اتا زاڭنان ۇلى كوش ۇمىت قالماسا ەكەن!
جوعارعى بيلىكتىڭ باس قاتىرىپ وتىرعان باستى ماسەلەسى اتا زاڭنىڭ 26-بابىن وزگەرتۋ بولىپ وتىر. باسقاسىن ايتپاعاندا، ونداعى "قازاقستان رەسپۋبليكاسىنىڭ ازاماتى" دەگەندى - "اركىم" سوزىمەن الماستىرماق كورىنەدى. ەلباسىنىڭ بيلىك تارماقتارىن ءبولىپ بەرۋ تۋرالى باستاماسىنان كەيىن، بيلىكتىڭ بەل شەشە كىرىسكەن ءبىرىنشى ماسەلەسى - اتا زاڭعا وزگەرتۋ ەنگىزۋ ءام تولىقتىرۋ جاساۋ. قوعامنىڭ سەرگەك سانالى ازاماتتارى ۇكىمەت پەن بيلىكتىڭ بۇل باستاماسىنا قارسىلىق بىلدىرۋدە.
وسى رەتتە ءبىز كونستيتۋتسياعا وزگەرتۋ ەنگىزۋ پروتسەسسىندەگى ۇمىت قالىپ بارا جاتقان تاعى ءبىر ماسەلەنى قايتا قوتارعالى وتىرمىز.
تاۋەلسىزدىكتىڭ توبەسى كورىنگەننەن باستاپ، بۇگىنگە دەيىن شەتتە جۇرگەن قانداستىڭ قانشاسى شىنجىرىن ءۇزىپ، شىلبىرىن سۇيرەتىپ جەتتى. شيرەك عاسىردا شەتتەگى ميلليوننان استام قانداسىمىز ەلگە ورالدى. ولاردىڭ ءاربىرى قازاقستاننىڭ وركەندەۋ جولىندا ءوز ۇلەستەرىن قوسىپ كەلەدى. دەسەك تە، كوشتىڭ جولى وقتاي ءتۇزۋ بولمادى. شەكارانىڭ ارعى جاعىنداعى جۇرتتىڭ اعىلىپ كەلۋىنە بىرقاتار اكىمشىلىك كەدەرگىلەر مەن زاڭ جوبالارىنداعى قايشىلىقتار سەبەپ بولدى.
ازاماتتىعىمىزدى ايشىقتاپ تۇرعان وسى باپقا بۇيىدەي جابىسقان استانالىق شەندىلەردىڭ نازارىنا كونستيتۋتسياداعى كەدىر-ءبۇدىر باپتاردىڭ ءبىرىن ۇسىنامىز.
قۇرمەتتى نۇرسۇلتان ءابىشۇلى!
ءسىزدىڭ قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ ارقىلى بيلىك تارماقتارى اراسىندا وكىلەتتىكتەردى قايتا ءبولۋ تۋرالى باستاماڭىزدى تولىق قولدايمىز.
وسى ورايدا سىزدەن،
- كونستيتۋتسيانىڭ 26-بابىن وزگەرىسسىز قالدىرۋدى;
- 10-باپقا «رەسپۋبليكا شەگIنەن تىس جەرلەردە تۇراتىن ەتنيكالىق قازاقتار قازاقستان رەسپۋبليكاسىنا كەدەرگىزسىز ورالادى جانە تۇرۋ مەرزىمىنە قاراماستان، قازاقستان رەسپۋبليكاسىنىڭ ازاماتتىعىن جەڭىلدەتىلگەن تارتىپپەن (تىركەۋ تارتىبىمەن) الادى» دەگەن جاڭا 4-تارماق قوسۋدى سۇرايمىز.
مىنە، وسى جولى تالقىعا ءتۇسىپ جاتقان "اتا زاڭنىڭ" كەلەسى جاڭا نۇسقاسىندا سول ماسەلە ءوز شەشىمىن تابادى دەگەن سەنىمدەمىن.
نۇرگەلدى ابدىعانيۇلى
Abai.kz
