ-جاراقتى قولعا تۇسىرۋگە ارەكەتتەنگەن ەدى. ولاردىڭ ارەكەتى الدەنەشە ادامنىڭ ءومىرىن قيعان بولاتىن. مەن اسا قۇرمەتتى قر پرەزيدەنتى نۇرسۇلتان نازارباەۆقا قايعىرا كوڭىل ايتامىن. ءبىز قيىن جاعدايدا جاتقان شەشەن رەسپۋبليكاسىنا شەتەلدىك مەملەكەت باسشىلارىنىڭ اراسىنان ءبىرىنشى بولىپ نۇرسۇلتان نازارباەۆ قول ۇشىن بەرگەنىن ۇمىتقان جوقپىز. قازاقستان پرەزيدەنتى سالىپ بەرگەن تۇرعىن ءۇي شەشەنستان استاناسى ورتالىعىنىڭ شىرايىن اشىپ تۇر. ريزا بولعان شەشەن حالقى ورتالىق كوشەلەردىڭ بىرىنە جانە ءبىر مەكتەپكە نۇرسۇلتان نازارباەۆ ەسىمىن بەردى. قازاقتار ءبىز ءۇشىن تۋعان اعامىز سەكىلدى، ال قازاقستان تۇتاس ءبىر بۋىن شەشەن ازاماتتارى ءۇشىن ەكىنشى وتانعا اينالعان. بۇل ەلدە مەنىڭ قادىرمەندى اكەم، شر تۇڭعىش پرەزيدەنتى، رەسەي باتىرى احمات-قاجى قادىروۆ دۇنيەگە كەلگەن. بۇل ەلدە ماعان جاقىن ادامدار جەرلەنگەن، ونىڭ ىشىندە مەنىڭ اتامنىڭ اعاسى دا بار»، - دەپ جازدى رامزان قادىروۆ Instagram-داعى پاراقشاسىندا.

شەشەن رەسپۋبليكاسىنىڭ پرەزيدەنتى ءتۇرلى تەراكتىلەردى باستان كەشكەن شەشەن حالقى مۇنىڭ قانداي ۇلكەن قايعى ەكەنىن تەرەڭ سەزىنەتىنىن جەتكىزدى. ءسوز سوڭىندا رامزان قادىروۆ باۋىرلاس قازاق حالقىنا لاڭكەستىكپەن كۇرەستە كەز كەلگەن كومەكتى جاساۋعا ءازىر ەكەنىن ايتتى. سونداي-اق، باۋىرلاس قازاقستان ەلىنە بەيبىتشىلىك، تۇراقتىلىق جانە مەملەكەتتىڭ گۇلدەنە بەرۋىن تىلەدى.

Abai.kz