الماتىدا «Recommended by Universiade — 2017» سەرىكتەستىك باعدارلاماسىنىڭ تانىستىرىلىمى ءوتتى، دەپ حابارلادى «قازاقپارات».

اتالعان باعدارلاما اياسىندا الماتى قالاسى اۋماعىنداعى قوناق ءۇي، حوستەل، قوعامدىق تاماقتانۋ ورىندارى «Recommended by Universiade-2017» بەلگىسىمەن ۋنيۆەرسياداعا قاتىسۋعا ىرىكتەۋ كوميسسياسىنىڭ قاراۋىنا وتە الادى.

«ۋنيۆەرسيادا — قازاقستان تاريحىنداعى ءىرى سپورت شاراسى. 5 000 سپورتشى، جاتتىقتىرۋشى، ماماندار مەن قۇرمەتتى قوناقتاردى كۇتىپ وتىرمىز. ۋنيۆەرسيادا كەزىندە 30 مىڭنان استام ءتۋريستى قابىلداماقپىز. ءبىز تۋريزم باسقارماسىمەن «Recommended by Universiade — 2017» باعدارلاماسىن جۇزەگە اسىرۋعا كىرىستىك»، — دەدى «ۋنيۆەرسيادا  2017» ديرەكتسياسىنىڭ ديرەكتورى نايل نۋروۆ باعدارلامانىڭ تانىستىرىلىمىندا.

ءوز سوزىندە نايل نۋروۆ اتالعان باعدارلامانىڭ ماقساتى قىسقى ۋنيۆەرسيادا كەزىندە دە الماتى قالاسىنا كەلگەن تۋريستەرگە جايلى جاعداي جاساۋعا باعىتتالعان سالالاردىڭ ساپاسىن ارتتىرۋ ەكەنىن ناقتىلاي ءتۇستى.

«الماتى جىلىنا 4 ملن ءتۋريستى قابىلداۋعا قاۋقارلى. قازىرى جاعدايدا ءبىز ساياحاتشىلارعا اسا تانىلا قويعان جوقپىز، دەگەنمەن ۋنيۆەرسيادادان كەيىن جاعداي وزگەرەدى دەپ ويلايمىن. ايتا كەتەيىك، جاسالعان ساراپتامالارعا سۇيەنسەك، قىزمەت كورسەتۋ ساپاسى جاعىنان ءبىز كورشى ايماقتارداعى قالالاردان قالىپ كەلەمىز. ءبىزدىڭ مىندەت: «اۋەجايدان اۋەجايعا دەيىن» ساپاسىن جۇيەلەۋ. ويتكەنى، ءبىز قوناق ءۇي مەن قوعامدىق تاماقتانۋ سالالارىندا ساپالى سەرۆيستى قۇرۋعا كىرىستىك. بۇل  ءبىرىنشى قادام.  وسىدان كەيىن ءبىز اۋەجايدا، ساۋدا ورتالىقتارىندا قىزمەت كورسەتۋ تالاپتارىن ازىرلەيمىز. تۋركومپانيالارعا مونيتورينگ جاساپ وتىرامىز»، — دەدى نايل نۋروۆ.

«Recommended by Universiade-2017» باعدارلاماسى رەسمي تۇردە 7 قاراشادان جۇمىسىن باستايدى. باعدارلامانىڭ العاشقى ناتيجەسى قاراشا ايىنىڭ سوڭىندا بەلگىلى بولماق. جەلتوقسان ايىنىڭ سوڭىندا باعدارلاماعا قاتىسۋشىلار تۋرالى قاعاز بەتىندەگى جانە ينتەراكتيۆتى تۇردەگى كارتا ازىرلەۋ جوسپارلانعان. ۋنيۆەرسيادا اياقتالعاننان كەيىن «Almaty Quality» ساپا بەلگىسىن قۇرۋ بەلگىلەنىپ وتىر.

Abai.kz