ماقتا زيانكەستەرىنە الاڭداۋعا نەگىز جوق. وبلىس اكىمدىگى تاراپىنان اۋىل شارۋاشىلىعى جەرىنە زالال كەلتىرەتىن زينكەستەرمەن قارسى كۇرەس شارالارى بەكىتىلىپ، جۇمىس كەستەگە سايكەس جۇرگىزىلۋدە. ال شىلدەدەن باستاپ ماقتالى اۋداندارىندا كوسەك قۇرتىنىڭ كوزى جويىلۋدا. ياعني، ەگىن القاپتارىن وڭدەۋ شاراسى باستالعالى تۇر.

وبلىس ءماسليحاتىنىڭ 3-سەسسياسىندا كوتەرىلگەن بۇل ماسەلە وبلىس اكىمىنىڭ ورىنباسارى ساپاربەك تۇياقباەۆتىڭ ماقتاارال اۋدانىنا بارىپ كەلۋىنە سەبەپ بولىپتى. ول زيانكەستەن قانشالىقتى قاۋىپ تۋىپ تۇرعانىنا ءوزى كوز جەتكىزىپ قايتقان.

شەنەۋنىكتىڭ مالىمدەۋىنشە، بىلتىر 36 مىڭ گەكتار جەر قايتا وڭدەلسە، بيىل بۇل كورسەتكىش ەكى ەسە ارتىپ، 56 مىڭ گەكتار جەتكىزىلگەن. اۋىل شارۋاشىلىعى سالاسىندا كاسىپكەرلىك مەكەمەگە قاراستى عىلىمي-كەڭەس ورتالىعىن اشۋعا قارجى ءبولىنىپ، بۇل باعىتتا دا جۇمىستار اتقارىلۋدا. ورتالىق شارۋالارعا كاسىبىن اگروتالاپتارعا سايكەس جۇرگىزۋگە كومەكتەسپەك.

زيانكەستەرگە قارسى كۇرەس وسىمدىكتەردى قورعاۋ جونىندە بىلتىر قابىلدانعان باعدارلاما بويىنشا جۇزەگە اسادى. گەكتارلىق سۋبسيديا قايتا بولىنەتىن بولسا، شارۋا زيانكەستەرگە قارسى پرەپاراتتاردى ءوز قارجىسىنا ساتىپ الادى.

جاۋاپتىلار وسى جۇيەنى قالىپقا كەلتىرۋ ءۇشىن جۇمىس جاساپ جاتىر. سوندا شىعىنعا باتاتىن شارۋانىڭ قاتارى ازايىپ، ونىمدىلىك ەكى ەسە ارتادى دەپ وتىر.

اۋدان ديحاندارى 139 مىڭ گەكتار ەگىستىك جەردىڭ 122744 گەكتارىنا ءشيتتى ماقتا، 4834 گەكتارعا ءداندى داقىلدار، 5092 گەكتارعا باۋ-باقشا ونىمدەرى (كوكونىس، باقشا، كارتوپ،) 860 گەكتارعا جەمىس-جيدەك، 566,2 گەكتارعا ءجۇزىم، 5830 گەكتارعا ازىقتىق داقىلدار ەگىپ، بۇگىنگى تاڭعا 1400 توننا بيداي، 29000 توننا كوكونىس، 37500 توننا باقشا ونىمدەرى ءوندىرىلىپ الىندى.

Abai.kz