قازاقستان رەسپۋبليكاسى پارلامەنتى سەناتى دەپۋتاتتارىنا

قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ توراعاسى ك.ك.ماسىموۆكە

قازاقستان رەسپۋبليكاسىنىڭ ادىلەت ءمينيسترى م.ب. بەكەتاەۆقا

قازاقستان رەسپۋبليكاسى پرەمەر-ءمينيستردىڭ ورىنباسارى ي.ن.تاسماعامبەتوۆكە

قازاقستان رەسپۋبليكاسى پرەزيدەنتى اكىمشىلىگى باسشىسى ءا.ر.جاقسىبەكوۆكە

قازاقستان رەسپۋبليكاسى باس پروكۋرورى ج.ق.اسانوۆقا

قازاقستان رەسپۋبليكاسىنىڭ مەملەكەتتiك حاتشىسى , قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ۇيلەستىرۋشىسى گ.ن. ابدىحالىقوۆاعا

قازاقستان رەسپۋبليكاسى قازاقستان حالقى اسسامبلەياسىنا 

قازاقستان رەسپۋبليكاسى «نۇر وتان» پارتياسى فراكتسياسىنىڭ مۇشەلەرىنە

قازاقستان كوممۋنيستىك حالىق پارتياسى  مۇشەلەرىنە

قازاقستان رەسپۋبليكاسى «اق جول» دەموكراتيالىق پارتياسىنا

قىزدارىمىزدىڭ، جالپى جاس ۇرپاقتىڭ تاربيەسى – حالىقتىڭ ەڭ قىمبات بايلىعى. «قىزدى تاربيەلەگەنىڭ – ءبىر ۇرپاقتى تاربيەلەگەنىڭ»، - دەگەن اتا-بابامىز قىزعا قىرىق ۇيدەن تىيىم سالىپ، كوزىنەن تاسا قالدىرماي، تاربيەسىنە ۇلكەن ءمان بەرگەن. ەندەشە ءبىز دە كەلەشەگىمىزدى، ۇلت تاعدىرىن ويلاساق، قىز بالانىڭ تاربيەسىن ۇلتتىق بولمىستىڭ بارلىق ىرگەتاسىمەن استاستىراتىن حالىقتىق قاعيدانى، وسيەتتى قالتقىسىز ۇستانۋىمىز قاجەت. قىزدارىمىزدى جاماندىقتان تىيىپ،  الدانىپ قالۋدان، زورلىق-زومبىلىقتان قورعاي ءبىلۋىمىز قاجەت.

وكىنىشكە قاراي، ءتۇرلى جارنامالىق اكتسيالار وتكىزەتىن ساۋدا ورىندارىندا قىزدارىمىزدى جالاڭاشتاپ ەل الدىنا شىعارعانىن كورەتىن بولدىق. بۇل - ءبىزدىڭ قوعامنىڭ قاسىرەتى.

ودان قالدى  كەشەگى الەۋمەتتىك جەلىدە جۇرتشىلىق نارازىلىعىن تۋدىرعان "Gimeney" نەكە اگەنتتىگىنىڭ اۋقاتتى قىتاي ازاماتتارىنا قازاق قىزدارىنان قالىڭدىق ىزدەيتىن - "قىتاي جوباسىن" ءبىزدىڭ ۇلتتىق سانامىزعا جات، زياندى ءارى قاستىق ارەكەتتەر دەپ بىلەمىز، ونى نامىسىمىزدى تاپتاۋ،  ۇلتىمىزدى قورلاۋ دەپ قابىلداپ وتىرمىز. 

 "Gimeney" نەكە اگەنتتىگى ەلدەگى كەيبىر زاڭداردا كەتكەن ولقىلىقتاردى پايدالانىپ، ادام ساۋداسى، ونىڭ ىشىندە قازاق قىزدارىن ساتۋمەن اينالىسىپ وتىر دەپ بىلەمىز.

ەندەشە، مۇنداي نارازىلىققا سەبەپ بولعان اگەنتتىكتىڭ اشىلۋى، ونىڭ قىزمەت ارەكەتىن رەتتەيتىن "ەرەجەسى", ماقساتى مەن ءمانى جانە زاڭدى تۇلعا رەتىندە مەملەكەتتىك تىركەلۋىنىڭ قانشالىقتى زاڭعا سايكەستىگى (ماسەلەن: "قر نەكە جانە وتباسى" تۋرالى زاڭى) تەكسەرىلۋى كەرەك. اگەنتتىك قىزمەتىنىڭ اۋماقتىق شەگى قر ىشىندە مە، وعان شەت مەملەكەتتەر اۋماعى كىرە مە وسى جاعى دا نازاردان تىس قالماعىنى ءجون. ونىڭ قىزمەتتىك اۋقىمى اگەتتىكتىڭ "جارعىسىندا" كورسەتىلەدى. سەبەبى، بۇل اگەنتتىك ءوزىنىڭ ءىس-ارەكەتىمەن شەت ەل ازاماتتارىن قازاق قىزدارىمەن نەكەلەستىرۋ ارقىلى ولاردى قازاقستاننىڭ ىشكى ىستەرىنە ارالاسۋعا مۇمكىنشىلىك جاساپ وتىر. ال مۇنىڭ تەرورريزمنىڭ ءورشىپ تۇرعان زامانىندا، مەملەكەتىمىزدىڭ ىشكى-سىرتقى قاۋىپسىزدىگىنە، ۇلتارالىق ماسەلەگە، قانشالىقتى ىقپالى بارى قۇزىرلى ورگاندار تاراپىنان زەرتتەپ، زەردەلەنگەن جوق. ىشكى تىنىشتىعىمىزدىڭ ساقتالۋى ءبىز ءۇشىن قىمبات.

