جاڭا كونستيتۋتسيا جوباسىندا قازاقستان ءۇشىن ادامي كاپيتالدى دامىتۋ، ءبىلىم، عىلىم جانە يننوۆاتسيانى ىلگەرىلەتۋ مەملەكەتتىڭ ستراتەگيالىق باعىتى رەتىندە ناقتى بەلگىلەنگەن. بۇل شەشىم كەزدەيسوق قابىلدانعان جوق. كەرىسىنشە ەلدىڭ بولاشاقتاعى ورنى مەن باسەكەگە قابىلەتتىلىگى ءدال وسى فاكتورلارعا تىكەلەي بايلانىستى.

قازىرگى الەم بۇرىن-سوڭدى بولماعان جىلدامدىقپەن وزگەرىپ جاتىر. تەحنولوگيالىق پروگرەسس كۇن سايىن جاڭا ءومىر ءسۇرۋ ۇلگىسىن قالىپتاستىرىپ وتىرعان زاماندا ەڭ باستى رەسۋرس جەر قويناۋىنداعى بايلىق ەمەس، ادام ەكەنى ايقىن. ەكونوميكانىڭ نەگىزگى قوزعاۋشى كۇشى ەندى مينەرالدار ەمەس، ءبىلىم مەن ينتەللەكتكە نەگىزدەلگەن قوعامعا اۋىستى.
وسى تۇرعىدا «ءبىلىم ەكونوميكاسى» ۇعىمى جاڭا ءداۋىردىڭ باستى وزەگىنە اينالدى.

كونستيتۋتسيالىق دەڭگەيدە ادامي كاپيتالعا باسىمدىق بەرۋ قازاقستاننىڭ الەمدىك دامۋ ۇردىسىنەن شەت قالماي، كەرىسىنشە الدىڭعى قاتارلى مەملەكەتتەردىڭ قاتارىنا قوسىلۋىنا جول اشادى.

عىلىمنىڭ دامۋى تەحنولوگيالىق سەرپىلىس جاساپ قانا قويماي، جاڭا نارىقتاردىڭ پايدا بولۋىنا، ينۆەستيتسيا تارتۋعا جانە جالپى حالىقتىڭ ءال-اۋقاتىن ارتتىرۋعا مۇمكىندىك بەرەدى. بۇل ەكونوميكالىق ءوسىمنىڭ ەڭ تۇراقتى ءارى ۇزاق مەرزىمدى فورمۋلاسى.

سونىمەن بىرگە مۇنداي كونستيتۋتسيالىق ۇستانىم مەملەكەتتىڭ ادامعا جۇيەلى تۇردە ينۆەستيتسيا سالۋعا، ءبىلىم بەرۋ مەن عىلىم ينفراقۇرىلىمىن تۇراقتى قولداۋعا دايىن ەكەنىن كورسەتەدى. ال بۇل ءوز كەزەگىندە ۇلت ساپاسىنىڭ ۇزدىكسىز جاڭارىپ، دامۋىنا نەگىز بولادى.

ادامي كاپيتالدى دامىتۋعا دەگەن مەملەكەتتىك نيەت كونستيتۋتسيانىڭ وزگە دە باپتارىندا كورىنىس تاپقان. ماسەلەن، جاڭا جوبادا زياتكەرلىك مەنشىك قۇقىقتارىن قورعاۋ نورمالارى بەكىتىلگەن. بۇل حالىقارالىق قۇقىقتىق تاجىريبەگە ساي كەلىپ، يننوۆاتسيالىق ەكونوميكا قۇرۋ ءۇشىن ماڭىزدى قادام سانالادى.

سونىمەن قاتار عىلىم مەن جاڭاشىلدىققا بەرىلگەن باسىمدىقتىڭ تەرەڭ فيلوسوفيالىق ماعىناسى بار. بۇل قوعامنىڭ جاڭا وزگەرىستەرگە دايىن ەكەنىن، ەسكى شەكتەۋلەردەن باس تارتىپ، پروگرەسكە قاراي بەت بۇرعانىن بىلدىرەدى.

ايبار ولجاەۆ

Abai.kz