ەل تاۋەلسىزدىگىنىڭ 25 جىلدىعىن مەرەكەلەۋ اياسىندا مەملەكەت باسشىسى نۇرسۇلتان نازارباەۆتىڭ قاتىسۋىمەن رەسپۋبليكا كولەمىندە «جاڭا يندۋستريالاندىرۋ» تەلەكوپىرى وتتى.

جالپى ۇلتتىق تەلەكوپىر بارىسىندا وڭتۇستىك قازاقستان وبلىسىندا «KARLSKRONA LC AB» جشس-ءنىڭ بولات قۇيۋ ءوندىرىسى بويىنشا سالىنعان ونەركاسىپ ورنى ىسكە قوسىلدى.

ەلباسىمەن تىكەلەي بايلانىسقا شىققان «KARLSKRONA LC AB» جشس-ءى ديرەكتورىنىڭ ورىنباسارى ءا.ۇسەنباەۆ كاسىپورىننىڭ جۇمىسىن باياندادى.

– اسا مارتەبەلى نۇرسۇلتان ءابىشۇلى! سۋ سورعىلارى جابدىقتارىن شىعاراتىن زاۋىتىمىز سىزگە جاقسى تانىس. «جاڭا يندۋستريالاندىرۋ» باعدارلاماڭىزدى قولداۋ ماقساتىندا، ءونىمدى ەلدە بارىنشا شوعىرلاندىرۋ ءۇشىن بولات قۇيۋ ءوندىرىسى ۇيىمداستىرىلدى. جاڭا زاۋىت ارقىلى الىس جانە جاقىن شەت ەلدەرگە ەكسپورت كولەمىن 40 پايىزعا ارتتىرامىز. قازىر كاسىپورىنداعى جاڭا ءوندىرىسىمىز ىسكە قوسىلۋعا دايىن. قۇرمەتتى ەلباسى! ەلىمىز تاۋەلسىزدىك العالى بەرى ءسىز جاستاردى قولداپ كەلەسىز. تاۋەلسىزدىك اياسىندا ەلىمىز نىق اياققا تۇرىپ، كەلەشەك ۇرپاق ءۇشىن تولىققاندى مەملەكەت قۇردىڭىز! مىنە، سونىڭ ارقاسىندا وسى زاۋىتتا 58 جاس مامان جۇمىس جاساۋدا. اراسىندا «بولاشاق» باعدارلاماسىمەن ءبىلىم العاندار دا بار. سىزگە ءوزىمىزدىڭ العىسىمىزدى بىلدىرە وتىرىپ، تاۋەلسىزدىكتىڭ 25 جىلدىعىمەن شىن جۇرەكتەن قۇتتىقتايمىز! اسا قادىرمەندى ەلباسى! ءوندىرىستى ىسكە قوسۋعا رۇقسات ەتىڭىز، - دەدى  ءا.ۇسەنباەۆ.

مەملەكەتتىك قولداۋعا يە بولعان كاسىپورىن –  ماشينا جاساۋ سالاسىندا الدىڭعى قاتاردا. كومپانيا ورتالىق ازيادا تەڭدەسى جوق زاماناۋي تەحنولوگيامەن جابدىقتالعان.

بادام يندۋستريالدى ايماعىندا ورنالاسقان كاسىپورىننىڭ جوبالىق قۇنى 2 ملرد تەڭگەنى قۇرايدى. زاۋىت جىلىنا 3700 توننا ءونىم شىعارۋعا قاۋقارلى. ءوندىرىس ورنىندا 75 ادام جۇمىسپەن قامتىلعان. ىشكى نارىقتىڭ 60 پايىزىن قۇرايتىن كاسىپورىن، وزبەكستان، قىرعىزستان، تاجىكستان، اۋعانستان جانە بەلورۋسسيا سەكىلدى ەلدەرگە ءونىمىن ەكسپورتقا شىعارۋدى جوسپارعا قويعان.

مەملەكەتتىك «جاڭا يندۋستريالاندىرۋ» باعدارلاماسى اياسىندا ىسكە قوسىلعان زاۋىتتا شويىن مەن بولاتتان اۋىل شارۋاشىلىعى تەحنيكالارىن، ماشينا جاساۋعا قاجەتتى جابدىقتار جاسالماق. سونداي-اق، زاۋىتتا ازىرلەنگەن بولشەكتەردەن جەر استى سۋى، شايمالاۋ ءادىسى ارقىلى ۋران جانە وزگە دە سۇيىقتىقتى سورىپ الۋعا لايىقتالعان سورعىلار قۇراستىرىلادى. بۇگىنگى تاڭدا وندىرىلگەن ونىمدەردى وتكىزۋ بويىنشا زاۋىت جەتەكشىلىگى بەلورۋسسيامەن كەلىسىم-شارت جاساپ قويعان. وسىلايشا، نارىقتا «KARLSKRONA LC AB» جشس اتاۋىمەن بەلگىلى سەرىكتەستىكتىڭ بۇل ءۇشىنشى ءوندىرىس ورنى دەۋگە بولادى.

وڭتۇستىك قازاقستان وبلىسىندا يندۋستريالىق-يننوۆاتسيالىق دامۋ مەملەكەتتىك باعدارلاماسىن جۇزەگە اسىرۋ بويىنشا 2010 جىلدان بەرى 145 جوبا ىسكە قوسىلعان. وندا بىلتىرعا دەيىن 180 ملرد. تەڭگەنىڭ ءونىمى شىعارىلدى. قۇنى 225 ملرد. تەڭگە بولاتىن جوبالاردى جۇزەگە اسىرۋ ناتيجەسىندە 13 مىڭعا جۋىق جۇمىس ورنى قۇرىلىپ وتىر.

جالپى ۇلتتىق تەلەكوپىر شاراسىنا قاتىسقان وبلىس اكىمى جانسەيىت تۇيمەباەۆ جاڭادان ىسكە قوسىلعان كاسىپورىننىڭ ەڭبەك ۇجىمىمەن كەزدەسىپ، زاۋىتتىڭ الداعى وندىرىستىك دامۋ جوسپارىن تالقىلادى. جۇمىسشىلارمەن بولعان سۇقبات بارىسىندا ايماق باسشىسى زاۋىتتا شىعارىلاتىن ونىمدەردىڭ ساپالى جانە  حالىقارالىق باسەكەگە قابىلەتتى بولۋى قاجەتتىگىنە توقتالدى.  

Abai.kz