بۇگىن وڭتۇستىك قازاقستان وبلىسىندا «Ontustik Tourism-2016» تۋريستىك فورۋمى ءوز جۇمىسىن باستادى.

حالىقارالىق شاراعا كۋۆەيت، ماكەدونيا، يسپانيا، پاكىستان، موڭعوليا، وڭتۇستىك كورەيا، چەحيا ەلدەرىنىڭ قازاقستان رەسپۋبليكاسىنداعى ەلشىلەرى مەن كونسۋلدارى، شەت ەلدىك جانە قازاقستاندىق تۋريستىك وپەراتورلار، جوعارى وقۋ ورىندارى مەن 10 شاقتى شەت ەلدىك باق وكىلدەرى، ونىڭ ىشىندە ۇلىبريتانيانىڭ «US Television»، يسپانيانىڭ «EFE» اقپاراتتىق اگەنتتىگى، سونىمەن بىرگە، ەلىمىزدىڭ وزگە وبلىستارىنان كەلگەن دەلەگاتسيالار دا قاتىسۋدا.

ەلىمىزدەگى ءتۋريزمدى دامىتۋدىڭ 2020 جىلعا دەيىنگى تۇجىرىمداماسىنا سايكەس، «وڭتۇستىك قازاقستان - ۇلى جىبەك جولىنىڭ جۇرەگى» رەتىندە دامىتۋدى پوزيتسيالاۋ ماقساتىندا وتكىزىلىپ جاتقان ەكى كۇندىك شارادا بيزنەس-كونفەرەنتسيالار وتكىزىلىپ، «Silk Way Tourism Fair» تۋريستىك كورمەسى مەن وبلىس بويىنشا اقپاراتتىق تۋرلار ۇيىمداستىرىلاتىن بولادى.

وسىنىڭ اياسىندا، سارىاعاش جاڭا كۋرورت قالاشىعىن دامىتۋ، جول بويى قىزمەت كورسەتۋ نىساندارىن سالۋ، تۋريزم مەكتەبىن قۇرۋ جانە وڭتۇستىك وڭىرىنە ينۆەستيتسيا تارتۋ باعىتىندا 7 مەموراندۋمعا قول قويۋ جوسپارلانىپ وتىر.

وقو اكىمىنىڭ ءباسپاسوز قىزمەتى