قازىر قازاقتاندا دا داۋلى ماسەلە قازاق-تۇرىك ليتسەيلەرىنىڭ جايى بولىپ وتىر. تۇركيا پرەزيدەنتى ەردوعان "ولار قاۋىپتى، جاۋىپ تاستاۋ كەرەك" دەسە، قازاقستان جاعى "ول مەكتەپتەر بىزگە كەرەك، ساپالى ءبىلىم بەرەدى، ونىڭ تۇلەكتەرى حالىقارالىق وليمپيادالاردا مەدالداردى كوپتەپ الۋدا. جانە مۇعالىمدەرى 90 پايىز قازاق، سوندىقتان جاپپايمىز" دەيدى. بۇل دۇرىس كوزقاراس. تۇركيا باسقا ەل، قازاقستان باسقا ەل. سونان سوڭ ەكى ەلدىڭ جاعدايلارى دا وزگەشە. راسىندا دا بۇل مەكتەپتەردىڭ بەرگەن ءبىلىم جانە عىلىمىنا ايتار ءۋاجىمىز جوق. 

گۇلەن فەتحۋللاھ

ەگەر، بۇل مەكتەپتەر تازا عىلىم مەن ءبىلىم بەرىپ جاتسا، ولاردا ەشكىمنىڭ شارۋاسى بولماس ەدى. بىراق سول مەكتەپتەردەگى جەتكىنشەكتەرگە وقۋدى ءبىتىرىپ ءتۇرلى قىزمەتتەرگە كوتەرىلگەندە، گۇلەنگە قۇل بولۋ، سونىڭ ايتقانىن بۇلجىتپاي ورىنداۋ جايىندا ۇگىت ناسيحات بەرىلىپ جاتسا، وندا ول قاۋىپتى.

15 شىلدەدەگى وقيعاعا دەيىن تۇركياداعى ەڭ باستى وپپوزيتسيالىق پارتيالار بىرىگىپ، ەردوعاننىڭ گۇلەنگە ورىنسىز شۇيلىگىپ جاتقانى تۋرالى ايتىپ، كىنالاعان ەدى. بىراق مۇنىڭ شىندىق ەكەنى 15 شىلدە كۇنى بەلگىلى بولدى. ونىڭ نەگىزگى ۇيىمداستىرۋشىسى جانە ورىنداۋشىلارىنىڭ گۇلەن مەن گۇلەن مەكتەپتەرىنىڭ تۇلەكتەرى ەكەنىنە وپپوزيتسيانىڭ دا، باسقالاردىڭ دا كوزى جەتىپ وتىر.

گۇلەن مەكتەپتەرى ءبىر ادامعا قۇلشىلىق ەتۋدى، تەك تۇركيادا، ياعني ءوز ەلىندە عانا ۇگىتتەپ، وزگە ەلدەردە تازا عىلىممەن، بىلىممەن شۇعىلدانىپ جاتقان شىعار. مۇنى ءوز باسىم بىلمەيمىن، كوپ ادام دا بىلمەيتىن شىعار. مىنە، ەلباسى دا انكاراداعى سوزىندە وسىنى ايتقان ەدى. “مۇنى تەكسەرەمىز، ەگەر ونداي ماقساتتارى بار بولىپ جاتسا، ءتيىستى شارالاردى قابىلدايمىز" دەدى. ەلباسىنىڭ "قازاق-تۇرىك ليتسەيلەرىن تەكسەرەمىز" دەگەنى تەگىننەن تەگىن ايتىلا سالعان ءسوز ەمەس دەپ ويلايمىن. ءبىزدىڭ تىلەگىمىز قازاق-تۇرىك ليتسەيلەرىندە جەكە باسقا تابىنۋشىلىققا ۇگىتتەيتىن ماقسات بولماۋى كەرەك. قازاقستاننىڭ توڭكەرىستىك ارەكەتتەردەن امان جانە تىنىش بولۋىن قالايمىز!

ابدىۋاقاپ قارا، 

ميمار سينان كوركەم ونەر ۋنيۆەرسيتەتىنىڭ پروفەسسورى، تاريح عىلىمىنىڭ دوكتورى 

Abai.kz