...ءيا، ءيا، 20 جىل بۇرىن عانا "الماتىكىلەم" دۇركىرەپ تۇرعان! جۇمىسشىسىنا جاتاقحانا، جۇمىسىنىڭ اۋىر-جەڭىلدىگىنە قاراي ءبىر ستاقان ءسۇت پەن ءبىر كورجدان باستاپ، ءبىر ايعا جەتكەندى قويىپ ارتىلىپ قالاتىن ءوزىنىڭ ىشىندەگى اسحانادان قالاعانىڭشا، ءارى قارنىڭ جارىلعانشا ىشەتىن تۇستىك پەن اۋىسىمعا وراي كەشكى ىستىق اس بەرىلەتىن. تەگىن!

سەنبى كۇنى جۇمىسقا شىقساڭ، دۇيسەنبى سول كۇنگى اقشاڭدى الاتىنىڭ تاعى بار! ايلىق ۋاقتىلى. شيپاجايعا بارام دەسەڭ، جولداماسىنىڭ جارتى قۇنىن دا فابريكا تولەيدى، جولىڭ اشىق. اۋىرا قالساڭ، مەدپۋنكتى ىشىندە، اۋرۋحاناعا جاتساڭ - جىلىنا ءبىر بەرىلەتىن ماتەريالدىق كومەگىڭ بار. جوسپارىڭدى اسىرا ورىنداساڭ، ونسىز دا كەيبىر مەمقىزمەتكەردىڭ تۇسىنە كىرمەيتىن ايلىعىڭنىڭ ۇستىنە قوسىلار ۇستەمە اقىڭ جانە بار. بالاڭ بار ما، فابريكانىڭ ءوزىنىڭ ۆەدموستۆولىق بالاباقشاسى بار. اقىسى قالالىق بالاباقشادان تومەن، اس مازىرىنە دەيىن وزگەشە. كىتاپحاناعا بارعىڭ كەلە مە، ول دا ىشىندە - كۇندەلىكتى مەرزىمدى باسىلىمنان باستاپ، "اباي جولى"-ىمەن ءجۇرىپ، "تار جول، تايعاق كەشۋ"-دەن ءوت تە، ء"مولدىر ماحاببات"-ىڭدى جولىقتىر. "اقيقات پەن اڭىز", "ماحاببات مەيرامى" دا - سوندا. سونشاما باي قۇندىلىق سول فابريكانىڭ ىشىندە ەدى، بۇنى جازىپ وتىرعان پاقىرىڭىز كىتاپحانادان شىقپايتىن...

ايتپاقشى، جۇمىستا كيەر كيىمگە دە باس قاتپايتىن، جىلىنا ەكى رەت حالات، باسقا تارتاتىن ورامال مەن فارتۋك بەرەدى. بىردەي حالات كيگەندى وزىمىزشە مەنسىنبەي، اقشا جەتەدى، ادەمىسىن ساتىپ اپ كيىپ الگى حالاتتى اۋىلداعىلارعا جىبەرەتىنبىز. ول - ول ما، جاتاقحاناداعى توسەك-ورىنىمىز جۇقا-قالىڭ كورپەسىمەن بەرىلگەنى ازداي، سەيسەپ پەن كورپە-جاستىقتىڭ تىسىن ەكى اپتادا ءبىر اۋىستىراتىنبىز! ونى دا ءبىز ءۇشىن بىرەۋ جۋىپ بەرەتىن! باستىسى، جاستار باسپانالى بولۋدان ءۇمىتتى بولاتىن! كوممۋنيزم بە؟ كوممۋنيزم!

بۇل ءسوزدى كەڭەس وداعىنىڭ وكتيابريات، پيونەر، كومسومول، كوممۋنيست بولعان كىسىلەرى تۇسىنبەسە، "نۇرلانعان" جاستار ۇقپايدى. كوممۋنيزم دەگەن - ولارعا تۇسىنىكتى تىلدە جەتكىزسەم، ەرتەگى، قيال-عاجايىپ ەرتەگى دەسەڭدەر تاعى وزدەرىڭ بىلىڭدەر. الگى مەن "جاقسى" كورەتىن قىسقا بالاق، قارا جامىلعاندار كوكسەيتىن جاننات سول ما دەپ ويلايمىن كەيدە. تىرشىلىگىڭدە سونشا جاعداي جاسالعان سوڭ، سالىستىرمالى تۇردە ايتسام، بۇل جاننات ەمەي نە؟! جوق، وتكەندى كوكسەپ تە، اڭساپ تا وتىرعام جوق، بىراق ول كەزەڭدى جاماندامايمىن دا. ءبازبىر زيالى جازۋشىلاردىڭ كو كەزىندە الماعان اتاعى جوق، قالاماقىنى دا كۇرەپ تاپقان، شيپاجايدا دەمالعان، سويتە تۇرا بۇگىندە ءوزىن دالاعا تاستاماعان سول كەزەڭدى "قىزىل يمپەريا" دەپ جاراتپاي، قيانات قانا كورگەندەي سويلەيدى. ال مەن تەك ساعىنىپ، ءارى بۇگىنگى جۇمىسشىعا دا وسى جاقسىلىق جاسالسا دەپ ارمانداپ جۇرەم! ويتكەنى وتكەنگە تاس اتساڭ، بولاشاق ساعان وق اتادى.

ءيا، ءيا، الماتىلىق جۇمىسشى جاستاردىڭ 70-80 پايىزى وسىلاي ءومىر سۇرگەن، وسىنى كورگەن، ءسويتىپ ءجۇرىپ سىرتتاي جوو-لاردا وقىعان دا! نەگە سونشا كوپ پايىز دەرسىز، ساۋساعىڭىزدى بۇگىڭىز دە ساناڭىز: "الماتىكىلەمنەن" بولەك، پورشەن", "اۋىر ماشينا جاساۋ" (ازتم) زاۋىتتارى، "جەتىسۋ" (اياقكيىم) مەن اتاقتى "تۇسكيىز" فابريكالارى، "قارعالى" شۇعا كومبيناتى... "الماتى ماقتا-ماتا كومبيناتى" (احبك) ايماعىن بىلەسىزدەر، قوجايىنى كىم ەكەنى دە جەڭگەيلەردىڭ "اۋىز" اتتى راديوسىنان بەلگىلى. كەرەك دەسەڭىزدەر سول احبك-نىڭ جەكە مادەنيەت سارايى دا بولعان! الگى مەن ايتىپ وتىرعان 70-80 پايىز وسىدان شىقتى! 

ءيا، ءيا، بولعان بىزدە! ءبارى بولعان!

(جالعاسى بار).

ايگۇل بولاتحانقىزى

Facebook-تەگى پاراقشاسىنان