“ەڭبەك ەتسەڭ ەرىنبەي، تويادى قارنىڭ تىلەنبەي” دەپ ۇلى اباي ايتقانداي، نەسىبەسىن اۋىل شارۋاشىلىعىنان تەرگەندەردىڭ ماڭداي تەرى وتەۋىن بەرەكە، بايلىعىمەن كەلەتىن قوڭىر كۇز قايتارادى. اسىرەسە وڭتۇستىك قازاقستان وبلىسىندا كەڭىنەن اتالىپ وتەتىن "التىن كۇز" مەرەكەسىندە شارۋالاردىڭ ەسەلەنگەن ەڭبەگىنىڭ جەمىسىن كورۋگە بولادى. وڭتۇستىك قازاقستان وبلىسى اسىرەسە جارمەڭكە كەزىندە وزدەرىنىڭ بەرەكەلى ءوڭىر ەكەنىن كورسەتەدى.

استانا قالاسىندا وتكىزىلگەن وڭتۇستىك قازاقستان وبلىسىنىڭ استاناداعى كۇندەرىندە كەرۋەنمەن كەلگەن ۇلكەن جۇك ماشينالارى ازىق-تۇلىكتىڭ ەلۋدەن استام ءتۇرىن ۇسىنادى. قالا جۇرتى قىسقا دايىندىقتى وسى جارمەڭكەدە قام¬داپ الىپ جاتقانداي كورىنەدى. مۇندا استانالىقتارعا 300 توننادان استام اۋىل شارۋاشىلىعى ونىمدەرى نارىقتاعى باعادان 15-20 پايىزعا ارزان ساۋدالانۋدا.

بۇل جەرگىلىكتى تۇرعىندار ءۇشىن ۇلكەن قۋانىش. بيىل وڭتۇستىكتىك شارۋالاردىڭ ەلوردالىقتارعا الىپ كەلگەن اۋىل شارۋاشىلىق ونىمدەرىنىڭ جالپى قۇنى 100,8 ملن. تەڭگەنى قۇراعان. ەكى كۇنگە جالعاساتىن اۋىل شارۋاشىلىعى جارمەڭكەسىنە 50-دەن استام ءوڭىردىڭ تاۋار وندىرۋشىلەرى ساپالى ءارى بالعىن ونىمدەرىن تۇرعىندارعا ۇسىنعان.

استانالىقتارعا عانا ەمەس جالپى رەسپۋبليكا جۇرتشىلىعىنا وزىمىزدە وندىرىلگەن، تابيعي تازا ازىق تۇلىك ونىمدەرى كەلەشەكتە دە كۇنگەيدەگى شارۋالاردان جاقىن جەردەن جەتكىزىلىپ تۇرسا نۇر ۇستىنە نۇر بولار ەدى. ويتكەنى حالقىمىزدىڭ شەكارا اسىپ كەلگەن، ساپاسى بەلگىسىز ونىمدەردى تالعاجۋ ەتىپ قالاتىن كەزدەرى از ەمەس. جالپى كەڭ بايتاق جەرىمىزدە تۇلكىباستىڭ الماسى، شىعىستىڭ بالى، شيەلىنىڭ قاۋىنى، وڭتۇستىكتىڭ ءاربىر شارۋاشىلىق ءونىمى سول ءوڭىردىڭ اتىن شىعارار ءبىر ءبىر برەند ەكەنى بەلگىلى.

تەك سول ارتىقشىلىقتى پايدالانا الساق، ءوز ەلىمىزدىڭ ءونىمى رەسپۋبليكا جۇرتشىلىعىنىڭ كەز كەلگەن وڭىرىنە قولجەتىمدى قىلا الساق يگى. 

Abai.kz