اگەنتتىك ءوزىنىڭ قىزمەتىنە قازاقستان رەسپۋبليكاسىنىڭ كونستيتۋتسياسىن، قازاقستان رەسپۋبليكاسىنىڭ ازاماتتىق كودەكسىن، قازاقستان رەسپۋبليكاسىنىڭ «قوعامدىق بىرلەستىكتەر تۋرالى» زاڭىن، قر-نىڭ «كوممەرتسيالىق ەمەس ۇيىمدار» زاڭىن جانە قازاقستان رەسپۋبليكاسىنىڭ زاڭدىق اكتىلەرىن، سونداي-اق جارعىنى باسشىلىققا الىپ وتىر ما؟ مىنە وسىنىڭ ءبارى ايقىندالۋى كەرەك. زاڭنان تىس قىزمەتى انىقتالسا ارينە مۇنداي اگەنتتىكتەردىڭ ارەكەتىنە زاڭمەن تيىم سالىنۋى قاجەت.

سوندىقتان ءبىز مۇنداي اگەنتتىكتەردىڭ  جىمىسقى ءىس-ارەكەتتەرىنە ءۇزىلدى-كەسىلدى قارسىلىعىمىزدى بىلدىرەمىز! اشىقتان-اشىق حابارلاندىرۋ بەرىپ، تورىمىزدە  ويران سالىپ  جۇرگەن وسىنداي اگەنتتىكتەردى  قۇقىق قورعاۋ ورگاندارى  تەكسەرىپ، جۇمىسىن توقتاتۋىن تالاپ ەتەمىز. سونىمەن قاتار، بيلىك تاراپىنان ۇلتتىق نامىسىمىزدى قورلايتىن شارالارعا توقتاۋ قويىلماسا، وندا حالىقتىڭ ءوزى تويتارىس بەرۋگە دايىن تۇرعانىن مالىمدەيمىز.

ءبىز ەلدەگى نەكە تۋرالى زاڭعا، شۇعىل تۇردە، تومەندەگى ماتىندە وزگەرىستەر ەنگىزۋ قاجەت دەپ ەسەپتەيمىز: 
 

1) شەت ەلدىك ازاماتقا تۇرمىسقا شىققان قىزداردى قازاقستان ازاماتتىعىنان شىعارۋ; 

2) قازاقستان ازاماتىنا نەكەلەسكەن شەتەلدىك ازاماتتارعا قازاقستاننىڭ ازاماتتىعى بەرىلمەۋ كەرەك.

كەيبىر شەتەلدىكتەردىڭ قازاقستان ازاماتتارىنا نەكەلەسۋ  ارقىلى قازاق جەرىن جەكە مەنشىكتەۋ نيەتى بولۋى مۇمكىن .

قازاق قىزىنىڭ تازا دا تۇنىق بولمىسى - تەكتىلىگىمىزدىڭ ايناسى. ۇلت تاعدىرى قىزدارعا بايلانىستى.

«جەردى ەر قورعايدى، ۇلتتى قىز ساقتايدى» دەگەن اتالارىمىزدىڭ وسيەتىن ۇمىتپايىق.

سوندىقتان دا نەبىر  پايدا قۋعان نەكە اگەنتتىتىكتەرى مەن جارناماشىلداردىڭ  قىزدارىمىزدى قورلاۋىنا، ساۋدالاۋىنا  جول بەرمەۋىن تالاپ ەتۋگە ءماجبۇر بولعان بىزدەردىڭ، ياعني اتا-انالاردىڭ، بۇكىل حالىقتىڭ  اشىق حاتىن، تالاپ-تىلەگىن اياقسىز قالدىرماۋلارىڭىزدى سۇرايمىز.

قۇرمەتپەن، «نۇر وتان »پارتياسى ، «الاش جولى»حالىقتىق قوزعالىسى مۇشەسى قوعام بەلسەندىسى ا.ەگەۋباەۆ

قوعام بەلسەندىلەرى:

 د.ب.ورمانوۆ  

گ.ك.اجمۋراتوۆا

ك.م. ومار

ع.ءا.قاراباس

ن.م.سەيتجانوۆ

س.س.سەيداحمەتوۆا

ز.ساگيدولدينا

گ.س. سارسەنباەۆا

Abai.kz