قازاقستان رەسپۋبليكاسى ءدىن ىستەرى جانە ازاماتتىق قوعام مينيسترلىگى ءدىن ىستەرى كوميتەتى بىرقاتار باق بەتتەرىندە ەلىمىزدەگى مەشىتتەردە رەسمي ۋاعىزداردان كەيىن قوسىمشا تۇردە ونىڭ ورىس تىلىندە تۇسىنىكتەمەسى ايتىلۋى قاجەت دەگەن ماسەلە توڭىرەگىندە تۋىنداعان تالقىلاۋلارعا قاتىستى تۇسىندىرمە بەرۋدى قاجەت دەپ ەسەپتەيدى. 

قازاقستان رەسپۋبليكاسى پارلامەنتى ماجىلىسىندە وتكەن ەكسترەميزم مەن تەرروريزمنىڭ الدىن الۋ ماسەلەلەرىنە ارنالعان دوڭگەلەك ۇستەلدە جەكەلەگەن مەشىتتەردە ۋاعىزداردان كەيىن يمامداردىڭ ورىس ءتىلىن پايدالانۋى تۋرالى ماسەلە مينيسترلىك تاراپىنان ەمەس، وسى شاراعا قاتىسۋشىلاردىڭ بىرىمەن كوتەرىلگەن بولاتىن. سايكەسىنشە، قر ءدىن ىستەرى جانە ازاماتتىق قوعام مينيسترى اتالعان ىس-شارا بارىسىندا وسى ماسەلە توڭىرەگىندە جۋرناليستەر تاراپىنان سۇراقتار قويىلعاننان ءسوڭ بىرشاما تۇسىنىكتەمە بەرگەن بولاتىن. 

مينيسترلىككە يسلامعا قىزىعۋشىلىق تانىتىپ جۇرگەن بىرقاتار ءدىندارلاردىڭ مەشىت يمامدارىنىڭ ۋاعىزدارىن تولىق تۇسىنبەيتىنى تۋرالى ەل ازاماتتارىنان وتىنىشتەر ءتۇسىپ وتىرادى. وتىنىشتەردە سونداي ءدىندارلاردىڭ وسى سەبەپتى يسلام تۋرالى اقپاراتتى قازاقستان مۇسىلماندارى ءدىني باسقارماسىنىڭ رەسمي كوزدەرىنەن تىس جەرلەردەن، ونىڭ ىشىندە تەرىس ءدىني اعىمداردىڭ ۇستانۋشىلارىنان الۋعا ماجبۇرلىك تانىتاتىنى تۋرالى ايتىلادى. سايكەسىنشە، ءوتىنىش جاساۋشى ازاماتتار حالىقارالىق تاجىريبەنى ەسكەرە وتىرىپ مەشىت يمامدارى رەسمي ۋاعىزداردان كەيىن قازاق ءتىلىن ايتارلىقتاي مەڭگەرمەگەن ازاماتتار ءۇشىن ورىس تىلىندە تۇسىندىرمە بەرۋدى ۇسىنادى. 

وسى رەتتە، اتالعان ماسەلە تۇرعىندارىنىڭ قۇرامى كوپتەگەن ۇلتتاردان تۇراتىن ەلدىمەكەندەردەگى جەكەلەگەن مەشىتتەرگە عانا قاتىستى ەكەندىگىن ايتا كەتۋىمىز كەرەك. 

مينيسترلىك،ء وز كەزەگىندە، ازاماتتاردان ءتۇسىپ وتىرعان كەز-كەلگەن وتىنىشتەردى قاراستىرۋعا جانە ولاردى تالداپ وتىرۋعا مىندەتتى. وسى ورايدا مينيسترلىك قۇزىرەتىنە قازاقستان مۇسىلماندارى ءدىني باسقارماسىنىڭ ىشكى ماسەلەلەرىنىڭ شەشىمىن تابۋ كىرمەيتىنىن ايتا كەتكىمىز كەلەدى. سوندىقتان جوعارىدا اتالىپ وتىرعان ماسەلە بويىنشا مەشىتتەرگە كەلۋشىلەردىڭ پىكىرلەرىن ەسكەرە وتىرىپ شەشىم قابىلداۋى ءتيىس قازاقستان مۇسىلماندارى ءدىني باسقارماسىنا حابارلاسۋدى ۇسىنامىز. 

قر دىن ىستەرى جانە ازاماتتىق قوعام مينيسترلىگى دىن ىستەرى كوميتەتى ەلىمىزدىڭ كونستيتۋتسياسىندا كەپىلدىك بەرىلگەن ءسوز بوستاندىعىنا قۇرمەتپەن قاراي وتىرىپ، وتاندىق بۇقارالىق اقپارات قۇرالدارىن ءدىن تارىزدى وتكىر سالادا تۋىنداپ وتىراتىن ماسەلەلەر تۋرالى ەكىۇداي اقپارات بەرۋگە جول بەرمەۋگە جانە تۇرعىندارعا شىنايى اقپاراتتى دۇرىس جەتكىزۋگە شاقىرادى.  

قر ءدىن ىستەرى جانە ازاماتتىق قوعام مينيسترلىگى 

ءدىن ىستەرى كوميتەتىنىڭ ءباسپاسوز قىزمەتى 

Abai.kz