"فەمينيستىك ليگا" قوعامدىق بىرلەستىگىنىڭ ءتورايىمى بايان ەسەنتاەۆانىڭ سوزدەرىنە سەنبەيتىنىن ايتتى. تانىمال پروديۋسەر جۋىردا تەلەجۇرگىزۋشى دينارا ساتجانعا بەرگەن سۇحباتىندا "كۇيەۋىممەن بولعان وقيعادادان كەيىن قۇقىق قورعاۋ ۇيىمدارىنىڭ بىردە-ءبىرى ماعان حابارلاسقان جوق" دەپ مالىمدەگەن بولاتىن.  بۇل تۋرالى  «sn.kz» پورتالى جازادى.

بىرلەستىك ءتورايىمى گالينا موروزوۆانىڭ ايتۋىنشا، باياننىڭ ءوزى ەشقاشان ەشقانداي ۇيىممەن بايلانىسپاعان.

"بايانعا ەشكىم قول ۇشىن سوزبادى دەگەنگە سەنبەيمىن. ويتكەنى، قازاقستاندا داعدارىس ورتالىقتارى، سەنىم تەلەفوندارى، جەدەل جەلىلەر جەتىپ ارتىلادى. ەگەر ول بۇعان دەيىن سول ورتالىقتارعا حابارلاسىپ، كۇيەۋىنەن ءجيى ءزابىر كورەتىنىن ايتسا مىندەتتى تۇردە وعان اقىل-كەڭەس بەرىلەتىن ەدى. ناقتى كىمنەن كومەك سۇراپتى؟ نەگە ايتپايدى؟ ول قانشا جىلدان بەرى جابىرلەنگەن، زورلانعان، كۇيەۋىنەن ءزابىر كورگەن ايەلدەردى كورسە دە ولارعا كوز جۇما قاراپ كەلدى، ءوزىنىڭ باسىنا تۇسپەيىنشە ولاردىڭ ازابىن سەزىنگەن جوق", - دەيدى گالينا موروزوۆا.

اتالعان سۇحباتىندا بايان ەسەنتاەۆا "ماعان بىردە-ءبىر قۇقىق قورعاۋ ۇيىمى كومەكتەسكەن جوق، سوندىقتان مۇنداي ۇيىمدى ءوزىم قۇرىپ الامىن" دەگەن بولاتىن. وسىلايشا ول تۇرمىستىق جانجالدان ءزابىر كورگەن ايەلدەردى قورعايتىنىن مالىمدەدى.

ەستەرىڭىزگە سالايىق، بايان ەسەنتاەۆانى كۇيەۋى باقىتبەك ەسەنتاەۆ 10 ماۋسىم كۇنى الماتىداعى اۋەجايدان قايتار جولدا ءولىمشى ەتىپ ساباپ، پىشاقتاپ تاستاعان بولاتىن. اۋىر حالدە اۋرۋحاناعا جەتكىزىلگەن پروديۋسەر تەك بىرنەشە وپەراتسيا جاسالعاننان كەيىن عانا وزىنە كەلدى. جۋىردا ول سول وقيعا كەزىندە كۇيەۋىنىڭ زورلاعانىن دا ايتقان بولاتىن. قازىر الماتىدا باقىتبەك ەسەنتاەۆتىڭ سوت پروتسەسى باستالىپ كەتتى. وعان كىسى ولتىرۋگە وقتالدى دەگەن ايىپ تاعىلۋدا.

Abai.kz