ايدوس سارىم، ساياساتتانۋشى:

– مەنىڭ جەكە كوزقاراسىم بويىنشا اقتوبەدەگى وقيعادان بيلىك تە، ەلىمىزدەگى كۇشتىك قۇرىلىمدار دا، اقپارات قۇرالدارى دا ساباق الۋى كەرەك ەدى. تەراكت دەگەنىڭىز ەڭ الدىمەن – اقپاراتتىق سوعىس. لانكەستەردىڭ باستى ماقساتى – قوعامدى ۇرەيلەندىرىپ، بيلىكتىڭ قاندايلىق دەڭگەيدە ءالسىز ەكەنىن اشكەرەلەۋ. وسى اقپاراتتىق سوعىستا... مەملەكەتىمىز 100 پايىزعا دەپ ايتا المايمىن، 70-80 پايىزعا جەڭىلىس تاۋىپ جاتىر. ماسەلەن، رەسەي، ازەربايجان، تۇركيا ەلدەرىندەگى اقپارات قۇرالدارى مۇنداي توتەنشە جاعدايدا ءتۇن دەمەي، كۇن دەمەي ناقتى اقپارات تاراتۋعا قاۋقارلى ەكەنىن تالاي مارتە دالەلدەدى. ال، بىزدە رەسمي مالىمەتتەر ءتۇرلى داقپىرتتاردىڭ كولەڭكەسىندە قالىپ قويىپ جاتادى.

مىسالى بۇگىن وسى وقيعا باستالا سالىسىمەن، قانداي جاعداي بولماسىن تەلەارنالار مەن راديولاردى قوسىپ، نە بولىپ جاتقانىن رەسمي تۇردە جاريالانۋى كەرەك ەدى. وكىنىشتىسى، ولاي بولمادى. حالىق ءتۇرلى ۇرەيلى اقپاراتتاردى فەيسبۋك، ۋاتساپ سەكىلدى الەۋمەتتىك جەلىلەردەن ەستىپ-ءبىلىپ جاتىر.

بىرىنشىدەن، «جۇلدىز» ىقشاماۋدانىنان 100 شاقتى قارۋلانعان لانكەس جولداعىسىنىڭ ءبارىن اتىپ، قىرىپ كەلەدى ەكەن»، «مەگاتسەنتردى باسىپ الىپتى»، «ۆوكزالعا جارىلعىش زات قويىلىپتى» دەگەن سەكىلدى شىندىققا جاناسپايتىن اقپاراتتار ەلدىڭ ەسىن الدى. ەكىنشىدەن، مۇنداي جالعان مالىمەت قۇقىق قورعاۋ ورگانى قىزمەتكەرلەرىنىڭ كۇشىنىڭ جان-جاققا بولىنۋىنە ىقپال جاسادى.

ياعني، مۇنداي اقپاراتتى لانكەستىك ارەكەتتى جاساپ وتىرعانداردىڭ وزدەرى تاراتىپ وتىرعان بولۋى مۇمكىن. سوندىقتان، ارانداتۋ ماقساتىندا جالعان اقپارات تاراتقان ازاماتتار ۇستالىپ، زاڭ الدىندا جاۋاپكەرشىلىككە تارتىلۋى كەرەك.

الماتىداعى وقيعانى سارالاپ، بۇدان كەيىن مۇنداي جاعدايدىڭ الدىن الۋ ءۇشىن ناقتى ناتيجەگە قول جەتكىزگەنىمىز دۇرىس.

تۇركياداعى جاعداي كەزىندە پرەمەر-مينيستر، قالانىڭ اكىمى سەكىلدى لاۋازىمدى تۇلعالار حالىقتىڭ ىشىندە ءجۇردى. ءبىز ءالى قوعامعا باسۋ ايتىپ جاتقان رەسمي تۇلعالاردى كورىپ وتىرعان جوقپىز. حالىققا باسۋ ايتىپ جاتقانداردىڭ دەنى – قوعامدىق بەلسەندىلەر. بۇل نەگىزىنەن – بيلىكتىڭ مىندەتى.

ءبىز قالايىق، قالامايىق ەلىمىزگە تەرروريزم ۇزاق مەرزىمگە كەلىپ، ورنىعىپ جاتىر. قوعام ەندى وسىنداي وقيعالارعا بوي ۇيرەتىپ، ءومىر سۇرۋگە بەيىمدەلە باستايدى. ال، كۇشتىك قۇرىلىمدار سول تەراكتىلەرگە تويتارىس بەرىپ، ولاردىڭ نەگىزسىز اقپاراتتارىنىڭ كەڭ تارالماۋىنا بار كۇشىن سالۋى قاجەت.   

داۋرەن بابامۇرات، ساياساتتانۋشى:

- ءبىزدىڭ بيلىك، ەل ىشىندەگى تۇراقتىلىقتىڭ ماڭىزدىلىعى جونىندە قايتا-قايتا قايتالاۋدان جالىقپايدى. جانە ول دۇرىس تا.

الپاۋىت دەگەن تۇركيانىڭ ءوزى بەس-التى تەراكتىنىڭ سالدارىنان قيسايىپ قالدى. بىراق تۇركياعا قاتىستى، جەرگىلىكتى بيلىكتىڭ توقتاۋسىز قيمىلىن بايقاساق، ءبىزدىڭ جاعدايدا مىنە نەشىنشى رەت ۇنسىزدىكتى كورۋدەمىز. كۇنى كەشە بايان ولگيدى سۋ باسقاندا ات قونعان پرەمەر-مينيستر نەگە ءۇنسىز وتىر؟. جانە وسى ۇنسىزدىكتەر xالىقتىڭ ۇرەيىن كۇشەيتىپ، كۇدىگىن كوبەيتۋدە.

تۇراقتىلىق باستى قۇندىلىق، بىراق سول تۇراقتىلىقتىڭ ءوزى قاتىپ قالعان تاس ەمەس، تولاسسىز ەكەۋارا (بيلىك پەن xالىق) جۇمىستى تالاپ ەتەتىن ءۇردىس. بولعان جاعداي ءتىپتى قۇرىلىمدىق كۇشتەردىڭ السىزدىگى ەمەس (تۇركيا، اقش، رەسەيدە تەررورشىلاردان وپىق جەپ وتىر), الەمدىك ساياسي شيەلەنىستىڭ كۇردەلەنىپ، ستاۆكالاردىڭ وسكەنىنىڭ بەلگىسى.

ءدال قازىر بيلىكتىڭ ءار قادامىنىڭ سالماعى اۋىر، جاۋاپكەرشىلىگى مول. ەلىمە تىنىشتىق تىلەيمىن.

Abai.kz