جەكسەنبى, 20 ماۋسىم 2021
جاڭالىقتار 2303 0 پىكىر 11 قاڭتار, 2017 ساعات 16:02

ەكس-پرەمەرگە راقىمشىلىق جاسالۋى مۇمكىن

قازاقستاننىڭ بۇرىنعى پرەمەر-ءمينيسترى سەرىك احمەتوۆكە قاتىستى راقىمشىلىق بويىنشا جازاسىن وتەۋ مەرزىمىن قىسقارتۋ تۋرالى ءوتىنىش كەلىپ ءتۇستى، دەپ حابارلايدى «قازاقپارات» حاا ءتىلشىسى.
«سەرىك احمەتوۆ جازاسىن وتەپ جاتقان مەكەمەدەن «قر تاۋەلسىزدىگىنىڭ 25 جىلدىعىنا وراي راقىمشىلىق جاساۋ تۋرالى» قر زاڭىن قولدانىسقا ەنگىزىلگەن كۇنىنەن باستاپ ونىڭ جازاسىنىڭ وتەلمەگەن تورتتەن ءبىر بولىگىن قىسقارتۋ تۋرالى ۇسىنىم بەردى. باس بوستاندىعىنان ايىرۋ ورگاندارى احمەتوۆتىڭ ءوتىنىشى بويىنشا قولداۋحات جىبەرگەن. ءوتىنىش بۇگىن كەلىپ ءتۇستى. ءىس سوتقا جىبەرىلىپ، قاراۋ ۋاقىتى بەلگىلەنەدى»، - دەپ ءمالىم ەتتى قاراعاندى قالاسى، اباي اۋداندىق سوتىنىڭ باق-پەن بايلانىس جونىندەگى قىزمەتكەرى ارداق جۇماشەۆ.
ەستەرىڭىزگە سالا كەتەيىك، دەپ جازادى «قازاقپارات» حاا ءتىلشىسى، 2015 جىلى جەلتوقسان ايىندا قاراعاندى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى بۇرىنعى پرەمەر-مينيستر س. احمەتوۆ پەن باسقا دا لاۋازىمدى تۇلعالارعا قاتىستى ءىس بويىنشا ۇكىمى شىعارعان بولاتىن. اتالعان  ءىس بويىنشا 7 ءتۇرلى ەپيزودقا سايكەس بارلىعى 21 ادام ايىپتالعان ەدى. سوت تالقىلاۋى 2015 جىلعى 10 تامىزدا باستالىپ، ءتورت ايعا سوزىلدى. سوت تەرگەۋى مەن سوت جارىسسوزدەرى 2015 جىلعى 9 جەلتوقساندا اياقتالدى. قاراعاندى وبلىستىق سوتىنىڭ قىلمىستىق ىستەر بويىنشا اپەللياتسيالىق سوتى 2016 جىلدىڭ 14 ناۋرىزىندا جەمقورلىق  ىسكە قاتىستى سوتتى بولعان 11 ادامنىڭ جازاسىن جەڭىلدەتتى. سونىڭ ىشىندە سەرىك احمەتوۆتىڭ جازاسى 10 جىلدان 8 جىلعا دەيىن ازايتىلعان ەدى. ەكس-پرەمەرگە كەسىلگەن جازا تاۋەلسىزدىكتىڭ 25 جىلدىعىنا وراي تاعى دا قىسقارىپ، راقىمشىلىققا ءىلىنۋى مۇمكىن كورىنەدى.
اباي-اقپارات

 

0 پىكىر