ەل تاۋەلسىزدىگىنىڭ 25 جىلدىعى قۇرمەتىنە شاردارادا جاڭادان بوي كوتەرگەن سپورت كەشەنى سالتاناتتى تۇردە اشىلىپ، پايدالانۋعا بەرىلدى. نىساننىڭ اشىلۋ سالتاناتىندا ءسوز سويلەگەن اۋدان اكىمىنىڭ مىندەتىن اتقارۋشى تۇرسىنقۇل بايتۇرعانوۆ بارشا شاردارالىق تۇرعىندى مەرەيلى مەرەكەمەن قۇتتىقتاپ، زاماناۋي ۇلگىدەگى سپورت كەشەنىنىڭ ەل يگىلىگى ءۇشىن جۇمىس ىستەۋىنە تىلەكتەس ەكەنىن جەتكىزدى.

جاڭا عيماراتتا №2 اۋداندىق بالالار مەن جاسوسپىرىمدەر سپورت مەكتەبى ورنالاسىپ، جۇمىس جۇرگىزەدى. مۇندا بوكس، قازاق كۇرەسى، دزيۋ-دو، گرەك-ريم كۇرەسى، ەركىن كۇرەس، تاەكۆون-دو، جەڭىل اتلەتيكا، فۋتبول جانە شاحمات سپورت تۇرلەرى بويىنشا 1200 جاس سپورتپەن جاتتىقپاق. سپورت كەشەنىنىڭ عيماراتىندا وبلىستىق دەڭگەيدەن باستاپ، رەسپۋبليكالىق جانە حالىقارالىق دەڭگەيدەگى جارىستار ۇيىمداستىرىلاتىن بولماق.

رەسمي تۇردە پايدالانۋعا بەرىلگەن جاڭا سپورت كەشەنىندە وسى كۇنى العاشقى ويىندار باستالىپ كەتتى. اۋداندىق دەنە شىنىقتىرۋ جانە سپورت ءبولىمىنىڭ ۇيىمداستىرۋىمەن جاسوسپىرىمدەر اراسىندا قازاق كۇرەسىنەن وڭتۇستىك قزاقستان وبلىسىنىڭ كۋبوگى ءۇشىن تۋرنير ۇيىمداستىرىلىپ، وعان شىمكەنت قالاسى مەن باسقا دا اۋدانداردان جاس پالۋاندار كەلىپ قاتىستى. تارتىستى وتكەن پالۋاندار سايىسىندا شاردارا اۋدانىنىڭ سپورتشىلارى كوماندالىق ەسەپ بويىنشا ءبىرىنشى ورىندى جەڭىپ الدى. ال، ەكىنشى ورىندى تۇركىستان قالاسىنىڭ جاس پالۋاندارى ەنشىلەسە، ءىىى ورىندى شىمكەنت قالاسىنان كەلگەن سپورتشىلار يەلەندى.

جەڭىمپازدار سىي-سياپاتپەن ماراپاتتالىپ، ءى ورىنعا 300 مىڭ، ءىى ورىنعا 200 مىڭ، ءىىى ورىنعا 100 مىڭ تەڭگە جۇلدە تاپسىرىلدى.

Abai.kz