تۋريزم قازاقستان ەكونوميكاسىنداعى قارقىندى سالالاردىڭ ءبىرى دەسەك تە ەلىمىزدەگى تۋريزم يندۋسترياسى قارقىندى دامىعان سالا دەي المايمىز. ماسەلەنكي، كوكشەنىڭ كۋرورتتىق ايماقتارىنداعى قوناق ۇيلەردىڭ باعاسى اسپانداپ كەتكەنى كوپ ايتىلادى. «بۋرابايداعى» ءبىر بولمەنىڭ قۇنى تاۋلىگىنە 55 مىڭ تەڭگەدەن باستالسا، تۇركيا كۋرورتتارىنداعى انالوگتىق باعا 38 مىڭنان باستالادى ەكەن.

سوڭعى جىلدارى تۋريزم الەمدەگى ەڭ تابىستى بيزنەستىڭ ءبىرى. ءتۋريزمنىڭ ماڭىزى جىلدان-جىلعا وسۋدە، ونىڭ حالىقارالىق بايلانىستا جانە ۆاليۋتالىق ءتۇسىم كوز رەتىندە ماڭىزى ارتۋدا. تۋريزم يندۋسترياسىنىڭ مەملەكەتتىك بيۋدجەتكە تۇسىرەتىن ۆاليۋتالىق ءتۇسىمى، ورتا جانە شاعىن بيزنەسكە كومەگى، تاۋار مەن قىزمەت كورسەتۋ نارىعى ارقىلى ايماقتاردىڭ ەكونوميكاسىنىڭ دامۋىنا ىقپالى وتە زور. اسىرەسە «ەكسپو-2017» قارساڭىندا ىشكى تۋريزم ەل ەكونوميكاسىنىڭ لوكوموتيۆىنە اينالۋى بەك مۇمكىن. بۇل تۋرالى «دەلوۆوي كازاحستان» باسىلىمىنا سۇحبات بەرگەن تۋريستىك ۇيىمدار اسسوتسياتسياسىنىڭ توراعاسى ايدار كەنجەعۇلوۆ مالىمدەگەن.

حوش، حالىقارالىق كورمە اياسىندا شەتەلدىك تۋريستەرگە ەلىمىزدىڭ كورىكتى ورىندارىن كورسەتۋ – قازاقستان ءتۋريزمىن دامىتۋدىڭ جۇيەلىك جوسپارىنا ەنگىزىلۋى ءتيىس-اق.

ساراپشىنىڭ پىكىرىنە سۇيەنسەك، ىشكى جانە سىرتقى ءتۋريزمنىڭ كىندىگى رەتىندە بوكتەرى بەتەگەلى بۋراباي كۋرورتتىق ايماعىن الىپ قاراستىرۋعا ابدەن بولادى.

«سىرتقى ءتۋريزمنىڭ كلاسسيكالىق تسيفرلارىنا نازار اۋدارىپ كورەيىكشى، ءبىر شەتەلدىك تۋريست ءبىر كۇندە 100 دوللار جۇمسايدى دەگەن كۇننىڭ وزىندە ەلىمىزدەگى كۋرورتتىق ايماقتار قولجەتىمدى ءام قاۋىپسىز بولماي ما؟! ەندەشە قازاقستاندىقتاردىڭ كوبى اعىلىپ تۇركيا نەمەسە باسقا جاققا كەتۋگە اسىعادى؟.. بۋراباي استانادان تىم الىس ەمەس. جولى دا جوندەلگەن. «بىراق» دەيتىن ماسەلەلەر دە جوق ەمەس، ارينە. سەبەبى، وتاندىق دەمالىس ورىندارىنىڭ جارناماسى از. مىسالى، ينتەرنەتتەن تۇركيانىڭ دەمالىس ورىندارى تۋرالى ىزدەسەڭىز، قاپتاعان كۋرورتتاردى تاباسىز. ال بىزدە شە؟! وكىنىشكە وراي تەك دەمالىس ورىندارى عانا ەمەس، ءبىزدى قىزمەت ساپاسى دا سىن كوتەرمەيتىنى جاسىرىن ەمەس»،-دەيدى ايدار كەنجەعۇلوۆ مىرزا.

