مەركەل قىرعىز ستۋدەنتتەرىن گەرمانياعا وقۋعا شاقىردى
600-دەن استام قىرعىز ستۋدەنتى گەرمانيادا ءبىلىم الىپ ءجۇر، بىراق ولاردىڭ سانىن بولاشاقتا كوبەيتۋگە بولادى. بۇل تۋرالى گەرمانيا كانتسلەرى انگەلا مەركەل بىشكەكتە قىرعىز پرەزيدەنتى المازبەك اتامباەۆپەن بىرگە وتكىزگەن ءباسپاسوز ءماسليحاتىندا مالىمدەدى.
ء«بىز قىرعىزستاننىڭ 2010 جىلى جاساعان تاڭداۋىن قاتتى قۇرمەتتەيمىز. پارلامەنتتىك دەموكراتيا جولىن تاڭداعان قىرعىزستان قولداۋعا ءزارۋ. حالىقتىڭ تۇرمىسىن جاقسارتۋدا ەكونوميكالىق ءوسىم ماڭىزدى ءرول اتقارادى. جاستار بولاشاعىنا سەنىمدى بولىپ، جاس ماماندار ەلدى تاستاپ كەتپەۋى ءۇشىن شاعىن جانە ورتا بيزنەستى دامىتۋعا بارلىق جاعداي جاسالۋى كەرەك»، - دەدى كانتسلەر.
قىرعىزستاننىڭ تاماشا تابيعاتىن اتاپ وتكەن مەركەل تۋريزم سالاسىنداعى ارىپتەستىكتى دامىتۋ جولدارىن بىرگە ويلاستىرۋعا دايىن ەكەنىن ايتتى.
مەركەل رەسپۋبليكاداعى نەمىستەردى دە تىلگە تيەك ەتتى. ونىڭ پىكىرىنشە، نەمىستەر قىرعىز قوعامىن دامىتۋعا ءوز ۇلەستەرىن قوسىپ كەلەدى. «مەن بۇگىن وسىنداعى ەتنيكالىق نەمىستەردىڭ وكىلدەرىمەن كەزدەستىم. ءبىز بولاشاقتا KfW بانكىنىڭ ءتۇرلى قورلار ارقىلى نە ىستەي الاتىنىن ويلاستىردىق. ارنايى دامۋ قورىن قۇرۋ مۇمكىندىگىن تالقىلادىق»، - دەدى ول.
كانتسلەر جاقىندا قىرعىزستاندا نەمىس ەكونوميكاسىنىڭ كۇندەرى وتەتىنىن ەسكە سالدى. فورۋم قىرعىزستان مەن گەرمانيا اراسىنداعى ساۋدا-ەكونوميكالىق جانە ينۆەستيتسيالىق سالالارداعى بايلانىستاردىڭ جاندانۋىنا سەپتىگىن تيگىزەدى.
اباي-اقپارات
