ادۆوكاتتار اندرەي پەتروۆ پەن مادينا باكيەۆا سوت تەرگەۋىن قايتا باستاۋدى، كۋاگەرلەردەن قايتادان جاۋاپ الۋدى، سوت ماتەريالدارىنان بىرنەشە ساراپتامانىڭ قورىتىندىسىن شىعارىپ، ولاردى دالەل بولا المايدى دەپ تانۋدى سۇرادى. ادۆوكاتتار العاشقى سوت ينستانتسياسىندا ءىس جان-جاقتى جانە تولىق قارالماعانىن، سوت پروتسەسسۋالدىق تۇرعىدان ورەسكەل قاتەلىكتەر جىبەردى دەپ سانايتىندارىن مالىمدەدى. ماتاەۆتاردىڭ ادۆوكاتتارى دۇنيە-مۇلىكتى تاركىلەۋ تۋرالى سوت شەشىمىمەن كەلىسپەيتىنىن، ۇكىمدە اتالعان جىلجىمايتىن مۇلىكتەردىڭ كەيبىرى سەيىتقازى ماتاەۆتىڭ جۇبايى بايان رامازانوۆانىڭ مەنشىگىندە ەكەنىن ايتتى.

اپەللياتسيالىق شاعىم قارالىپ جاتقان سوتقا قاماۋداعى ماتاەۆتار قاتىستىرىلعان جوق. سوتتا ولاردىڭ مۇددەسىن ادۆوكاتتارى مەن قوعامدىق قورعاۋشىلارى قورعاپ جاتىر.

ايىپتاۋشى پروكۋراتۋرا وكىلدەرى بۇگىن سوتتان ادۆوكاتتاردىڭ تالاپ-ارىزدارىن قاناعاتتاندىرماۋدى سۇرادى. پروكۋرورلار العاشقى سوت ينستانتسياسىندا ىسكە قاتىستى بارلىق دالەل-ايعاقتاردىڭ دۇرىستىعى زەرتتەلگەنىن، ماتاەۆتارعا شىققان ۇكىمنىڭ زاڭدى ەكەنىن ايتتى.

3 قازاندا استانانىڭ ەسىل اۋداندىق سوتى ۇلتتىق ءباسپاسوز كلۋبىنىڭ جەتەكشىسى سەيىتقازى ماتاەۆتى "قارجى جىمقىردى" جانە سالىقتان جالتاردى" دەگەن ايىپتارمەن 6 جىلعا سوتتاعان. ال قازتاگ اگەنتتىگىنىڭ ديرەكتورى اسەت ماتاەۆ "قارجى جىمقىردى" دەگەن ايىپپەن بەس جىلعا سوتتالعان. ۇكىم بويىنشا ماتاەۆتار اقپارات جانە كوممۋنيكاتسيا مينيسترلىگىنە - 169 ميلليون تەڭگە، "قازاقتەلەكوم" كومپانياسىنا 140 ميلليون تەڭگە قايتارۋى ءتيىس بولدى. بۇدان وزگە، ۇكىمدە ماتاەۆتاردىڭ جىلجىمايتىن مۇلىكتەرى (بىرنەشە پاتەر مەن جەر تەلىمدەرى), ونىڭ ىشىندە ۇلتتىق ءباسپاسوز كلۋبى مەن بىرنەشە كولىكتەرى تاركىلەنەتىنى ايتىلدى.

بۇعان دەيىن ەقىۇ، اقش-تىڭ قازاقستانداعى ەلشىلىگى، حالىقارالىق جۋرناليستەر فەدەراتسياسى (IFJ) ماتاەۆتاردىڭ سوتتالۋىن ايىپتاپ، قازاقستان ۇكىمەتىن بارلىق ازاماتتىڭ وي-پىكىر ەركىندىگىن ءبىلدىرۋ قۇقىعى مەن زاڭدى تۇرعىدان قورعانۋ قۇقىعىن قۇرمەتتەۋگە شاقىرعان.

ايتپاقشى، تاۋەلسىزدىكتىڭ 25 جىلدىعىنا وراي جاسالۋى مۇمكىن راقىمشىلىققا ماتاەۆتاردىڭ ءىسى دە ءىلىنۋى ىقتيمال دەپ كۇتكەن قوعام بەلسەندىلەرىنىڭ ءۇمىتى اقتالمادى. ماتاەۆتارعا بايلانىستى سوت ۇكىمى قايتا قارالعانىمەن، كەشىرىم جاسالمايتىن بولدى. سونداي-اق، جەردىڭ جالعا بەرىلۋى مەن جەكەمەنشىككە ساتىلۋىنا قارسى ميتينگتتەر ۇيىمداستىرعان ماقسات بوقاەۆ پەن تالعات ايانعا دا راحىمشىلىق جاسالمايتىنى انىقتالدى. ەكس-پرەمەر سەرىك احمەتوۆتىڭ دە ءىسى راقىمشىلىققا ىلىنبەي قالدى.

Abai.kz