وزبەگىم-ءوز اعام دەيدى قازاق. وزبەكستاندا كوپتەگەن پروبلەمالار كۇن تارتىبىندە تۇر:

ءبىرىنشى، ۆاليۋتالىق كوللاپس. وزبەكتىڭ ءتول اقشاسى قۇر قاعاز بولىپ كەتتى، ال دوللار - شىرقادى. وزبەكستان شەت ەلدەردەن وزىق تەحنولوگيالار ساتىپ الا المايدى، قىمبات. كاپيتال قاشىپ جاتىر. باي وزبەكتەردىڭ ءبىرازى باتىس ەلدەرىنە كارىموۆ وتباسىنىڭ وزبىرلىعىنان قاشسا، ەندى كارىموۆكە جاقىن ادامدار دا ميرزياەۆتىڭ مينيسترلەرى مەن اكىمدەرىنەن قاشپاق جانە قاشىپ جاتىر. وزبەك قازىناسىندا ءتيىستى رەزەرۆ جوقتىڭ قاسى.

ەكىنشى، قول ەڭبەگى تىم ارزان، قول ەڭبەگىنىڭ ارزاندىعى جاڭا تەحنولوگيالارعا بوگەت. وزبەكستاندا مولشەرى 33 ميلليون ادام تۇرادى. حالىقتىڭ تىم تەز ءوسۋى وزبەكستان ءۇشىن قاسىرەت. حالىقتىڭ تىم تەز ءوسۋى ەكونوميكالىق جانە الەۋمەتتىك تاۋقىمەتتەرگە اكەلدى. ولارعا ۇكىمەت نە جۇمىس، نە ساپالى وقۋ، نە مەديتسينالىق كومەك كورسەتە الماي كەلەدى.

ءۇشىنشى، شيكىزات باعاسى تىم ارزاندادى. ماقتا، گاز بەن ۋران باعاسى تومەندەپ كەتتى. قىشلاقتاردا جەر جەتىسپەيدى، اسىرەسە سۋارمالى.

ءتورتىنشى، نارىقتىق رەفورمالار ءتيىس دەڭگەيدە جۇرگەن جوق. نارىقتىق ينستيتۋتتارى ءتيىستى دەڭگەيدە ىستەمەيدى، قۇرىلىمدىق ديسپروپورتسيالار كۇشتى. شىركات ۇجىمدارى ءتيىستى پارمەن بەرمەي كەلەدى.

 بەسىنشى، بۇكىل وزبەكستان قىشلاقتىق اگلومەراتسياعا اينالدى. ءۇي تۇرعىزاتىن جەر جوق، قالاعا قونىستانۋعا كىرگىزبەيدى - قاتاڭ پروپيسكا جۇيەسى. ال وزبەكستاننىڭ قالالارى قىشلاقتارعا اينالىپ بارا جاتقان سياقتى.

التىنشى، 5 ميلليونداي ەركەك وزبەك رەسەيدە، تاعى 300 مىڭدايى قازاقستاندا جالشىلىقتا ءجۇر. ەركەك كىندىك جەتىسپەيدى: پسيحولوگيالىق - جىنىستىق ديسپروپورتسيا كۇشەيدى. وزبەك قىشلاعىندا ەرەسەك دەنى ساۋ ەركەك كىندىك قالعان جوق. بۇل جاعداي 1941-1945 جىلدارداعى سوعىستان كەيىنگى جاعدايدى كوزگە ەلەستەتەدى.

جەتىنشى، وزبەكستاننىڭ قازاعى قازاقستانعا قارقىندى كەلىپ جاتىر. كەلەم دەۋشىلەرگە ارنايى باعدارلاما كەرەك. قازاقتاردىڭ ءبىرازى وزبەك پەن قاراقالپاق بولىپ اكىمشىلىك جولمەن جازىلىپ كەتكەن. ولاردى دا قازاقتىققا قايتارىپ قۇجاتىن جوندەۋگە مۇرسات بەرۋ كەرەك. ونداي باعدارلامالارعا قارجى كەرەك. وزبەكستاننىڭ ورىسى مەن كورەيى رەسەيگە كەتىپ جاتىر.

وزبەك حالقى ءتوزىمدى جانە بايسالدى ۇلت. ەندى ميرزياەۆ رەفورما جاسايمىن دەيدى. بىراق الدىمەن ەكونوميكالىق رەفورمانى، كەيىن ساياسي رەفورمانى جاساۋ كەرەك. جاڭا بيلىك يگى وزگەرىستەر جاسايمىز دەپ ۋادە بەرۋدە. بۇل ۋادەلەر ءار وزبەكتىڭ جۇرەگىنە ءۇمىت وتىن جاندىردى.

ءازىمباي عالي

Abai.kz