وڭتۇستىك قازاقستان وبلىسى بويىنشا رەسپۋبليكالىق ماڭىزى بار اۆتوموبيل جولدارىنىڭ جالپى ۇزىندىعى – 846 شاقىرىمدى قۇرايدى. ونىڭ 420 شاقىرىمى «باتىس ەۋروپا-باتىس قىتاي» ترانزيتتىك ءدالىزى. بۇگىندە بۇل حالىقارالىق جولدىڭ 236 شاقىرىمى پايدالانۋعا بەرىلگەن. بۇل تۋرالى بۇگىن ايماقتىق كوممۋنيكاتسيالار قىزمەتىندە وتكەن بريفينگتە «قازاۆتوجول» ۇلتتىق كومپانياسى اق وقو بويىنشا فيليالىنىڭ باسشىسى م.دۇيسەمبەكوۆ ءمالىم ەتتى.

ونىڭ ايتۋىنشا، ترانزيتتىك ءدالىزدىڭ 184 شاقىرىمىندا قايتا قۇرۋ جۇمىستارى اتقارىلىپ جاتىر. ونىڭ ءار شاقىرىمىنا مەملەكەتتىك بيۋدجەتتەن 500 ملن. تەڭگە قارجى جۇمسالۋدا. اعىمداعى جوندەۋلەر اقاۋلاردى بولشەكتەپ جويۋ بويىنشا جۇرگىزىلسە،  ورتاشا جوندەۋ  جول جامىلعىسىنىڭ توزۋ قاباتى مەن تۇزۋلىگىن قالپىنا كەلتىرۋ ارقىلى ىسكە اسىپ وتىر.  مەردىگەر مەكەمەلەر ول ءۇشىن مەملەكەتتىك ساتىپ الۋ زاڭىنا سايكەس، اشىق كونكۋرسقا قاتىسىپ، جەڭىمپاز رەتىندە تانىلعان. رەسپۋبليكالىق ماڭىزى بار «جىزاق-قىزىلاسكەر-اباي-سارىاعاش-جىبەك جولىنىڭ» 175-ءشى 190-شى شاقىرىمدارىن جوندەۋ جۇمىستارى قازان ايىندا اياقتالۋى ءتيىس.

بريفينگتە كۇردەلى جوندەۋ جۇمىستارىنا توقتالعان سپيكەر جولدىڭ جوندەلۋى ارالىعىن ەسەپكە الۋ جانە  دياگنوستيكا وتكىزۋ ارقىلى بەلگىلەنەتىنىن اتاپ ءوتتى.

سونىمەن قاتار، ول سوڭعى جىلدارى ينوۆاتسيالىق تەحنولوگيالاردى ەڭدىرۋ ماقساتىندا ورتاشا جوندەۋ جۇمىستارىن جۇرگىزۋ كەزىندە ءداستۇرلى (كەدىر – بۇدىرلى جامىلعىسىن توسەۋ) جانە قاباتتى تەگىستەۋ قۇرىلعىسىنىڭ ورنىنا قولدانىستاعى جابىندىنى تۇراقتاندىرعىش قوسۋ ارقىلى رەكسايلينگ ءادىسى قولدانىلىپ جاتقانىندا اتاپ ءوتتى.

وقو اكىمىنىڭ ءباسپاسوز قىزمەتى 

Abai.kz