ەلىمىزدە جىلىجايلار كولەمىنىڭ ازدىعى ءجيى ءسوز بولادى. ويتكەنى جىلىجايلار سانىن كوبەيتسەك، سىرتتان كەلەتىن جەمىس-جيدەك، كوكونىستەرگە تىيىم سالىپ قانا قويماي، ەلىمىزدى ارزان باعاداعى ونىمدەرمەن قامتاماسىز ەتۋگە دە مۇمكىندىك تۋار ەدى. وسى ورايدا ماقتارال ءوڭىرى جىلىجايلار سالۋعا دا كوڭىل ءبولىپ وتىرعانىن ايتا كەتۋگە بولادى. ماقتارال ءوڭىرى جىلىجايلار كولەمىن جىل سايىن ۇلعايتىپ، تۇرعىنداردى جىل ون ەكى اي كوكونىس، جەمىس جيدەك ونىمدەرىمەن قامتاماسىز ەتۋدى ماقسات ەتىپ وتىر.

ماسەلەن 2016 جىلدىڭ 1 قاڭتارىندا وسى وڭىردەگى جالپى جىلىجايلار كولەمى 79,64 گا قۇراعان. بيىلعى جىلى جىلىجايلار كولەمىن قوسىمشا 3,0 گا ۇلعايتۋ تاپسىرماسى بەرىلگەن بولسا، اعىمداعى جىلدىڭ 9 ايىندا 3,99 گا جەرگە جىلىجايلار قۇرىلعان (133,0 %). الداعى ۋاقىتتا ولاردىڭ سانىن ءالى دە بولسا ۇلعايتۋ جوسپارى تۇر. جالپى قازىرگى تاڭدا وبلىستا جىلىجاي ءىسىن دامىتۋ جۇمىستارى جاندانۋ ۇستىندە. اسىرەسە جىلىجاي كاسىبىن جەتىلدىرۋگە ءمان بەرىلۋدە. جىلىجاي كاسىبىن جەتىلدىرۋ جەرگىلىكتى حالىقتى قاۋىپسىز ازىق-تۇلىكپەن قامتاماسىز ەتۋگە مۇمكىندىك بەرەدى. 

ەلباسى تاپسىرماسىنا نەگىزدەلگەن قولداۋلارعا يە بولعان شارۋالار دا ءوز جۇمىستارىن ىنتامەن جۇرگىزۋدە. مەملەكەت تاراپىنان جاسالعان قولداۋ، كومەكتەردىڭ ناتيجەسىندە ايماقتا كاسىپكەرلىكپەن شۇعىلدانىپ، سونىڭ ىشىندە اۋىل شارۋاشىلىعى سالاسىمەن اينالىسۋعا نيەت بىلدىرۋشىلەر قاتارى ارتىپ كەلەدى. مۇنىڭ بارلىعى، وتاندىق ءونىم وندىرۋشىلەرگە جاسالعان جاعدايدىڭ ارقاسى ەكەنى داۋسىز. وتاندىق ءونىم وندىرۋشىلەر قاتارى ارتسا، وتاندىق ءونىمنىڭ دە مول بولاتىنى راس. سوندىقتان الداعى ۋاقىتتا وڭتۇستىك حالقى جىل ون ەكى اي ارزان، ءارى قاۋىپسىز ماقتارالدىق جىلىجاي ونىمدەرىمەن قامتاماسىز ەتىلەدى دەپ كۇتىلۋدە. 

Abai.kz