سۇيمەناي اپا
سۇيمەناي اپامىز شۇيكەدەي عانا كەمپىر بولاتىن. ول كىسىنى اپپاق كيمەشەكسىز ەلەستەتۋ قيىن. قاشان كورسەڭ، تاياعىنا سۇيەنىپ، كيمەشەگى داعاراداي بوپ، قىبىرلاپ ءبىر نارسە ىستەپ جۇرەتىن.
كۇندەردىڭ كۇنىندە سۇيمەناي اپا اياق استىنان ناشارلاپ، «كۇزەتۋگە» كورشى كەمپىرلەر جينالادى. شۇيكەدەي كەمپىر توسەكتە ساندىراقتىپ، ەسى ءبىر كىرىپ، ءبىر شىعا باستاعاندا اعايىندار «ال، ەندى قامدارىڭدى جاساي بەرىڭدەر...» دەپ، ۇل-قىزدارى اپامىزدى سوڭعى ساپارعا شىعارىپ سالۋدىڭ دايىندىعىنا بىلەك تۇرىپ كىرىسىپ كەتەدى عوي.
اۋىلدىڭ ءبىر جىگىتى ايتادى: «سۇيمەناي اپا ءانى-مىنە ۇزىلەدى» دەگەن سوڭ وتىن جارىپ، سۋ تاسىپ دەگەندەي ەسىكتىڭ الدىندا ابىر-سابىر باستالىپ كەتتى. وتىن مول بولۋى ءۇشىن ءۇيدىڭ ارتىنداعى ۇلكەن قاراعاشتى قۇلاتاتىن بولدىق. كورشى ۇيدەن ارا الدىرىپ، بالتانى قايراپ، ەندى جۇمىسقا كىرىسى بەرگەندە تۋ سىرتىمىزدان ء«اي، نە ىستەپ جاتسىڭدار؟..» دەگەن اششى ايقاي ەستىلدى. جالت قاراساق، اپپاق كيمەشەك كيگەن سۇيمەناي اپا. قولىندا قۇمعان...
- ءاي، نە ىستەپ جاتسىڭدار؟
ءبارىمىز ءتىرى ارۋاقتى كورگەندەي شوشىپ قالدىق.
- مىنا اعاشتى قۇلاتىپ، وتىن قىلايىن دەپ جاتىرمىز، اپا... - دەدىك كۇمىلجىپ.
- جىندىسىڭدار ما؟ ساپ-ساۋ اعاشتا نەلەرىڭ بار؟ قۇلاتساڭدار، اناۋ باۋدىڭ اياق جاعىندا قۇراعان الما بار... سونى وتىن قىلىڭدار، - دەدى دە دارەتحاناعا ءوتىپ كەتتى.
«جىندى ما دەيمىن... ساپ-ساۋ اعاشتى قۇلاتىپ...» دەپ كۇبىرلەپ بارا جاتىر تاعى...
نە ىستەرىمىزدى بىلمەي سوستيىپ تۇرمىز. «مىنە-مىنە، كەتىپ قالادى» دەپ، مولدا يمانىن ءۇيىرىپ، زامانداستارى اۋزىنا سۋ تامىزىپ وتىرعان سۇيمەناي اپامىز كەڭ كالوشىمەن تىرپ-تىرپ باسىپ، ەسىكتىڭ الدىندا ءجۇر. «اپالارىڭ ولە مە، جوق پا؟ نە ىستەيمىز؟ قاراعاشتى قۇلاتا بەرەيىك پە؟» دەپ، سول ءۇيدىڭ بالالارىنان سۇراعان ىڭعايسىز عوي. امال جوق، ءبىز دە قىبىرلاپ شارۋامىزدى ىستەي بەردىك.
تۇنگە قاراي اپامىز تاعى دا قينالىپ قالىپ، ۇيدەگىلەر دۇرلىگىپ كەتتى. ءتىپتى قىزدار جاعى داۋىس سالىپ جىبەردى. ودان قايتادان تىنشىپ قالدى. بەس-التى كەمپىر قالعىپ-مۇلگىپ كۇزەتىپ وتىر.
سويتسە سونىڭ الدىندا عانا ءتىلى سويلەۋگە كەلمەي، تالىقسىپ كەتكەن سۇيمەناي اپامىز ءتۇننىڭ ءبىر ۋاعىندا ويانىپ كەتىپتى دە جان-جاعىندا قالعىپ-مۇلگىپ وتىرعان كەمپىرلەرگە قاراپ:
- ءاي، نەعىپ وتىرسىڭدار؟ ۇيلەرىڭ قايتپايسىڭدار ما؟ ۇيلەرىڭ جوق پا، نە؟ – دەپتى جاقتىرماي...
اپامىزدىڭ بۇل سوڭعى بوي جازۋى ەكەن. جارىقتىق تاڭعا جۋىق ءۇزىلىپ كەتتى.
ورالحان ءداۋىت
Facebook-تەگى پاراقشاسىنان
