قازاقستاندا ەلىمىزدىڭ الەمگە تانىمالدىلىعىن ارتتىرۋ ءتۇسۋ ماقساتىندا «پاراساتتى ەل» ارنايى موبيلدىك قوسىمشاسى ازىرلەندى. قوسىمشانىڭ دۇنيە ءجۇزىنىڭ كەز كەلگەن بۇرىشىنداعى جان ءۇشىن قولجەتىمدى بولۋى كوزدەلگەن.

كەز كەلگەن جاستاعى ادامعا ارنالعان حالىقارالىق زياتكەرلىك ۆيكتورينا تۇرىندە ازىرلەنگەن قوسىمشا وتانداستارىمىزدىڭ الەم ەلدەرى تۋرالى بىلىمدەرىن جەتىلدىرۋگە، ال شەتەلدىكتەردى قازاقستانمەن بارىنشا تانىستىرۋعا مۇمكىندىك بەرمەك. ماسەلەن، قوسىمشانى گەرمانيا تۇرعىنى ءوزىنىڭ ۇيالى تەلەفونىنا جۇكتەپ السا، ول كەزدەيسوق وسى قوسىمشانى جۇكتەپ العان قازاقستاندىق ازاماتپەن ءتۇيىسۋى مۇمكىن. ويىندا ءۇش تۋر قاراستىرىلعان: ءبىرىنشى تۋردا – گەرمانياداعى ازاماتقا قازاقستان تۋرالى، ال قازاقستاندىق ازاماتقا گەرمانيا تۋرالى سۇراقتار قويىلادى.  ال ەكىنشى تۋردا الەمگە ورتاق جايتتارعا قاتىستى ساۋالدار قويىلسا، ءۇشىنشى تۋردا كەزدەيسوق ءۇشىنشى ءبىر ەل تۋرالى سۇراقتار بولماق. قوسىمشاداعى ويىن جەڭىسكە قول جەتكىزگەن ءاربىر ادام ۇپايلار جيناۋ ارقىلى ءوز ەلىنىڭ رەيتينگىن الەمدىك زياتكەرلىك دەڭگەيدە كوتەرۋگە مۇمكىندىك الاتىنداي ەتىپ قۇرىلعان.

«بۇل قوسىمشانى ازىرلەۋىمىزگە باسقا ەلدەردىڭ حالقىن قازاقستاننىڭ تاريحىمەن، اسا قۇندى كوپۇلتتى مادەنيەتىمەن، تاۋەلسىزدىك جىلدارى قول جەتكىزگەن جەتىستىكتەرىمەن، ەلىمىزدىڭ اسا كورىكتى جەرلەرىمەن تانىستىرساق دەگەن نيەتىمىز تۇرتكى بولدى»، - دەيدى موبيلدىك قوسىمشانى ازىرلەۋشىلەردىڭ ءبىرى تالعات تايىموۆ.

اتالعان قوسىمشا كەلەسى جىلدىڭ باسىندا IOS جانە Android وپەراتسيالىق جۇيەلەرىندە كوپشىلىك ءۇشىن قولجەتىمدى بولماق. 

Abai.kz