ەو رەسەيدەن جەمقورلىققا قارسى اكتسيادا ۇستالعانداردى بوساتۋىن تالاپ ەتتى
ەۋروپالىق وداق رەسەي بيلىگىنەن سىبايلاسقان جەمقورلىققا قارسى 26 ناۋرىزداعى ميتينگتە ۇستالعانداردىڭ بارلىعىن تەز ارادا بوساتۋىن تالاپ ەتتى. ەو-نىڭ رەسەيدەگى وكىلدىلىگى تاراتقان مالىمدەمەدە رەسەيلىك پوليتسيا ءسوز بوستاندىعى مەن بەيبىت شەرۋگە كەدەرگى كەلتىردى دەلىنگەن.
ەۋروپالىق وداق رەسەي بيلىگىنەن حالىقارالىق مىندەتتەرىن بۇزباۋدى، ادام قۇقىقتارىن ساقتاپ، بەيبىت شەرۋگە شىققانداردى تەز ارادا بوساتۋىن تالاپ ەتتى. رەسەيدەگى نارازىلىق اكتسياسىنا جينالعانداردى جاپپاي ۇستاۋ ارەكەتىن اقش بيلىگى دە سىنعا الدى.
كرەمل ەو مەن اقش-تىڭ مالىمدەمەلەرىنە "قۇلاق اسۋدان" باس تارتتى. "ەۋروپالىق كەڭەستەگى مىندەتتەر ەلدىڭ ىشكى زاڭدارىن بۇزۋ كەرەك دەگەندى بىلدىرمەيدى", - دەپ مالىمدەدى رەسەي پرەزيدەنتىنىڭ ءباسپاسوز حاتشىسى دميتري پەسكوۆ. بۇل تۋرالى ريا "نوۆوستي" حابارلادى.
26 ناۋرىزدا وپپوزيتسيالىق ساياساتكەر الەكسەي ناۆالنىي ۇيىمداستىرعان نارازىلىق اكتسياسىنا رەسەيدىڭ ونداعان قالالارىنىڭ تۇرعىندارى قاتىستى. ولاردىڭ باسىم بولىگىنە قالا اكىمدىكتەرى رۇقسات بەرمەگەن. مىڭداعان ادام قاماۋعا الىنعانى حابارلاندى. ناۆالنىيدىڭ ءوزى جانە تاعى بىرنەشە بەلسەندى 15 تاۋلىككە قامالدى.
اباي-اقپارات
