سوزاق اۋدانىنىڭ قاراتاۋ اۋىلدىق وكرۋگىنە قاراستى اقسۇمبە ەلدى مەكەنىندەگى «اقبيكەش» مۇناراسىنا ۋاقىتشا قاپتاۋ جۇمىستارى جۇرگىزىلدى. ەل اراسىندا «اقسۇمبە» دەگەن اتاۋعا دا يە جادىگەر ءحىىى-ءحىV عاسىرداعى قالا قۇرىلىسى جانە ساۋلەت ەسكەرتكىشى رەتىندە مەملەكەتتىك تىزىمگە ەنگىزىلگەن.

تاريحي مۇرانى ساقتاپ قالۋ ماقساتىندا اۋدان اكىمدىگىنىڭ باستاما كوتەرۋىمەن جانە جەرگىلىكتى تۇرعىنداردىڭ قولداۋىمەن رەستاۆراتسيالىق جوندەۋ جۇمىستارىنا دەيىن ارنايى توزىمدىلىگى بەرىك ماتەريالمەن قاپتاما تىگىلىپ، ۋاقىتشا قاپتاۋ جۇمىستارى ۇيىمداستىرىلدى. بۇل جۇمىسقا «قاراتاۋ» جشس-ءنىڭ باسشىلىعى ەرەكشە كوڭىل ءبولىپ، قاجەتتى كولىك تەحنيكالارىمەن قامتاماسىز ەتتى.

قازىرگى تاڭدا «اقبيكەش» مۇناراسىن ساقتاپ قالۋ، قايتا قالپىنا كەلتىرۋ، كوركەيتۋ جۇمىستارىن قولعا الۋ ماقساتىندا ارنايى قور اشۋ جۇمىستارى جۇرگىزىلۋدە. اتالعان قورعا «قاراتاۋ» جشس-ءنىڭ باسشىلىعى كولەمدى قارجى اۋداراتىنىن جەتكىزىپ، وزگە ءوندىرىس ورىندارىن دا قولداۋ كورسەتۋگە شاقىردى.

تاريحي دەرەكتەردە اقبيكەش مۇناراسىن ءحىىى عاسىردا دەشتى-قىپشاق  تايپاسى قاراۋىلدىق مۇنارا رەتىندە سالىنعانى جازىلعان. مۇنارا بيىك جەردە تاۋدىڭ تومەن قاباتىندا ورنالاسقان. كەزىندە بيىكتىگى 24 مەتر شاماسىنداعى قاراۋىلدىق مۇنارا قازىرگى تاڭدا 13 مەتر جوباسىندا، قۇرىلىسى لايدان تۇرعىزىلعان. وسى كۇنگە دەيىن مۇنارا تابيعات اسەرىنەن جارتىلاي بۇزىلىپ، توبەسى ءمۇجىلىپ، قابىرعالارىن جاڭبىر شايىپ كەلگەن.

جەرگىلىكتى اتقارۋشى بيلىك وكىلدەرى بولاشاقتا تاريحي قۇندىلىقتى قايتا جوندەپ،  قالپىنا كەلتىرۋدى جوسپارلاپ وتىر. ول ءۇشىن نىساننىڭ جوبالىق سمەتالىق قۇجاتى دا ازىرلەنگەن.

سوزاق اۋدان اكىمىنىڭ ءباسپاسوز قىزمەتى 

Abai.kz