ەندى تۇرعىلىقتى جەرىنەن تىسقارى جاققا ءبىر ايدان اساتىن مەرزىمگە بارعان ءار قازاقستاندىق مەملەكەتتىك باج سالىعى رەتىندە 227 تەڭگە تولەپ، ءارى حالىققا قىزمەت كورسەتۋ ورتالىعىنا بارىپ ۋاقىتشا مەكەنجايى بويىنشا تىركەۋگە تۇرۋى ءتيىس. بۇل تالاپ قوناقۇيدە تۇرىپ، وزگە قالادا جۇمىس ىستەيتىن ادامدارعا دا، وزگە قالاداعى اۋرۋحانادا جاتىپ ۇزاق ەمدەلەتىن ادامدارعا دا قاتىستى. العاشقىلارىن قوناقۇي ورنالاسقان مەكەنجاي، ال ەكىنشىلەرىن ەمدەلەتىن ورنى بويىنشا تىركەيدى. بۇل تالاپتى ورىنداماعاندارعا جەتى اەك (ايلىق ەسەپتىك كورسەتكىش) كولەمىندە، ياعني 16 مىڭ تەڭگە ايىپپۇل سالىنادى.

بيلىك ۋاقىتشا تىركەۋ ءتارتىبى ازاماتتاردىڭ ەركىن ءجۇرىپ-تۇرۋ قۇقىعىن شەكتەمەيتىنىن، ءارى حالىقارالىق تاجىريبەگە سايكەس ەنگىزىلگەنىن ايتادى. 

بىراق، استانا مەن الماتى سەكىلدى قالالاردا قاراپايىم حالىق كۇنكورىس قامىمەن سابىلىپ جۇرگەن جوق پا؟ ولاردى قايتپەكپىز؟ ولارعا ونداي تىركەۋدى كىم بەرەدى؟ قوناقۇيلەردى جاعالاي ما، جۇمىس ورنىنا تىركەلە مە؟ تىركەۋگە العىشتار تاعى دا اقشا تابۋدىڭ جولىن تاڭداپ، قاراپايىم حالىقتىڭ قالتاسىن قاعۋعا كىرىسىپ كەتپەي مە؟

مۇنداي تىركەۋدىڭ قيىندىعىن العاش بولىپ قازاق كورەدى. سەبەبى قازىر ۇلتىمىز ۇلى ۋربانيزاتسيانى باسىنان وتكەرىپ جاتىر. وسى ۋربانيزاتسيا قارقىن العان كەزدە ونى تىركەۋمەن شەكتەمەك بولعانداردىڭ ءىسى كۇلكىمىزدى كەلتىرەدى. 

ۋاقىتشا تىركەۋ ءتارتىبى تالابىن ورىنداۋعا كىرىسكەندە بيلىك ءسوزسىز قارسىلىققا تاپ بولادى. سەبەبى، شيكى زاڭ ەشكىمگە دە وپا بەرمەيدى.