بەلگىلى ءدىنتانۋشى مۇرتازا بۇلىتاي الەۋمەتتىك جەلىدەگى پاراقشاسىندا ديماش قۇدايبەرگەنوۆتىڭ قىتاي ەلىندە تانىمال بولۋى وسى مەملەكەتتىڭ استارلى ساياساتى دەگەن سىڭايداعى جازبا قالدىرعان ەدى. وعان ديماش قۇدايبەرگەنوۆتىڭ اكەسى قانات ايتباەۆا فەيزبۋكتەگى پاراقشاسىندا جاۋاپ بەردى. 

ءانشىنىڭ اكەسى قانات ايتباەۆ بىلاي دەپ جازدى:

 "بۇلىتاي ديماشتى مەڭزەپ: «قازاقتى əلەمگە تانىتۋ دەگەندى قالاي تۇسىنەمىز وسى؟! قىزدارىمىز شەتىنەن سۇلۋ، ۇلدارىمىز شەتىنەن جىڭىشكە داۋىسپەن كەرەمەت əن ايتادى دەپ پە؟!؟ بۇل قاتە پىكىر. ءبىز قازاقتى بىلىمدىلىگىمىزبەن، ونىمدىلىگىمىزبەن، ەڭبەكشىلدىگىمىزبەن، جوعارى تەحنولوگيالىق ونىمدەرىمىزبەن، زياتكەرلىك الەۋەتىمىزبەن عانا شىنايى تانىتا الامىز» — دەپتى.

بۇلىتاي مىرزا، سوندا، ءسىزدىڭ ويىڭىزشا، مۋزىكا، ونەر، ەڭبەك ەمەس ەكەن عوي؟ بۇل سالا زياتكەرلىككە دە جاتپايتىن شىعار؟ جەتى جىل مۋزىكا مەكتەبىندە، ودان سوڭ ءتورت جىل كوللەدجدە، بەس جىل جوعارى وقۋ ورنىندا وقىپ، كۇنى – ءتۇنى اسپاپتىڭ جانىندا دايارلانىپ، ءوزىن-ءوزى شىڭداپ، ەل اتىنان ونەر كورسەتۋ ءۇشىن تەر توگۋ — ءسىزدىڭ ويىڭىزشا ەرىككەننىڭ ەرمەگى ەكەن عوي؟

مۋزىكانىڭ قىر-سىرىن مەڭگەرىپ، مەملەكەتتىڭ اتىنان شەت جەردە سىنعا ءتۇسۋ ءۇشىن قانشاما وقىپ، ءتىل ۇيرەنىپ، رەپەرتۋار دايارلاپ، قيىن پارتيالاردى جاتتاپ، ىزدەنۋ دە، سىزدىڭشە، بىلىمدىلىككە جاتپايدى ەكەن عوي؟

«قازاقتىڭ ۇلدارى مەن قىزدارى قانداي كەلبەتتى، تالانتتى!» — دەپ باسقا ەلدەر سۇيىنسە، نەگە شىمبايىڭىزعا باتادى؟ الدە سىزگە قازاقتى ۇسقىنسىز ەتىپ كورسەتكەن ۇناي ما؟ ونىڭ استارىندا نە بار؟

انشىگە پىكىر ايتۋ ءۇشىن ەڭ بولماسا ۆوكال جونىندەگى ەڭ قاراپايىم ۇعىمداردان حاباردار بولۋ كەرەك. ديماش ءسىز ايتقانداي «جىڭىشكە داۋىستى ءانشى» ەمەس، «تومەنگى رەگيستردە دە، كولوراتۋرالىق سوپرانولار عانا ايتا الاتىن جوعارى نوتالاردى دا ەركىن شىرقاي الاتىن، داۋىس دياپازونى وتە كەڭ، سيرەك كەزدەسەتىن ءانشى» — دەپ قازاقستان، بەلارۋس، ازەربايجان، ۋكراينا، قىرعىزستان، تۇركيا جانە قىتايدىڭ ەڭ بەدەلدى مۋزىكا ماماندارى باعا بەرگەن ونەرپاز. مۇنى ءبارى – تابيعي جاراتىلىسپەن قوسا ءسىز ونەر ادامدارىنا بۇيىرتقىڭىز كەلمەي وتىرعان تىنىمسىز ەڭبەكتىڭ ناتيجەسى!

