وڭتۇستىك قازاقستان وبلىسىندا قىسقى ەگىن ەگۋ ماۋسىمى اياقتالۋعا جاقىن. بيىل جەرگىلىكتى شارۋالار 180 مىڭ گەكتاردان استام القاپقا قىستىق بيداي ەگىپ جاتىر. بۇل – وتكەن جىلدارمەن سالىستىرعاندا كوپ كورسەتكىش. سوندىقتان شارۋا قوجالىقتارى قار تۇسكەنشە ەگىن ەگۋ جۇمىستارىن تولىق اياقتاماق.

اۋا رايى قايتا جىلىنىسىمەن قازىعۇرت اۋدانىنىڭ شارۋالارى قىسقى ەگىن تۇقىمىن سەبۋگە كىرىستى. ۋاقىتتى ءتيىمدى پايدالانۋ ءۇشىن ولار تۇسكى استى كولىكتە كەلە جاتىپ ىشسە، كەشكى تاماقتى ەگىن القابى باسىنداعى قوستا ىشۋگە كوشكەن. ويتكەنى كۇزگى جىلىمىقتىڭ ءاربىر كۇنى ساناۋلى. تۇقىم كەش سەبىلسە، ەگىن كەلەر جىلى بىتىك شىقپاۋى مۇمكىن. ەگىنشى ساپار ساتىبالديەۆ ەڭبەك جولىن 30 جىل بۇرىن شاعىن عانا شارۋاشىلىقتان باستاعان. قازىر ونىڭ 1,5 مىڭ گەكتەر جەرى بار. ازىرگە ەسكى تەحنيكالارمەن جۇمىس ىستەپ جاتقانىمەن، ەگىن بىتىك شىعۋى ءۇشىن تۇقىمنىڭ ەڭ جاقسى سۇرىپتارىن تاڭدايدى. ويتكەنى شارۋالار اراسىندا نە ەكسەڭ، سونى وراسىڭ دەگەن ۇستانىم بار.

ساپار ساتىبالديەۆ، ەگىنشى: 

- جاڭا ۇرىقتى ەگىپ جاتىرمىز جاڭا تەحنولوگيا بويىنشا. ءبىر جارىم مىڭ گەكتار ەگىستىك جەرىم بار. سونى اۋىسپالى جۇيەلى ەگىسپەن ەگىپ جاتىرمىز. 300 گەكتار جوڭىشقا، 500 گەكتار بيداي، 300 گەكتار ماقسارى ەگەمىز كوكتەمگى. قازىر وبلىس اۋماعىنداعى بارلىق شارۋاشىلىق قاۋىرت جۇمىس كەستەسىنە كوشكەن. شارۋالار كۇندىز-ءتۇنى القاپ باسىندا تۇقىم سەۋىپ جاتىر.

ءسابيت السەيىتوۆ، قازىعۇرت اۋدانى اۋىل شارۋاشىلىعى جانە جەر قاتىناستارى ءبولىمىنىڭ باسشىسى: 

- اۋدان بويىنشا بيىلعى جىلعا استىقتان 35 مىڭ تاپسىرما بەرىلگەن. بۇگىنگە دەيىن 25 مىڭ گەكتارىن ەكتىك. ەگىستىڭ ءوزى قازاننىڭ 5-ىنە باستالعان. ەندى 10 مىڭ گەكتار قالدى، كۇن جىلى بولسا، ءبىز ءبارىن بىتىرەمىز. جالپى بيىلعى جاز شارۋالار ءۇشىن اسا تابىستى بولدى. سوڭعى 13 جىلدا ەگىنشىلەر تۇڭعىش رەت قىرمانعا 470 مىڭ توننادان استام استىق جينادى. 

اۋىل شارۋاشىلىعى ءونىمىن وندىرۋشىلەر قىستىق بيدايدان دا مول ءۇمىت كۇتىپ وتىر. بۇگىنگە دەيىن شارۋالار 130 مىڭ گەكتار القاپقا ەگىن سەۋىپ ۇلگەرگەن. الداعى ەكى اپتادا، كۇن اشىق بولسا، تۇقىم تولىق سەبىلىپ بولادى. «كەلەر جىلى دا قامباعا استىق تولادى دەگەن سەنىم مول»، - دەيدى ماماندار. 

Abai.kz