جۇما, 29 ناۋرىز 2024
ەل ءىشى... 6539 0 پىكىر 26 تامىز, 2016 ساعات 09:50

"يۋجاندار", "تەحاستىقتار" دەۋ - قاساڭ تۇسىنىك

قازاق اراسىندا ورىستىق سانامەن ۋلانعانداردىڭ شىمكەنتتىكتەرگە ۇركە قاراپ، مىسقىلداپ، ءاجۋالاپ سويلەيتىندەرى كەزدەسەدى. ولاردى "يۋجاندار", "تەحاستىقتار" دەپ مىسقىلدايدى. مەنىڭشە، بۇل شىمكەنتىكتەردىڭ ۇلتتىق سالت-داستۇرگە بەرىكتىگىن، ومىرگە بەيىمدىلىگىن، ىسكەرلىكتەرىن، كاسىپكەرلىك تالانتتارىن قابىلداي الماعان جانداردىڭ قىزعانىشىنان تۋىنداعان كەشەگى كەڭەستىك، ورىستىق كوزقاراستان تۋىنداعان "قاساڭ" كورىنىس. 

شىمكەنتتىكتەردەن كوپ ۇلگى الۋعا بولادى. دەموگرافيا جاعىنان شىمكەنت وبلىسى بۇكىل قازاقستانعا "دونور", وبلىس ورتالىعى شىمكەنت قالاسى ەشبىر قولداۋسىز، باي شيكىزاتتىق كەن ورىندارىنسىز-اق "ميلليوندىق" شاھارعا اينالدى، قازاق ەلىنە بەلگىلى مادەنيەت مايتالماندارى، اقىن-جازۋشىلار، ىسكەر جانداردىڭ قاتارى دا مول. جاقىندا "سەرپىن" جوباسىنىڭ نەگىزىندە 1 اپتا كولەمىندە شىمكەنتتە بولىپ، شىرايلى ايماقتىڭ تىنىس-تىرشىلىگىن ءوز كوزىممەن كوردىم، كوردىم دە - كوڭىلىم تولدى. الدىمەن ادامعا قىزمەت كورسەتۋ سالاسى ەرەكشە دامىعان: ەكى قادام سايىن ءدامحانا، كافە، شايحانا. باعالارى تومەن، تاعامى ءدامدى. قوعامدىق كولىكتەر زىرىلداپ تۇر.تاكسي ارزان. قالا تازا، كورىكتى. تۇرعىندارى كىشىپەيىل، ءىلتيپاتتى.

قازاقيلىق مادەنيەت ايقىن بايقالادى. شىمكەنتتىڭ كورىكتى جەرلەرىنە قازاقتىڭ اباي، باۋىرجان مومىشۇلى سىندى تۇلعالارىنا ەڭسەلى ەسكەرتكىشتەر ورناتىلعان. 

مەنى اسا تاڭقالدىرعان نارسە قوناق ءۇي بولدى. "شىمكەنت" قوناق ءۇيى ء"تورت جۇلدىزدى" ساپاعا يە ەكەن. جۇلدىزىنا قىزمەتى دە ساي. وڭتۇستىك كورەيانىڭ استاناسى سەۋلدە ءدال وسىنداي ءتورت جۇلدىزدى قوناق ۇيدە جاتقانبىز. بۇل ودان ءبىر مىسقال دا كەم ەمەس. بارلىق جاعداي جاسالعان: wi-wi, مۇزداتقىش، تەلەۆيزور، جەلدەتكىش (وتاندىق - Alma com), ميني-بار، شۆەد ستولى ۇلگىسىندەگى تاڭعى اس. ايىرماشىلىق ء(ازىل رەتىندە-اۆتور): سەۋلدە ۋنيتازدىڭ دارەت العان كىسىگە جاسايتىن قىزمەتى تولىق اۆتوماتتاندىرىلعان، ياعني شايۋ، جۋىنۋ، قۇرعاتۋ دەگەن ماسەلەلەر قول جەتەتىن جەردەگى  ارنايى قوندىرعى ارقىلى باسقارىلادى. ىشىمنەن: "اۆتوماتتاندىرىلعان ۋنيتازعا دا قولىمىز جەتەر، ويتكەنى دارەت الۋعا ەرەكشە ءمان بەرەتىن مۇسىلمان جۇرتىمىز عوي، ەۋروپانىڭ تەحنولوگياسىن بايىعان كەزدە الارمىز، - دەپ وي ءتۇيدىم.  


ونىڭ ەسەسىنە شىمكەنت قوناق ءۇيىنىڭ باعاسى - قالتاڭا سالماق سالمايدى. ءبىر كىسىلىك ليۋكس بولمە - 9000 (توعىز مىڭ) تەڭگە. ءوز وتانىمىزدا وسىنداي قىزمەت كورگەنگە نە جەتسىن! كوڭىلىڭ تولادى. مۇنداي ءتورت جۇلدىزدى قوناق ۇيگە دەگەن ارزان باعانى ەشبىر ەۋروپا ەلى ۇسىنا الماس. بالكىم، بۇل سالىستىرۋىم دا دۇرىس ەمەس شىعار. سەبەبى ەۋروپانىڭ ءومىر ءسۇرۋ دەڭگەيى بىزدەن گورى الدەقايدا جوعارى عوي. جوعارى ەلدىڭ قىزمەت باعاسى دا سوعان لايىق. بىراق شىمكەنتتىكتەردىڭ ەلدىڭ تۇرمىس جاعدايىن، ال-اۋقاتىن ءتۇسىنىپ، ارزان باعا قويىپ وتىرعانى دا ىسكەرلىكتىڭ ءبىر كورىنىسى ما دەپ ويلادىم. پايدانى تاۋار مەن قىزمەتتىڭ كولەمى ارقىلى الۋعا بولاتىنى ءسوزسىز. بىزدەر باعانى قىمبات قويىپ، تەز پايدا تابۋعا تىرىساتىن سياقتىمىز. ەلىڭە پايدا اكەلمەگەن ىسكەرلىكتىڭ نەسى ساۋاپ؟! شىمكەنتتەن وسىنداي تاعىلىم الۋعا بولادى. شىرايلى شىمكەنت دەگەن تىركەس بەكەردەن-بەكەر تۇزىلمەسە كەرەك! 

الماسبەك ابسادىق 

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1575
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2268
عيبىرات

قايسار رۋحتى عازيز جان

مۇحتار قۇل-مۇحاممەد 3577