4132 ادامعا ارنالعان ۇندەۋ

جەلتوقسان كوتەرىلىسىنىڭ 30 جىلدىعى قارساڭىندا بەيبىت شەرۋگە شىققان قازاق جاستارىن اسا قاتىگەزدىكپەن جازالاعان، ۇرىپ-سوققان، جۇمىستان، وقۋدان شىعارعان، جاساندى سوتقا تارتىپ، ادىلەتسىز جازالار بەرگەن ادامداردىڭ حالىق پەن ۇلتتىڭ الدىندا كەشىرىم سۇراپ، كۇنادان ارىلۋ قاجەتتىگىن ەستەرىنە سالامىن. سەندەر 30 جىل بويى ۇندەمەي كەلدىڭدەر; مۇمكىن بىرەۋلەرىڭ «زامان سولاي ەدى» دەپ، ىشتەي اقتالاتىن دا شىعارسىڭدار، ال ەندى بىرەۋلەرىڭ ء«بىز باسشىمىزدىڭ ايتقانىن ىستەدىك قوي» دەپ، سۇتتەن – اق، سۋدەن – تازا بولعىلارىڭ كەلەر. مەن ۇندەمەگەندەردەن قورقامىن.

مەن سول سوزدەردىڭ كەلەشەكتە قايتا ايتىلۋىنان قورقامىن... نيۋرنبەرگ سوتىندا دا، فاشيستىك جەندەتتەر بارلىعىن گيتلەرگە جاۋىپ، ء«بىز بۇيرىقتى ورىنداۋشىلار عانامىز» دەپ قۇتىلعىسى كەلدى. ەستەرىڭدە بولسىن، ادىلەتسىز بۇيرىقتى ورىنداۋشىلار دا سول بۇيرىقتى بەرگەن جاندارمەن بىردەي جاۋاپ بەرەدى. ەگەر سەندەر سول ۋاقىتتاعى جاساعان ءىس-ارەكەتتەرىڭە وزدەرىڭ باعا بەرىپ، ار-ۇياتتارىڭنىڭ الدىندا جاۋاپ بەرمەسەڭدەر، قوعامداعى اشۋ-ىزا مەن بيلىككە دەگەن سەنىمسىزدىك ىدىرامايدى.

سەندەردىڭ ارىلۋلارىڭنىڭ العاشقى قادامى – سول ۋاقىتتاعى العان ماراپاتتارىڭدى قايتىپ تاپسىرۋ اكتسياسى بولسىن. وسى كۇنگە دەيىن جەلتوقسان كوتەرىلىسىنە قاتىسقان ازاماتتاردى جازالعان، سول ءۇشىن مەملەكەتتىك ماراپات العانداردىڭ رەسمي سانى – 4169 ادام. ولار مىنالار:

«كراسنايا زۆەزدا» وردەنىمەن ماراپاتتالعاندار – 5;

 «زا ترۋدوۆۋيۋ دوبلەست» مەدالىمەن ماراتتالعاندار – 6:

«زا ترۋدوۆۋيۋ وتليچيە» مەدالىمەن ماراپاتتالعاندار – 5;

«زا وتليچنۋيۋ سلۋجبۋ پو وحرانە وبششەستۆەننوگو پوريادكا» مەدالىمەن

ماراپاتتالعاندار – 160;

جوعارعى كەڭەستىڭ قۇرمەت گراموتاسىمەن  ماراپاتتالعاندار – 30;

قازاق سسر-ءىنىڭ جوعارعى كەڭەسىنىڭ گراموتاسىمەن ماراپاتتالعاندار – 113;

«زاسلۋجنىي رابوتنيك مۆد» بەلگىسىمەن ماراپاتتالعاندار – 23;

مەرزىمەن بۇرىن شەندەرى وسىرىلگەندەر – 24;

«زا وتليچنۋيۋ سلۋجبۋ مۆد» بەلگىسىمەن ماراپاتتالعاندار – 217;

سسسر-ءدىڭ ىشكى ىستەر مينيسترلىگىنىڭ قۇرمەت گراموتاسىمەن ماراپاتتالعاندار – 45;

قازاق سسر-ءىنىڭ ىشكى ىستەر مينيسترلىگىنىڭ قۇرمەت گراموتاسىمەن ماراپاتتالعاندار – 335;

اقشالاي سىيلىقپەن (سسسر ىشكى ىستەر مينيسترلىگىنىڭ بۇيرىعىمەن) – 53;

اقشالاي سىيلىق (قازاق سسر ىشكى ىستەر مينيسترلىگىنىڭ بۇيرىعىمەن) – 561;

«وتليچنيك ميليتسي» بەلگىسىمەن ماراپاتتالعاندار – 424;

بۇرىنعى جازلارىن الىنىپ استالعاندار – 13;

سسسر ىشكى ىستەر مينيسترلىگى بۇيرىعىمەن ماداقتالعاندار – 145;

قاز سسر ىشكى ىستەر مينيسترلىگىنىڭ بۇيرىعىمەن ماداقتالعاندار – 2005.

ولاردىڭ ىشىندە ماراپاتتارىن قايتىپ بەرگەندەردىڭ سانى – 37 عانا...

«قراسنايا زۆەزدا» وردەنى – 1;

«زا ترۋدوۆۋيۋ دوبلەست» مەدالى – 1;

«زا وتليچنۋيۋ سلۋجبۋ پو وحرانە وبششەستۆەننوگو پوريادكا» مەدالى – 23;

قازاق سسر-ءىنىڭ جوعارعى كەڭەسىنىڭ قۇرمەت گراموتاسى – 2;

قازاق سسر-ءىنىڭ جوعارعى كەڭەسىنىڭ گراموتاسى – 10.

(بۇل دەرەكتەر «جەلتوقسان-86» قۇجاتتار جيناعىنىڭ 10-تومىنان الىندى)

بۇل ۇندەۋ سەندەردى ماسقارالاۋ ءۇشىن نەمەسە جاۋاپقا تارتىپ، كەك الۋ ءۇشىن جازىلىپ وتىرعان جوق. ارىلۋ – وسىنداي ادىلەتسىزدىكتىڭ بولاشاقتا قايتالانباۋىنىڭ بىردەن ءبىر كەپىلى.

دوس كوشىم

Abai.kz