سەرۆيستىك قىزمەت جانە قوناق ءۇي بيزنەسى تۋريزم سالاسىنىڭ اينىماس بولشەگى ەكەنىن ەسكەرسەك، تومەن ساپاداعى قىزمەت ءۇشىن تىم قىمبات باعا كورسەتكىشى،مامانداندىرىلعان كادر تاپشىلىعى، جارنامانىڭ جەتكىلىكسىزدىگى ىشكى ءتۋريزمنىڭ دامۋىنا ايتارلىقتاي كەدەرگى كەلتىرىپ وتىر دەسەك جاڭىلىسپاعان بولار ەك.

«وكىنىشكە وراي قازاقستاندا تەك قانا سەرۆيستىك قىزمەت داماماعان، سونىمەن قاتار، كاسىپكەرلىك تە كەشەۋىلدەپ تۇر. مىسالى، سۋۆينيرلەر ساتۋ، ۇلتتىق ناقىشتاعى قولونەر بۇيىمدارىن جاساۋدان شەبەرلىك-سىنىپتارىن ۇيىمداستىرۋ، ۆيدەوتەكتەر نەمەسە پرەزەنتاتسيالىق ماتەريالداردى جارنامالايتىن بەينە كافەلەر ۇيىمداستىرىلماعان. ايتپەسە، شىعىس قازاقستاننىڭ تابيعاتى قانداي كەرەمەت. تاۋى دا بار، نۋ ورمانى دا بار، جازىق دالاسى دا بار، وزەن-كولدەرى دە جەتەرلىك. ەڭ باستىسى كليماتى ەرەكشە عوي. جەرگىلىكتى تۋريستەر قازىرگى قىزمەتكە ۇيرەنىپ قالعان بولسا، شەتەلدەن كەلەتىن تۋريستەر ءۇشىن جوعارىدا ايتىلعان تەتىكتەر ەڭ ماڭىزدى اسپەكتتەر بولىپ تابىلادى. وسىدان-اق قورىتىندى جاساۋعا بولادى»،-دەيدى تۋريستىك ۇيىمدار اسسوتسياتسياسىنىڭ توراعاسى ايدار كەنجەعۇلوۆ.

سونىمەن قاتار، قازاقستاندا شەتەلدىك ءام وتاندىق تۋريستەرگە ۇسىنۋعا بولاتىن قىزمەت تۇرلەرى جەتەرلىك. مىسالى، اتپەن سەرۋەندەۋ، ۆەلوسەرۋەن، قايىقپەن سەرۋەن، كاتاماران، ياحتا، كۆادراتسيكل، پارالان، اۋە شارى، پاراشيۋتتەن سەكىرۋ، قىستا – شىرشالى ورماندا سەرۋەندەۋ، ەكونتۋريزم سالاسى بويىنشا – فوتواڭشىلىق، ساڭىراۋقۇلاق تەرۋ، بالىققا شىعۋ، تابيعي قورىقتاردى ارالاۋ ت.س.س.

«جوعارىداعى ءبىز اتاپ وتكەن فاكتورلاردىڭ بارلىعى دەرلىك قازاقستاننىڭ ىشكى ءتۋريزمىن دامىتۋعا ايتارلىقتاي كەدەرگى كەلتىرىپ وتىر. مىسالى، قىتايدا ءتۋريزمنىڭ ءۇش باعىتى بار. ولار: تابيعي وبەكتىلەردەگى تۋريزم، تاريحي ەسكەرتكىشتەر، ۇلتتىق سالت-داستۇرمەن تانىستىرۋ. ال بىزدە مۇنىڭ بارلىعى بار ەمەس پە؟!»،-دەيدى ايدار كەنجەعۇلوۆ.

