الماتىداعى «ادك» ويىن-ساۋىق ساۋدا كەشەنىنە كەلگەندەر جالاڭاشتانىپ تاستادى.  «ادك»-داعى اش ەمەس..، جالاڭاشتاردىڭ بار اۋرەتىن كورسەتىپ، ازىق-تۇلىكتىڭ كەزەگىنە تۇرۋى ازاماتتىق ار-نامىسى جوعارى، ۇيات-اياتتى بىلەتىن جانداردىڭ جاعاسىن ۇستاتتى. جالاڭاشتاردىڭ ساۋداسىن الەمجەلىگە بەلگىلى جۋرناليست يرينا سوۆەتجانقىزى شىعارعان بولاتىن. «اش-جالاڭاش دەگەن وسى شىعار» دەپ جازدى ول الەمجەلىگە تومەندەگى بەينەكورىنىستى سالا وتىرىپ.

وسىدان كەيىن عالامتوردان اقپارات الاتىن قازاق قوعامى الگى جالاڭاشتار مەن ولاردى جالاڭاشتاعانداردىڭ تىرلىگىنە نارازىلىق تانىتىپ باستادى. بەلگىلى جۋرناليست گۇلميرا ابىقاي فەيسبۋكتەگى پاراقشاسىندا  "اۋ، الماتىلىق اعايىن! ەرتەڭنەن باستاپ، ەڭ قۇرماسا، وسى ازعىندىققا قارسىلىق شاراسىن باستايىق! بۇل ساياسات ەمەس قوي، رۇقسات بەرەتىن شىعار... ارلى ۇرپاق قاجەت ماعان!" دەپ جازسا، پۋبليتسيست-عالىم قۋاندىق شاماقايۇلى «5000-اق مىڭ تەڭگەنىڭ تاماعى ءۇشىن بەتتىڭ ارىن بەلبەۋگە ءتۇيىپ شەشىنگەن جۇرتقا ەرتەڭ بىرەۋ 5 ملن-نىڭ شەتىن كورسەتسە نە ىستەرىن ويلاشى!» دەپ وي تاستادى. الايدا مىنا جۇرتتى 5000 تەڭگەنىڭ تاماعى ءۇشىن شەشىنىپ تاستادى دەۋگە نەمەسە سوعان ءماجبۇر بولعاندىقتان لىپاسىز قالدى دەۋگە كەلمەيدى. بۇنىڭ اتى – شەكتەن شىعۋ. ۇيات پەن اردان بەزۋ. ىنساپسىزدىق. قارىننىڭ توقتىعى مەن قايعىنىڭ جوقتىعىنان تۋعان ازعىندىق. اتالعان ساۋدا ءۇيىنىڭ اكىمشىلىگى سونى ءبىلدى دە قىزىق كوردى. تاماشالادى. الايدا، بۇنداي سوراقىلىق پەن ماسقاراعا بەي-جاي قاراي المايتىن قوعامنىڭ نارازىلىعىنا ۇشىرادى. سودان كەيىن امالسىزدان تومەندەگىدەي مالىمدەمە جاساۋعا ءماجبۇر بولعانعا ۇقسايدى. ول قانداي مالىمدەمە. قاراڭىز:  

ازاماتتاردىڭ جاعىمسىز پىكىرلەرىن نازارعا الا وتىرىپ، 2016 جىلعى 14 قاراشادان باستاپ «ادك» ويىن-ساۋىق ساۋدا كەشەنىندەگى «كۆارتيرنايا زاكۋپكا» شاراسى شەڭبەرىندە ۇيىمداستىرىلعان  «كەل دە ال» اكتسياسى توقتاتىلعاندىعىن حابارلايمىز.

وسى اكتسيانى قورلاۋ دەپ ويلاعان بارلىق ازاماتتاردان كەشىرىم سۇرايمىز.

سونىمەن قاتار، «ادك» ويىن-ساۋىق ساۋدا كەشەنى قوعامىمىزدا قالىپتاسقان مورالدىق جانە ادامگەرشىلىك قاعيدالارىن تولىعىمەن قولدايتىنىن مالىمدەيمىز.

 ىزگى نيەتپەن

«ادك» ويىن-ساۋىق ساۋدا كەشەنىنىڭ  اكىمشىلىگى

Abai.kz