كەشە عانا تاعايىندالعان ۇلتتىق ەكونوميكا ءمينيسترى  ۇلتىنىڭ ءتىلىن بىلمەيتىن بولىپ شىقتى…

تيمۋر سۇلەيمەنوۆ پارلامەنت ءماجىلىسى وتىرىسىنان سوڭ تىلشىلەرگە : «ماسكەۋدە بەس جىل بويى قىزمەت ەتىپ، تۋعان ءتىلىمدى ۇمىتىپ قالدىم. بىراق التى اي ىشىندە ۇيرەنىپ الامىن»، — دەپ قازاقتىلدى اقپارات قۇرالدارى جازىپ جاتىر. 

بۇلاي مەملەكەتتىك ءتىلدى ۇمىتىپ قالدىم، انا ءتىلىمدى بىلمەيمىن دەپ ەش قىسىلماي، سالتاناتتى تۇردە مالىمدەيتىن مينيستر الەمدە تەك قازاقستاندا عانا بولادى…  پارلامەنتتە دە، «اۋ، مەملەكەتتىك ءتىلدى بىلمەي، قالاي مەملەكەتتىڭ ءمينيسترى بولاسىڭ؟» دەيتىن ءبىر دەپۋتات جوق…

مىسالى، وزبەكستاندا وسىلاي «وزبەك ءتىلىن ۇمىتىپ قالدىم» دەگەن مينيستر بولا ما؟  قىرعىز ەلىندە دە بولمايدى. تاعى دا وزبەك پەن قىرعىز «ماڭقا قازاق» دەپ مازاقتاسا، شىجبالاق قاعامىز… بۇل پارلامەنت الدىندا «ميىمدى اۋىستىرماساڭدار، قازاق ءتىلىن ۇيرەنە المايمىن» دەگەن ەكس-سىرتقى ىستەر ءمينيسترى ەرلان ىدىرىسوۆتان كەيىنگى ەكىنشى ورىنداعى مالىمدەۋ بولدى.

«مەملەكەتتىك تىلگە ميى جەتپەگەندەر قالاي مينيستر بولادى؟..  بىزدە ميسىز مينيستر، ميسىز اكىم، ميسىز دەپۋتات، ميسىز شەنەۋنىكتەر بولۋى زاڭدىلىق بولسا، وندا ءبىز قانداي ەلمىز؟»   http://www.qazaquni.kz/?p=7602   مەملەكەتتىك ءتىلدى بىلمەسە دە، ەرلان ىدىرىسوۆتى  ەكى رەت مينيستر قىلىپ، 20 جىلدا ءوزىنىڭ جاقسى بىلەتىن تىلىندەگى ەل ۇلىبريتانيعا ەكىنشى رەت ەلشى  ەتىپ، زورعا قۇتىلىپ ەدىك، ەندى مىناۋ، تاعى ءبىر رەسەي تىلىندە سويلەيتىن مينيستر كەلدى…  

ماسكەۋدە 5 جىل تۇرعاندا قازاق ءتىلىن ۇمىتىپ قالىپتى-مىس. اۋ، ءومىر بويى قازاقستاندا تۇرىپ كەلە جاتقان وزگە ۇلت وكىلدەرى، نەمىس، وزبەك، ۇيعىر، شەشەن، ارميان، گرۋزين، ازەربايجان، كارىستەردىڭ مينيستر ەمەس…. قاراپايىم ادامدارىنىڭ ءوزى نەگە انا تىلدەرىن ۇمىتىپ قالمايدى، مينيستر مىرزا؟ قىرىق جاسقا جاقىنداعان ءسىز 5 جىل رەسەيدە تۇرساڭىز، 35 جىل قازاقستاندا، وتانىڭىزدا تۇردىڭىز عوي… سوندا ءوز ەلىڭىزدەگى 35 جىل وزگە ەلدەگى 5 جىلعا قاراعاندا بوسقا وتكەن بە؟  وسىنى ءبىر ءسات ويلانىپ كوردىڭىز بە؟ نەگە؟

باياعىدا شالعايداعى شاردارادا، قىزىلقۇمدا وسكەن مەنىڭ ءبىر باقىت دەگەن سىنىپتاسىم  رەسەيگە ءۇش جىلدىق اسكەرگە بارىپ كەلىپ،  «چتو تاكوي باۋرساك؟» دەپ «قازاقشانى ۇمىتىپ قالىپ»  ورىسشا سويلەپ ءجۇردى.  قىرمانعا بارىپ قالعاندا كۇرىش تازالاپ جاتقان اعايىندارىنا ورىسشا شۇلدىرلەي باستاعاندا، جارىلقاپ دەگەن كوكەمىز اكە-شەشەسىنەن تۇك قويماي سىباپ، ءداۋ كۇرەگىمەن قىرماندى اينالدىرا قۋعاندا الگىنىڭ «ويباي، كوكە، قويدىم، ەندى ورىسشا سويلەمەيمىن» دەگەن جان داۋىسى قازاقشا شىعىپ كەتكەن ەدى…

ءبىزدىڭ مەملەكەتتىك ءتىلىن بىلمەي مەملەكەتتىك قىزمەتكەر بولىپ، لاۋازىم يەلەنىپ جۇرگەن مينيسترلەر، اكىمدەر، دەپۋتاتتار، جالپى شەنەۋنىكتەرگە 25 جىل  رەسەي تىلىندە سويلەۋگە رۇقسات بەرىپ قويعان ەلباسىمىز دا ەندى شيرەك عاسىردان سوڭ، «جەتتى ەندى!» دەپ جاقسىلاپ قازاقشا سىباپ السا، بىردەن قازاقشا سايراپ شىعا كەلەر ەدى بارلىعى….

مينيسترلەر مەملەكەتتىك ءتىلىن ۇمىتادى، ال ءبىز «ارمان، ارمان، ارمان-اي» دەگەن ءاندى قاشان ۇمىتار ەكەنبىز…

P.S.  تيمۋر سۇلەيمەنوۆ مىرزا، مىنا سىزگە ارنالعان ماقالانى رەسەي تىلىنە اۋدارىپ جازاتىنداي ماسكەۋدە جۇرگەن جوقپىز، سوندىقتان مينيسترلىگىڭىزدە قازاقشا بىلەتىن بىرەۋ بولسا،  اۋدارتىپ الىپ  وقىپ، جاۋاپ بەرۋىڭىزدى سۇرايمىن.  

قازىبەك يسا

qazaquni.kz