ال تۋريستىك ۇيىمدار اسسوتسياتسياسىنىڭ پرەزيدەنتى روزا اسانباەۆا حانىم، جۋرناليستەرگە بەرگەن سۇحباتىندا ىشكى ءتۋريزمنىڭ دامۋىنا ەندىگى جىلى ەلوردادا وتەتىن حالىقاراولىق «ەكسپو-2017» كورمەسى تاپتىرمايتىن مۇمكىندىك ەكەنى ايتقان.

«بىزدە ءبارى بار، تەك قىمبات. سوندىقتان دا، قازاقستاندىقتار بۋراباي نەمەسە الاكولگە بارىپ دەمالۋدىڭ ورنىنا شەتەلگە شىعىپ جاتادى. ال بىزگە مۇناي، گاز، ءتۇرلى مەتەللدار الۋعا كەلگەن داۋلەتتى بيزنەسمەندەر عانا كەلىپ دەمالا الادى. 5 جۇلدىزدى قوناق ۇيلەر تەك سولاعا ارناپ سالىنادى. مىنە، بىزدەگى ءتۋريزمنىڭ ءحالى. ال ءبىز ىشكى ءتۋريزمنىڭ جاندانعانىن، قازاقستاندىقتار ءوز ەلىمىزدە دەمالعانىن قالايمىز. سوندىقتان، كەم دەگەندە ينفراقۇرىلىمدى دامىتۋىمىز كەرەك. «ەكسپو-2017» كورمەسى كەلە جاتىر. سوندىقتان ويلانۋىمىز كەرەك. اسىرەسە، وتاندىق كاسىپكەرلەر، ينۆەستورلار ءۇشىن بۇل تاپتىرمايتىن مۇمكىندىك»،-دەيدى روزا اسانباەۆا حانىم.

ال ساراپشى  ايدار كەنجەعۇلوۆتىڭ پىكىرىنشە، ىشكى ءتۋريزمنىڭ درايۆەرى رەتىندە كاسىپكەرلەرگە جەڭىلدىكتەر قاراستىرىلۋى كەرەك.

«ول ءۇشىن تۋريستىك ايماقپەن اينالىساتىن كاسىپكەرلەرگە نەمەسە ينۆەستورلارعا جەڭىلدىكتەر قاراستىرىلۋى ءتيىس. مىسالى، سالىق كولەمىن ازايتۋ، سۋبسيديالاۋ، جەڭىلدەتىلگەن پايىزبەن نەسيە بەرۋ، قولجەتىمدى ۆيزالىق رەجيم ت.ب. مىسالى، كورشى رەسەيدە تۋريستىك-رەكرەاتسيولندى كلاستەر رەزيدەنتتەرى ءۇشىن سالىق كولەمى بەس جىلعا تابىس كولەمىنىڭ 5 پايىزىنان اسىرمايدى. بۇل شاعىن بيزنەستىك دامۋىنا جانە شەتەلدىك ينۆەستورلاردى تارتۋعا ۇلكەن سەپ بولارى ءسوزسىز»،-دەيدى ايدار كەنجەعۇلوۆ.

راس، حالىقارالىق دەڭگەيدەگى كورمەنى وتكىزۋ قازاقستان ەكونوميكاسى ءۇشىن تابىس كوزىنىڭ جاڭا نۇكتەسىن اشۋعا، قازاقستاننىڭ كۋرورتتىق ايماقتارىن الەمدىك تۋريستىك ورتالىققا اينالدىرۋعا تاپتىرماس مۇمكىندىك. ول ءۇشىن استاناداعى اق جاعىلالار قۋاتتى تۋريستىك ينفراقۇرىلىمدى رەتتەۋ ماسەلەسىن كۇن تارتىبىنە شىعارۋ ءتيىس. ايتپەگەندە، الەكتەنگەنىمىز بەكەرگە شىعۋ بەك مۇمكىن.

Abai.kz