ءىىم-ءنىڭ "ABAI.KZ" پورتالىنا جاۋابى
«جەر داۋىنا» قاتىستى ورىن الىپ جاتقان ءتۇرلى وقيعالارعا قر ءىىم تاراپىنان تولىق تۇسىنىكتەمە بەرىلمەگەندىكتەن، اbai.kz اقپاراتتىق پورتالى قر ىشكى ىستەر ءمينيسترى، گەنەرال قالمۇحامبەت قاسىموۆ مىرزانىڭ اتىنا ارنايى ساۋال جولداعان بولاتىن. قر باق تۋرالى زاڭىنىنڭ جانە قر كودەكستەرىنىڭ نەگىزىندە مينيسترلىك ءبىزدىڭ سۇراقتارىمىزعا 3 تاۋلىك ىشىندە جاۋاپ قايتارۋى كەرەك-ءتىن.
بۇگىن پورتالىمىزدا مينيستر قالمۇحامبەت قاسىموۆقا قاراتا ايتىلعان، «ميتينگىشىلەر دە تەرروريستەر مە، مينيستر مىرزا؟» اتتى ماقالا جاريالاندى. اتالعان ماقالا جاريالانا سالا ءبىر اپتا بۇرىن جولدانعان ساۋالىمىزعا وراي ءمينيستردىڭ وزىنەن ەمەس، مەملەكەتتىك ءتىل جانە اقپارات دەپارتامەنتىنىڭ ديرەكتورى ا. سدۋباەۆتان تومەندەگىدەي جاۋاپ كەلدى.
اۋەلى قر ءىىم ءمينيسترى، گەنەرال-پولكوۆنيك قالمۇحامبەت قاسىموۆقا جولداعان ساۋالدارىمىزعا توقتالايىق:
- 2016 جىلى 20-مامىردا «الماتى قالاسىنداعى ادامدار كوپ جينالاتىن «رەسپۋبليكا» جانە «الماتى» الاڭدارىننان جارىلعىش زاتتار، تەمىر-تەرسەكتەر مەن سۋىق قارۋلار تابىلدى. سوعان قاتىستى كۇدىكتى ادامدار قولعا ءتۇستى» دەپ حابارلادى الماتى قالالىق ءىىد. الايدا، ۇستالعان كۇدىكتىلەر تۋرالى ءالى كۇنگە تولىق مالىمەتتەر جاريا ەتىلمەي كەلەدى. نەگە؟ ۇستالعاندار كىمدەر؟ سوت الدى تەرگەۋ امالدارى قالاي جۇرگىزىلىپ جاتىر؟ كۇدىكتىلەر قالاي انىقتالدى؟
- 21 كۇنى الاڭعا بەيبىت شەرۋگە شىققان بىرنەشە ادام اكىمشىلىك قۇقىق بۇزۋشىلىق فاكتىلەرى بويىنشا اكىمشىلىك جازاعا تارتىلدى. كەيبىرەۋلەرى 15 تاۋلىككە قامالدى. بەلگىلەنگەن مەرزىم بويىنشا، 15 تاۋلىك كەشە 31-مامىر كۇنى تاڭعى ساعات 09:00-دە اياقتالىپ، قامالعان ازاماتتار بوساتىلۋى كەرەك ەدى. الايدا، بۇل ازاماتتار كەشكى ساعات 21:00-گە دەيىن بوساتىلماعان. سوندا ولاردى قوسىمشا 12 ساعات قاماۋدا ۇستاعاندا قۇزىرلى ورگاندار قانداي زاڭ نەمەسە ەرەجەلەرگە سۇيەندى؟
- 21 كۇنى الماتىداعى ورتالىق الاڭعا جينالعان ازاماتتاردى جاپپاي تۇتقىنداۋ بارىسىندا سول جەردە كاسىبي قۇقىعى بويىنشا جۇمىس ىستەپ جۇرگەن جۋرناليستەر دە قاماۋعا الىندى. باق تۋرالى زاڭنىڭ نەگىزىندە جۋرناليست اقپارات الۋعا جانە تاراتۋعا مۇمكىندىگى بار ەدى. الايدا 21-مامىر كۇنى جۋرناليستەردىڭ قۇقىعى بۇزىلدى. بۇعان جاۋاپ بەرەتىن كىم؟
- قر ءماجىلىسىنىڭ دەپۋتاتى گەننادي ششيپوۆسكيح مىرزا سىزگە مەملەكەتتىك تىلدە سۇراق قويعاندا ءسىز نەگە قازاق تىلىندە جاۋاپ بەرۋدەن باس تارتتىڭىز؟ بۇعان نە سەبەپ؟
مينيسترلىكتىڭ جاۋابىنان نە تۇيدىك؟ نەندەي تەتىكتەر قالىس قالدى؟
ءبىرىنشى سۇراق بويىنشا بەرىلگەن جاۋاپتا باق-تا جاريالانعانداي ناقتى ماعلۇماتتار بەرىلگەن جوق. ۇستالعانداردىڭ كىم ەكەندىكتەرى بەيمالىم كۇيىندە قالدى. سوت ۇكىمى زاڭدى كۇشىنە ەنگەننەن كەيىن عانا ولاردىڭ بەت-جۇزدەرىن اشىپ كورسەتەتىنىن ۇقتىق. الايدا، مينيسترلىك كۇدىكتىلەردىڭ قالاي انىقتالعاندىعىن ايتپادى.
ءارى قاراي. 21 كۇنى الاڭعا بەيبىت شەرۋگە شىعىپ، 15 تاۋلىككە قامالعان ازاماتتاردىڭ زاڭمەن بەلگىلەنگەن 15 تاۋلىگىنە قوسىمشا 12 ساعاتقا ۇستالعاندىعىن جازدىق. ايتكەنمەندە، بەلسەندىلەردىڭ نەلىكتەن بەلگىلەنگەن مەرزىمنەن ارتىق ۇستالعاندىعىنا مينيسترلىك تۇسىنىكتەمە بەرە المادى.
ال ءۇشىنشى سۇراق بويىنشا (جۋرناليستەردىڭ قامالعاندىعىن) ءىىم مۇلدە تەرىسكە شىعاردى. بار بولعانى: «جۋرناليستەردى قاماۋعا الۋ فاكتىسى تىركەلگەن جوق» دەدى.
قالمۇحامبەت قاسىموۆتىڭ قازاق تىلىندە جاۋاپ بەرۋدەن باس تارتقاندىعى باق-تا جازىلدى. ءماجىلىس دەپۋتاتى گەننادي ششيپوۆسكيحتىڭ تالابى ەسكەرىلمەي، مينيستر مىرزانىڭ مەملەكەتتىك تىلگە تىكسىنگەنى جالعان ەمەس ەدى. ءىىم ءمينيسترىنىڭ بۇلاي ىستەۋىنە نە سەبەپ بولعانىن سۇراعان ەدىك. وكىنىشكە وراي بۇل سۇراعىمىزعا دا جاۋاپ الا المادىق.
نۇرگەلدى ابدىعانيۇلى
Abai.kz
