قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەديۇلى قازاقستاندىق جاس ءانشى ديماش قۇدايبەرگەننىڭ حالىقارالىق ساحناداعى قول جەتكىزەر جاڭا جەتىستىكتەرىنىڭ اۋىلى الىس ەمەس دەگەن سەنىمدە. تومەندەگى سۇحباتىندا مينيستر قىتايلىق حۋنان پروۆينتسياسىندا ءوتىپ جاتقان تانىمال «I am a singer» تەلەۆيزيالىق مۋزىكالىق-ۆوكالدىق كونكۋرسىنداعى ديماشتىڭ جەتىستىگى جونىندە ءوز پىكىرىن ءبىلدىردى.   

–  ارىستانبەك مۇحامەديۇلى، ديماش قۇدايبەرگەندى قىتاي عانا ەمەس، بۇكىل الەم تانىدى. قىتاي ەلىندە وتكەن ديماشتىڭ كونكۋرستىق ۆيدەوسى كورسەتىلىم سانى بويىنشا رەكوردتىق مارەگە جەتتى...

– بۇل ۇلكەن جەتىستىك. مەن كوپتەگەن كونكۋرستاردىڭ، ونىڭ ىشىندە 2015 جىلى وتكەن «سلاۆيان بازارىنىڭ» لاۋرەاتى ديماشىمىز ءۇشىن وتە قۋانىشتىمىن. ديماش شىعارماشىلىق وتباسىندا دۇنيەگە كەلىپ،  مۋزىكالىق ورتادا ءتالىم-تاربيە الدى. سوندىقتان، ونىڭ تابىسى كەزدەيسوق ەمەس. ديماشتىڭ اتا-اناسى قانات پەن سۆەتلانا ايتباەۆتار – قازاقستاندا ەرەكشە سىي-قۇرمەتكە يە ونەرلى وتباسى. قانات ايتباەۆ – تانىمال اندەردىڭ، ونىڭ ىشىندە استانا تۋرالى ءاننىڭ اۆتورى. قازىر ول اقتوبە وبلىسىنىڭ مادەنيەت باسقارماسىن باسقارىپ وتىر، اكىمشىلىك جۇمىستاردى دا تابىستى اتقارىپ ءجۇر. ال، سۆەتلانا ايتباەۆا تاماشا ءانشى، جۇبايى ەكەۋى دۋەت بولىپ، ۇلكەن ساحنالاردان دا كورىنۋدە.

ديماش بىرەگەي مۋزىكانت، ارقاشان ىزدەنىس ۇستىندە. قازىر ءبىز وعان ارناپ وپەرالىق باعدارلاما دايىنداپ جاتىرمىز، ونى ديماش سيمفونيالىق وركەستردىڭ سۇيەمەلدەۋىمەن ورىنداۋدى جوسپارلاپ وتىر.  بولاشاقتا ديماش ۇلكەن جەتىستىكتەرگە جەتەدى دەپ سەنەمىن. ونى الەمدىك ساحنالاردان كورىپ، «مىناۋ ءبىزدىڭ ديماش قۇدايبەرگەن عوي» دەپ ماقتانىشپەن ايتاتىن بولامىز.

–  بۇقارالىق اقپارات قۇرالدارى ديماشتى رەسەيلىك ءانشى ۆيتاسپەن سالىستىرىپ جاتىر.

–  مەن ۆيتاستىڭ شىعارماشىلىعىنا ۇلكەن قۇرمەتپەن قارايمىن، ول ۇزاق ۋاقىت بويى قىتايدا تۇرىپ، ونەر كورسەتۋدە. الايدا، ديماش قۇدايبەرگەن – ەلىمىزدىڭ بىرەگەي جاس دارىنى. ول اقتوبە مۋزىكالىق ۋچيليشەسىن اياقتاعان، قازىر استاناداعى قازاق ۇلتتىق ونەر ۋنيۆەرسيتەتىندە ءبىلىم الۋدا. ديماش - جان-جاقتى دايىندىعى جەتىلىپ كەلە جاتقان ءانشى. مەن ونى بىرنەشە جىلداردان بەرى  بىلەمىن، ونىڭ  دامىپ، جەتىستىكتەرگە جەتىپ جاتقانىنىڭ كۋاگەرىمىن. بەلسەندى تۇردە كومەك كورسەتۋدەمىز. 

ول جوعارى نوتالاردى ەركىن الاتىندىقتان ونى باسقا انشىلەرمەن سالىستىرۋدىڭ قاجەتى جوق. ديماش بىرەۋگە ەلىكتەگەندىكتەن جوعارى نوتالاردى الىپ وتىرعان جوق. ونىڭ داۋىس دياپازونى كەڭ ءارى اشىق، ول تومەن تازا نوتالارعا دا وڭاي بارا الادى. ديماش قۇدايبەرگەن ەكىنشى ۆيتاس ەمەس. بۇل بۋرابايدى شۆەيتساريامەن تەڭەستىرگەندەي. ءبىز سالىستىرۋ پسيحولوگياسىنان، ءوزىمىزدى ەكىنشى ورىنعا ىسىرۋدان ارىلۋىمىز كەرەك.  ارينە، شۆەيتساريا كوز تارتارلىق سۇلۋ مەملەكەت، بىراق بۋرابايدىڭ قايتالانباس ءوز ەرەكشەلىگى بار. ءبىر كەزدەرى ءبىز يۋنەسكو دەلەگاتسياسىن قابىلداعان بولاتىنبىز، شەتەلدىك قوناقتاردى بۋرابايعا اپاردىق. دەلەگاتسيا مۇشەلەرىنىڭ بىردە بىرەۋى بۋرابايدى ەكىنشى شۆەيتساريا دەپ اتامادى. شەتەلدىكتەر بۋرابايدىڭ بىرەگەي تابيعاتىنا تامساندى، ونىڭ كوركەمدىگى مەن عاجاپتىعىنا تاڭدانىس ءبىلدىردى.

كەيبىرەۋلەر گەننادي گولوۆكيندى باسقالارمەن سالىستىرۋ ارقىلى ونى ەكىنشى ورىنعا قويىپ وتىرعاندارىن تۇسىنبەيدى. گەننادي - كاسىپقوي بوكس الەمىندە وزىندىك ەرەكشە ورنى بار بوكسشى.

–  سۇحباتىڭىزعا راحمەت!

سۇحباتتاسقان - نۇرزات توعجان

Abai.kz