وتكەن 2015-جىلدىڭ ءساۋىر ايىندا الماتى وبلىسى، قاراساي اۋدانىنداعى جاڭاتۇرمىس ورتا مەكتەبىنىڭ مۇعالىمى ايمان ساعيدۋللاەۆا ماعان كەلىپ، مۇعالىمدەردى اۋدان بيلىگى تاراپىنان «سەنبىلىك» ارقىلى 15 كۇندەي قارا جۇمىسقا جەگەتىنىن، سايلاۋعا، ساناققا ارالاستىرىپ، تىپتەن حالىقتىڭ قوي-سيىرىنا دەيىن ساناتتىرىپ، اكىمشىلىك قىزمەتكەرلەرىنىڭ جۇمىستارىن تۇگەلدەي مەكتەپ مۇعالىمدەرىنە جۇكتەيتىنى جانە انشىلەردىڭ كونتسەرتتەرىنە بيلەت ساتىپ الۋ مۇعالىمدەرگە مىندەتتەلەتىنى جايلى شىندىقتى جەتكىزگەن بولاتىن.

ءبىلىم سالاسىندا بولىپ جاتقان كەلەڭسىز جاعدايلارعا  كوز جۇما  قاراي الماي، كومەكتەسۋگە بەل بۋدىم. ءوزىم باcقاراتىن «جالىن» جۋرنالىنىڭ قىزمەتكەرى جاننا يمانقۇلعا ايمان ساعيدۋللاەۆانىڭ پىكىرىن قاعازعا ءتۇسىرىپ، باسپاعا دايىنداۋعا تاپسىرما بەردىم.

«مۇعالىمدەردىڭ مۇشكىل ءحالى نەمەسە ولاردى بيلىكتىڭ قولبالاسى بولۋدان قالاي قۇتقارامىز؟» دەگەن تاقىرىپتاعى ماقالا «جالىن» جۋرنالىنىڭ 2015 جىلعى 4-ءشى سانىندا جاريالاندى. بۇكپەسىز، تازا شىندىققا قۇرىلعان، مۇعالىمدەردىڭ مۇشكىل ءحالىن اشىپ كورسەتكەن ماقالانى «قازاقستان-زامان»، ء«تورتىنشى بيلىك»، «دات»، «اشىق الاڭ» ت.ب. گازەتتەر مەن «اباي.كز»، «ۇلت.كز»، «قامشى» سياقتى ينتەرنەت سايتتارى دا جارىسا جازدى. «31 ارنا»، «تاڭ» تەلەارنالارى ادىلەتسىز جۇيە تۋدىرىپ وتىرعان جاعدايلار تۋرالى ارنايى حابار جۇرگىزدى.

مەن مۇعالىمدەردىڭ باسىنداعى بۇل كيىندىقتارعا بايلانىستى سول كەزدەگى ءبىلىم جانە عىلىم ءمينيسترى اسلان سارىنجىپوۆكە اشىق حات جولدادىم.

ايمان ساعيدۋللاەۆاعا شىندىقتى جايىپ سالعانى ءۇشىن قازىرگى كەزەڭدە ۇلكەن قىسىم كورسەتىلىپ جاتىر ەكەن. جاقىندا «ازاتتىق» راديوسىندا http://www.azattyq.org/a/kazakhstan_rights_of_teachers/27784042.html اقساقالدار «اقىلىن» تىڭداماعان مۇعالىمگە ەسكەرتۋ بەرىلدى»، «اباي.كز» سايتىندا http://www.abai.kz/post/view?id=7969 «قاراسايلىق اقساقالدار ۇستازعا قىسىم كورسەتتى»، «اباي.كز» سايتىندا «شىنشىل ۇستاز جۇمىستان شىعارىلا ما؟» دەگەن ماقالالار باسىلىپتى.

جاڭاتۇرمىس مەكتەبىنىڭ  ديرەكتورى ب.نۇسىپبەكوۆا 2016 جىلدىڭ 19-شى مامىرىندا قاراساي اۋدانىنىڭ بارلىق وكرۋگتەرىنەن اقساقالدار القاسىنىڭ توراعالارىن جيناپ، رايىمبەك اۋىلدىق وكرۋگىنىڭ اكىمى ايدىن اۋەسبايدى شاقىرتىپ، ءوزىن «اتا-انامىن» دەپ تانىستىرعان بەلگىسىز ايەلدى كىرگىزىپ، 3 ساعاتقا سوزىلعان جينالىس اشىپ، ايمان ساعيدۋللاەۆانى ورىنسىز كىنالاپتى. جينالىستا «سەن ارانداتۋشىسىڭ، مۇعالىمدەرگە «سەنبىلىككە شىقپاڭدار»، «كونتسەرتكە بيلەت الماڭدار»، «وقۋشىلارعا مەكتەپتى جوندەۋگە اقشا بەرمەڭدەر دەپ ۇگىتتەپ، ارانداتىپ ءجۇرسىڭ» دەگەن كىنا تاعادى. جان-جاقتان بىلتىرعى كوتەرگەن ماسەلەلەرگە بايلانىستى قارسى پىكىرلەر ايتىلادى.

بۇل ارينە، ۇيات تىرلىك. شىندىقتى ايتقانى ءۇشىن ساعيدۋللاەۆاعا قىسىم كورسەتۋگە بولا ما؟ ايمان شىندىق ءۇشىن، ەلدىك، ۇلتتىق مۇددە جولىندا جاعالاسىپ جۇرگەن قىز. سوندىقتان مۇنداي ادىلەتسىزدىكتەن ونى قورعاۋ – شىنشىل ادامداردىڭ مىندەتى.

قانشاما جىلدار بويىنا مۇعالىمدەردى بيلىكتىڭ قولبالاسىنا اينالدىرعان اۋدان، مەكتەپ باسشىلىعى، ۇزدىكسىز قىسىم جاساۋ ارقىلى ايمان ساعيدۋللاەۆانى جۇمىستان شىعارۋدى كوزدەپ وتىرعانى ايقىن.

رەسپۋبليكا كولەمىندە بىردەن ءبىر قايسار، شىنشىل ۇستاز رەتىندە تانىلعان ايمان ساعيدۋللاەۆاعا بۇدان ءارى دە نەگىزسىز قىسىم جاسالىپ، ونى جۇمىستان شىعارۋ مىندەتى كولدەنەڭ تۇرا بەرسە، وندا بۇل ماسەلە رەسپۋبليكا كولەمىندە تالقىعا سالىناتىنىن ەسكەرتكىمىز كەلەدى.

مۇحتار شاحانوۆ، «مەملەكەتتىك ءتىل» قوعامدىق قوزعالىسىنىڭ توراعاسى، «جالىن» جۋرنالىنىڭ باس رەداكتورى، قازاقستاننىڭ حالىق جازۋشىسى، «تۇركى تىلدەس حالىقتار اراسىنداعى ەڭ ۇزدىك الەم اقىنى» سىيلىعىنىڭ يەگەرى

Abai.kz