شۋروب قىشلاعىندا ادامداردىڭ بارىنە بىردەي ۇيلەنۋ تويلارىنا قاتىسۋعا تىيىم سالىندى. سالتاناتتى جيىنعا تەك عانا توي يەلەرىنىڭ كورشى-قولاڭدارى عانا قاتىسا الادى. وسىلايشا، توي جاسايتىن ۇيدەن الىس تۇراتىن تۋعان-تۋىستارى دا جيىنعا كەلە المايدى. ونىڭ ۇستىنە ءار وتباسىنان تەك 1-2 ادام عانا قاتىسۋعا ءتيىس.

سالتاناتتى جيىندارعا قويىلعان شەكتەۋلەردىڭ ىشىندە داستارحانعا قويىلعان تاعامدار دا كىرەدى. باستامانى ۇسىنۋشىلاردىڭ اقپاراتى بويىنشا، اس بەرۋ مەن ۇيلەنۋ تويلارىندا جايىلاتىن داستارحاندار باسەكەگە اينالىپ كەتكەن. گيسسار اۋدانىنداعى جاستار ۇيىمىنىڭ جەتەكشىسى باحروم داستارحانعا قويىلاتىن تاعامداردىڭ ارنايى ءتىزىمىن جاساعاندارىن ايتادى. ء«بىز تەك عانا شىعىندى ازايتۋدى ۇسىندىق. مىسالى ءبىر ادامنىڭ جاقىنى قايتىس بولسا، ول ادامنىڭ باسىندا ۇلكەن قايعى. ول سول كەزدە داستارحان جايىن ويلاپ، ۇستەل ۇستىندە بانان، اناناس نەمەسە وزگە دە ءتاتتى جەمىستەر تۇرۋىن قاداعالاماۋى كەرەك. ارزان ازىق-تۇلىكپەن داستارحان جايۋعا بولادى. قايعىنىڭ ۇستىنە، قارىز بولىپ وتىرۋ كىمگە كەرەك؟»،-دەيدى ول.

باحروم سوڭعى ۋاقىتتا ۇيلەنۋ تويلارىنىڭ استا-توك بولىپ كەتكەنى سونشالىقتى، ءبىر جيىندا كەمىندە 30 داياشى قىزمەت كورسەتەدى دەيدى. «تويلار تەك شىعىن شىعارۋ بولىپ كەتتى. ءاربىر قىزىن ۇزاتقان قوجايىن كەمىندە 5-6 مىڭ دوللار جۇمسايدى ەكەن. جاس جۇبايلارعا جيحاز ساتىپ الۋ ءۇشىن 1500-1800 دوللار جۇمسايدى. ءبىز قىزىنىڭ تويىنا اۋىل ادامدارىنىڭ ءبارىن شاقىرۋ مىندەتتى ەمەس دەپ ۇسىنىس جاسادىق. ۇزاتۋ تويىنىڭ ورنىنا قالىڭدىق دوس قىزدارىن شاقىرىپ، كوڭىل كوتەرسىن. 15-20 ادام شاقىرسا بولادى»، - دەيدى باحروم.

مورتەپپ قىشلاعىنىڭ توراعاسى امرۋللوي يسمات وزودي راديوسىنا بەرگەن سۇحباتىندا ۇنەمدەۋدىڭ ءبارى ەكونوميكالىق جاعدايدىڭ ناشارلارۋىنا بايلانىستى دەيدى. اسىرەسە، رەسەيدە جۇمىس ىستەيتىن تاجىك ميگرانتتارىنىڭ اقشا اۋدارۋ كولەمى بىردەن ازايعان.

اباي-اقپارات