اڭگىمە ۇلتتىق ەكونوميكا مينيسترلىگىنە جاڭا تاعايىندالعان تيمۋر سۇلەيمەنوۆ تۋرالى بولماق. سۋ جاڭا ءمينيسترىمىز مەملەكەتتىك ءتىلدى بىلمەيتىن بولىپ شىقتى. دالىرەك ايتساق، بۇرىن بىلگەن ەكەن، تەك ۇمىتىپ قالىپتى. مۇنى، ءوزى ايتتى.

ماجىلىسكە كەلىپ، دەپۋتاتتارمەن كەزدەسكەن ۇلتتىق ەكونوميكا ءمينيسترى ءتىلدى ۇمىتىپ قالعاندىقتان، قازاق تىلىندە قويىلعان سۇراقتارعا دا رەسەيدىڭ مەملەكەتتىك تىلىندە جاۋاپ بەرگەن.

ءماجىلىستىڭ دالىزىندە ءمينيستردى كۇتىپ تۇرعان باق وكىلدەرى  سۇلەيمەنوۆ مىرزانى «تەرگەۋگە الىپ» ءتىل توڭىرەگىندە سۇراقتار قويعان. ءسويتىپ، جاڭا مينيستر مەن باق وكىلدەرى اراسىنداعى شاعىن ديالوگ بىلاي ءوربيدى:

مينيستر: - مەن ماسكەۋدە 5 جىل ءجۇردىم. انا ءتىلىمدى ۇمىتىپ قالدىم. بىراق، 6 ايدىڭ ىشىندە ۇيرەنىپ الامىن.

جۋرناليستەر: - سوندا 6 ايدان سوڭ، ءسىز قازاق تىلىندە سويلەيتىن بولاسىز عوي؟..

مينيستر: - ءدال سولاي.

ماسكەۋدە بەس جىل جۇمىس ىستەپ كەلگەن مينيستر ءوزىنىڭ انا تىلىنەن ادا بولىپ قايتىپتى. ەندى ول جارتى جىلدا قازاق ءتىلىن ۇيرەنىپ الامىن دەپ ۋادە بەردى. مىسالى رەتىندە ايتا كەتەيىك، سۇلەيمەنوۆ قازاق ءتىلىن از ۋاقىتتا ۇيرەنىپ الۋعا ۋادە بەرگەن العاشقى شەنەۋنىك ەمەس. مىسالى، بىلتىر قازاق تىلىنەن ەمتيحان تاپسىرىپ،  وڭباي سۇرىنگەن ۇلتتىق بانك باسشىسى دانيار اقىشەۆ تا ءتىل ۇيرەنۋگە تۇپ تۋرا 1 جىل ۋاقىت سۇراعان. ۋادەسىندە تۇردى ما؟ ال ەرلان ىدىرىسوۆ، ۆلاديمير بوجكو سەكىلدى كەي شەندىلەر «باسىمدى كەسىپ الساڭ دا ۇيرەنبەيمىن» دەپ اشىق ايتقان. قاراپ وتىرىپ قانىڭ قاينايدى. بوجكو بوتەن ادام دەسەك تە، ەلشى بولىپ كەتكەن ىدىرىسوۆتىڭ بۇلاي ايتۋى ءتۇرلى ويعا جەتەلەيدى. ءجا، سۇلەيمەنوۆكە ورالايىق...

بولاشاقتىڭ تۇلەگى بيشىمباەۆتىڭ ورنىنا 2016 جىلدىڭ سوڭىندا عانا وتىرعان سۇلەيمەنوۆ ەۋرازيالىق ەكونوميكالى كوميسسيادا جۇمىس ىستەپ كەلدى. ەلباسىنىڭ پەتەربورعا ساپارى بارىسىندا تاعايىندالعان سۇلەيمەنوۆتىڭ بەس جىلدا ءتىلدى ءبىرجولاتا ۇمىتىپ قالۋى قانشالىقتى قيسىندى؟ ايتپەسە پاروداكسالدى سۇراق – مەملەكەتتىك تىلدەن ماقۇرىم ادامدار قالاي مەملەكەتتىك قىزمەتكە تاعايىندالدى؟

اناۋ ماركستىڭ ءسوزى ەستە بولار. ء«وزى تۇرىپ جاتقان ەلدىڭ ءتىلىن تەك ءۇش ادام بىلمەۋگە قۇقىلى. ءبىرىنشىسى – قوناق، سوسىن – اقىماق جانە ءۇشىنشى - باسقىنشى». سوندا سۇلەيمەنوۆ ءام سۇلەيمەنوۆ سەكىلدى قازاقستاننىڭ مەملەكەتتىك ءتىلىن بىلمەيتىن كەي شەنەۋنىكتەردى وسى ءۇش كاتەگوريانىڭ قايسىسىنا جاتقىزۋعا بولادى؟ جالپى بۇلارعا سەنۋگە بولا ما؟

نۇرزات توعجان

Abai.kz