شىمكەنتتىك كارينا ناجمەدينوۆا يتاليادا وتكەن ونەر سايىسىندا باس جۇلدەنى يەلەندى. 15 جاسار تالانتتى جاس كلاسسيكالىق باعىت بويىنشا وتكەن ءان دوداسىندا 200 ۇمىتكەردىڭ ىشىنەن وزا شاپقان. رەسپۋبليكالىق، حالىقارالىق جارىستاردىڭ بىرنەشە رەت جەڭىمپازى اتانىپ ۇلگەرگەن جەرلەسىمىز ءۇشىن بۇل ەڭ ۇلكەن جۇلدە. جەڭىس تۇعىرىنان كورىنىپ، يتاليالىق قازىلاردىڭ ەڭ جوعارى باعاسىن العان كارينامەن تىلدەسىپ، قۋانىشىمەن بولىسكەن ەدىك.

 — بۇل — مەنىڭ يتالياعا العاش رەت بارۋىم،- دەيدى كارينا. — العان اسەرىم كەرەمەت بولدى. جىلى ىلتيپاتپەن قارسى الدى ءبىزدى. ول ەلدە كلاسسيكالىق ونەرگە دەگەن قۇرمەت ەرەكشە. يتالياداعى قازىلار القاسى مەنىڭ ونەرىمدى جوعارى باعالاعانىنا قۋانىشتىمىن».

«كۇن استىنداعى يتاليا» اتتى حالىقارالىق جارىسقا الەمنىڭ تۇكپىر-تۇكپىرىنەن كلاسسيكالىق باعاتتا ءان ايتاتىن 200-دەن اسا جاس تالانت يەلەرى قاتىسقان. كارينا دا بۇل دودالى جارىستا جەڭىستەن دامەلى بولعانىن جاسىرمايدى. سوندىقتان رەپەرتۋار تاڭداۋعا ەرەكشە ءمان بەرگەن.

— العاش ورىنداعان ءانىم — يتاليان تىلىندەگى  اتاقتى ءان. ەكىنشىسى — لاتيف ءحاميديدىڭ ءانى «بۇلبۇل» بولدى. ەكى ءاندى ءمىنسىز ورىنداپ شىقتىم. مەن داۋىسىمدى، مۇمكىندىگىمدى كورسەتە ءبىلدى دەپ ويلايمىن. سوندىقتان بولار، ەشقانداي قورقىنىش، قوبالجۋ بولعان جوق.

كارينا بيبىگۇل تولەگەنوۆا اپامىزدىڭ ورىنداۋىندا حالىق جادىندا جاقسى ساقتالعان «بۇلبۇل» ءانى باعىمدى اشتى دەيدى. ونىڭ وزىندىك سەبەبى بار. ويتكەنى ساپارعا شىقپاس بۇرىن جەڭىمپاز بۇلبۇل انشىمەن جۇزدەسىپ، اق باتاسىن العان.

جەڭىمپاز قالامىزداعى №1 ج. وماراۆا اتىنداعى  بالالار ساز مەكتەبىندە 4 جىل ءبىلىم العان. ونىڭ العاش رەت مەكتەپكە كەلگەن ءساتىن ۇستازدارى جاقسى بىلەدى. وسى ۋاقىت ىشىندە بىلىكتى مۇعالىمدەردەن ءتالىم العان وقۋشى بىرنەشە سايىستارعا قاتىسىپ، تاجىريبە جينادى. جۇلدەسىز قايتقان ءساتى بولعان ەمەس. ال ونىڭ بويىنداعى ەرەكشە قابىلەتىن بايقاعان مۇعالىمدەرى ۇلكەن ءۇمىت كۇتەتىنىن ايتادى.

شەتەلگە ءجيى شىعىپ، ەل نامىسىز قورعاپ جۇرگەن كارينا ناجمەدينوۆا ۇيرەنەرىم كوپ دەيدى. ءار جارىسىندا وزىڭە جاڭا دۇنيەنى جانىنا ءتۇيىپ جۇرەدى. العا قويعان ارمان-ماقساتى — اتاقتى وپەرا ءانشىسى بولۋ.

Abai.kz