بعم سالاسىندا  ەرلان ساعاديەۆتىڭ رەفورمالارى جالعاسىن تاۋىپ جاتىر. ء  بىز ونىڭ ءالى سويلەۋ جانە ويلاۋ قابىلەتى قالىپتاسپاعان 6 جاسار بۇلدىرشىندەرگە «ۇشتىلدىكتى» بيىلدان باستاپ تىپقىلاعانىن كورىپ وتىرمىز. تاريحتى «پۇشىق» قىلىپ، ءبىزدىڭ مەملەكەتتىگىمىز تەك قانا 1991 جىلدان «باستالاتىنىن» دالەلدەۋ ءۇشىن «قازىرگى زامان قازاقستان تاريحى» ءپانىن بيىلدان باستاپ جوو-عا ەڭگىزگەنىنە دە كۋا بولدىق. ال ەندى  نە ىستەر ەكەن دەپ جۇرگەنىمىزدە، ول كەزىندە پارا الىپ، جەمقورلىقپەن اتى شىققان ادامداردى جەتەلەپ اپارىپ جوو رەكتورلىعىنا تاعايىنداۋعا كىرىستى.

 اتىراۋ ۋنيۆەرسيتەتىنە  ەۋرازيا ۋنيۆەرسيتەتىن توناپ كەتكەن، ەسىمى بۇكىل باق-تا كورىنىس تاپقان اتى شۋلى ابزال احاتۇلىن،

قىزىلجار ۋنيۆەرسيتەتىنە كەزىندە رەكتورلاردان «سالىق» جيناپ اتى شىعىپ، ءتىپتى ۋاقىتشا قىزمەتتەن شەتتەتىلگەن سەرىك ماۋلەنۇىلىن،

ال پاۆلودارعا 2008 جىلى – سول كەزدە پاۆلودار پەداگوگيكا ينستيتۋتىندا رەكتور قىزمەتىن 10-اق اي اتقارۋعا ۇلگەرگەن التىنبەك نۇقۋلىن تاعايىندادى. سوڭعى «كەيىپكەردى» ۇلتتىق قاۋىپسىزدىك كوميتەتىنىڭ قىزمەتكەرلەرى سول جىلدىڭ كۇزىندە 100 مىڭ دوللار پارامەن ۇستاپ، كىسەندەپ، ءتىپتى قامات تا تاستاپ ەدى. ول ۋاقيعا بۇگىنگە دەيىن كەرەكۋ جۇرتىنىڭ «قۇلاعىندا». جەرگىلىكتى گازەتتەردىڭ دە بەتىنە باسىلىپ شىققان. بارلىق قىزىق، ارينە، بۇندا عانا ەمەس: سەبەبى ءبىز تەك قانا وسىندايلاردى جاۋاپتى قىزمەتتەرگە تاعايىندايتىنىنا ابدەن ۇيرەنگەنبىز.

ماسەلە باسقادا.ءۇش پاراقوردى ءۇش ۋنيۆەرسيتەتكە رەكتورلىققا جىبەرۋ كىمگە كەرەك؟!. وسىلاردى باسىنان رەكتور قىزمەتىنە تاعايىنداۋدى ويلاپ جۇرگەن مينيستر ساعاديەۆ مىرزا جوو باسشىلارىن  سايلايتىن جاڭا ەكى ساتىلى كونكۋرس بولاتىنىن رەفورما قىلىپ نە ءۇشىن جاريالادى ەكەن؟ نەگە ەل باسىندا جۇرگەن شەنەۋنىكتەر پاراقورلاردى وقۋ ورىندارىن باسقارۋعا تىپقىلاي بەرەدى؟ وسىنى كىم باقىلايدى، كىم تورەلىگىن ايتادى؟  وسى ساۋالدارىمىز جاۋاپسىز قالا بەرەتىن بولسا، ءبىز كەلەسى جولى وسى «ۇمىتكەرلەردىڭ» ارتىندا تۇرعان جوعارى لاۋازىمدى ادامداردىڭ اتارىن اتاپ، تۇستەرىن تۇستەمەكشىمىز.                                                              

بەكزات نۇربەك

Abai.kz