قازاقستان ەرەكشە دارىندى بالالارى كوپ ەلدەردىڭ قاتارىندا 12-ورىندا تۇر ەكەن. قۋاناتىن جايت پا؟ ارينە، قۋاناتىن جايت. قازاقتىڭ دارىندى ۇلىنىڭ ءبىرى بۇل كۇندە ەسىم-سويى جۇرتقا كەڭىنەن تاراعان  جامبىل دۇيسەنوۆ بولسا كەرەك. ول 2003 جىلى الماتى قالاسىندا دۇنيەگە كەلگەن. التى جاسىندا ب.مومىشۇلى اتىنداعى 131 مەكتەپ-ليتسەيىنە وقۋعا بارىپ، 1 جىلدا 1-ءشى جانە 2-ءشى سىنىپتى بىردەن اياقتادى. ال 3 سىنىپ وقىپ جۇرگەن كەزىندە، ەل تاۋەلسىزدىگىنىڭ 20 جىلدىق مەرەيتويىنا جانە جامبىل جاباەۆتىڭ تۋعان كۇنىنە ارناپ، جامبىل اتىنداعى مەملەكەتتىك فيلارمونيادا ءوزىنىڭ جەكە شىعارماشىلىق كەشىن وتكىزدى. استانا قالاسىنىڭ تۇرعىندارىنا ارنالعان جىر كەشى دە ەلدىڭ ەسىندە. وسىلايشا ول قازاقستاننىڭ "گيننەس" رەكوردتار كىتابىنا قازاقستان بويىنشا ەڭ جاس اقىن بولىپ ەندى. جاس اقىننىڭ ەلىنە دەگەن، وتانىنا دەگەن ماحابباتىنان تۋعان جىرلارى بارشا قازاق حالقىن تەبىرەنتتى. بالا جۇرەكتەن شىققان سوزدەردىڭ جالىندى ءارى جاندى كەلۋى ءبىراز اقىنداردى تاڭ قالدىردى. جاس جامبىل ءوزىن بالامىن دەپ ەسەپتەمەدى. وسىنىڭ ارقاسىندا ول  ج.جاباەۆ، ب.مومىشۇلى، م.ماقاتاەۆ، د.ا.قوناەۆ، بوتپاي باتىر سىندى ء توس بەلگىلەرىن  يەلەندى. جوعارىدا اتاپ كەتكەن تۋما دارىن يەسى مىنە وسى ەدى. جامبىل جىرلارىندا وتە اۋقىمدى دۇنيەلەردى قوزعاپ، ماڭىزدى ماسەلەلەردى كوتەرىپ، ەلىنە دەگەن ىستىق سەزىمىن جاۋدىرىپ وتىرادى.

         جامبىلدىڭ 2010 جىلى "تاۋەلسىزدىگىم-تاڭىردەن كەلگەن ءتاتتى سىي" اتتى اۋديوجازبا كىتابى 2000 دانامەن جارىققا شىقتى. ال 2012 جىلى "پەرىشتە تىلەك" اتتى العاشقى جىر جيناعى وقىرمانعا جول تارتتى. وسىلايشا ءوز وقىرماندارىنا جىرىنان شاشۋ شاشىپ، كوپشىلىك قاۋىمنىڭ ىستىق ىقىلاسىنا بولەنىپ، ۇلكەن اقىن اتا-اپالارىنىڭ باتاسىن دا الىپ ۇلگەردى. اقىندىق دەيتىن الەمگە بالا جۇرەگىمەن، باتىل جىرىمەن  وسىلايشا قادام باسىپ كەتتى.

رەسپۋبليكالىق بايقاۋلاردىڭ باس جۇلدەگەرى جاس اقىن جامبىل دۇيسەنوۆ قازاق ەلىن تاعى ءبىر قۋانتپاق. 2016 جىلدىڭ 30 قاراشاسىندا الماتى شاھارىنىڭ 1000 جىلدىعىنا ارنالعان "الماتىم – باق مەكەنىم" اتتى شىعارماشىلىق كەشىن ول "ستۋدەنتتەر" سارايىندا وتكىزبەكشى. سونىمەن قاتار استانا قالاسىندا ەل تاۋەلسىزدىگىنىڭ 25 جىلدىعىنا ارناپ "ەگەمەن ەلىم – ەركە ەلىم" اتتى شىعارماشىلىق كەشىن وتكىزۋدى جوسپارلاپ وتىر. الماتى قالاسىندا وتەتىن كەشكە جاس اقىندى قولداپ، بيبىگۇل تولەگەنوۆا، ەسكەندىر حاسانعاليەۆ، ماقپال ءجۇنىسوۆا، سۇلۋشاش نۇرماعانبەتوۆا، مايرا يلياسوۆا، رامازان ستامعازيەۆ، قاراگوز تىلەۋبەكوۆا، يبراگيم ەسكەندىر، بەيبىت مۇساەۆ، ەركەبۇلان ەلشاتقىزى، ىڭكار نۇرماعانبەتوۆا سىندى قازاق ونەرىنىڭ ساڭلاقتارى قاتىسادى. ەلىم دەپ سوققان ادال جۇرەكتى ۇلدىڭ، وتتى جىرلارىنان سىزدەر دە سۋسىنداپ قايتىڭىزدار.

سايلاۋحان ابىلاي

Abai.kz