«…بۇل بايقاۋعا ديماشتىڭ قاتىسۋى – قىتايلاردىڭ ساياساتى» — دەپسىز. قازىرگى زاماندا ادامزات جابىق قوعامدا ءومىر سۇرە الا ما؟ الەمدە كوپتەگەن سپورتتىق جارىستار، وليمپيادالار، ونەر دودالارى، مۋزىكالىق فەستيۆالدەر، كونكۋرستار ت.ب. كوپتەپ وتكىزىلىپ جاتادى. نەگىزگى ماقساتى – ەلدى تانىتۋ. قازاقستاننىڭ اتىنان تالاي ازاماتتارىمىز كوپتەگەن شارالارعا قاتىسىپ جاتادى، سونىڭ بارىنەن ساياسات ىزدەيمىز بە؟ ءار سالانىڭ ماماندارى مۇمكىندىگىنشە ەلىمىزدىڭ الەۋەتىن كوتەرىپ، مەملەكەتىمىزدى جاقسى قىرىنان تانىتۋعا تالپىنسا نەسى ايىپ؟ قانشاما جىگىتتەرىمىز بەن قىزدارىمىز حالىقارالىق دەڭگەيدە جاقسى جەتىستىكتەرگە جەتىپ، جۇلدەلەرمەن ورالىپ جاتىر، سولاردىڭ بارلىعىنىڭ جەڭىسىنەن جىمىسقى ساياساتتىڭ استارىن ىزدەيمىز بە؟

ديماش بۇل سايىسقا ءبىزدىڭ جەكە قالاۋىمىزبەن (!) قىتاي تاراپىنا ۇسىنىس تۇسىرگەننەن كەيىن بىرنەشە ىرىكتەۋ كەزەڭىنەن ءوتىپ، كاسىبي شەبەرلىگىن تولىق دالەلدەگەننەن كەيىن عانا قاتىسۋعا جولداما الدى.

بۇل دودا، ءسىز ويلاعانداي، قازاقتى الداۋسىراتۋ ءۇشىن ويلاستىرىلعان جوبا ەمەس، بىرنەشە جىل قاتارىنان وتكىزىلىپ كەلە جاتقان، ەۋروپا مەن ازيانىڭ ءتۇرلى ەلدەرىنىڭ ەڭ تانىمال، كاسىبي انشىلەرى عانا قاتىسا الاتىن تەلەۆيزيالىق كونكۋرس.

«اسىقپاڭىز، ءəلى بۇل دودا 4-5 ايعا ۇلاساتىن شىعار، سول كەزدە جارتىلاي قىتاي نەمەسە قىتايسۇيگىش بولىپ كەتكەنىمىزدى ءوزىمىز دە بايقاماي قالاتىن شىعارمىز. وسى كۇننىڭ وزىندە «شەشە، شەشە» دەپ پوست جازىپ جاتقاندار بار، بىرنەشە اپتادان سوڭ «نيحاو» دەپ كەتەدى»، — دەيسىز.

وسىعان دەيىن ديماش قازاقستاننىڭ اتىنان سلاۆيان مەملەكەتتەرىندە ونەر كورسەتىپ، تانىمال بولعان ەدى. اللا بۇيىرتسا، ەۋروپا، امەريكاداعى سىندارعا دا بارار. وندا دا ديماشتىڭ قاتىسۋىن سول ەلدەردىڭ ساياساتىمەن بايلانىستىرامىز با؟ ال قازىرگى كەيبىر قازاقتىڭ انا ءتىلىن بىلمەي، كورشى مەملەكەتتىڭ تىلىندە سويلەيتىندىگى ءۇشىن كەيبىر ادامداردىڭ ۇلت مۇددەسىن قولدان بەرىپ جۇرگەندىگى ءۇشىن، وتانشىل ەمەستىگى ءۇشىن ديماشتىڭ قانداي كىناسى بار؟!؟

مارقۇم ناعاشى اجەم «وزىڭە ءوزىڭ مىقتى بول، قوڭسىڭدى ۇرى تۇتپا» دەپ وتىرۋشى ەدى. ارينە، شەتەلدىڭ ىقپالىنان ساقتانعان دۇرىس. ول ءۇشىن ارقايسىمىز ءوز وتباسىمىزدى مىقتى ۇستاۋىمىز كەرەك. اتا-انادان دۇرىس تاربيە كورگەن ۇل-قىز كورىنگەننىڭ جەتەگىندە كەتپەيدى. سوعان كۇش سالايىق! ونەرگە، بىلىمگە، جاڭا تەحنولوگيانى يگەرۋگە ۇيرەتەيىك. اتا-بابامىزدىڭ رۋحىن، ۇلتشىلدىقتى بويىنا سىڭىرەيىك. «سەنىڭ ءاربىر جەڭىسىڭ — قازاقتىڭ جەڭىسى» دەيىك. سوندا بىزگە ەشكىم دە ىقپال ەتە الا المايدى.

ال ەندى ءبىرىمىز شىڭعا ورمەلەپ بارا جاتقاندا ەكىنشىمىز ونىڭ بالاعىنا جارماسىپ جاتساق، ەل مۇددەسى تۋرالى اڭگىمە ايتۋدىڭ ءوزى ارتىق…",-دەدى ول.

نۇرسۇلۋ نايمانوۆا

Abai.kz