ەستەرىڭىزگە سالا كەتەيىك، وتكەندە قىسقى وليمپياداعا قاتىساتىن 27 كاسبي سپورتشى قازاقستان ءداستۇرلى ەمەس جىنىستىق قارىم-قاتىناسقا تيىم سالعان جاعدايدا «بۇل ەلدىڭ ۇلكەن سپورت الامانىن وتكىزۋگە قاقىسى جوق» دەپ تالاپ قويعان بولاتىن (http://abai.kz/post/view?id=3557).  قايتكەندە الەمگە تانىلۋدى بارىنشا قالايتىن قازاقستان بيلىگى الگىندەي تالاپتان كەيىن كونستيتۋتسياعا قايتا قاراپ، ءداستۇرلى ەمەس سەكسۋالدى قارىم-قاتىناستاردى ناسيحاتتاۋدى شەكتەيتىن زاڭ جوباسىنىڭ كۇشىن جويدى.

«كونستيتۋتسيالىق كەڭەس 2015 جىلدىڭ 18 مامىرىندا №3 ءنورماتيۆتى قاۋلى قابىلدادى. وعان سايكەس، ەلىمىزدىڭ «بالالاردى دامۋى مەن دەنساۋلىعىنا زيان كەلتىرەتىن اقپاراتتان قورعاۋ» تۋرالى زاڭ جوباسى كونستيتۋتسيامەن ۇيلەسىمسىز دەپ تانىلدى»، – دەيدى كونستيتۋتسيالىق كەڭەستىڭ ءباسپاسوز قىزمەتى.

بۇل شەشىم 2022 جىلى وليمپيادا ويىندارىن الماتىدا وتكىزۋ ءۇشىن گوموفوبتى زاڭ جوباسىن جويۋ تۋرالى الەم سپورتشىلارىنىڭ قويعان تالاپتارىن قاناعاتتاندىرادى.

ءبىزدىڭ ەلگە الگىندەي تالاپ قويعان 27 كاسىبي سپورتشىنىڭ باسىندا تانىمال تەننيسشى  مارتينا ناۆراتيلوۆا (سۋرەتتە) بار.

سپورتشىلار حالىقارالىق وليمپيادالىق كوميتەتتىڭ پرەزيدەنتى توماس باحتان استانادا ء“داستۇرلى ەمەس سەكسۋالدى قارىم-قاتىناستاردى ناسيحاتتاۋعا تىيىم سالاتىن” زاڭ جوباسىن الىپ تاستاۋعا سەپتىگىن تيگىزۋدى سۇراعان بولاتىن. ولار زاڭ جوباسى ديسكريميناتسياعا جول بەرىپ، وليمپيادا ويىندارىن وتكىزۋدەگى تالاپتارعا قايشى كەلەدى دەپ ەسەپتەيدى.

وتكەن جىلدىڭ جەلتوقسانىندا حالىقارالىق وليمپيادالىق كوميتەت ءبىراۋىزدان انتيديسكريميناتسيانى قولداپ، وليمپيادالىق حارتياعا سەكسۋالدى تاڭداۋلارىنا قاراي سپورتشىلاردى ءبولىپ-جارۋعا بولمايدى دەگەن وزگەرىس ەنگىزگەن.

وسىلايشا الماتى 2022 قىسقى وليمپيادا ويىندارى ءوتۋى مۇمكىن قالالاردىڭ ىشىندە كوش باستاپ تۇر. قازىرگى ۋاقىتتا الماتىعا باسەكەلەس جالعىز قالا دەپ بەيجىڭ تانىلدى. الايدا 2008 جىلى بەيجىڭدە جازعى وليمپيادانىڭ وتكەنى ەسكەرسەك, الماتىنىڭ وليمپيادا قالاسى اتانۋعا مۇمكىندىگى جوعارى سياقتى.

2022 جىلى وليمپيادا وتەتىن قالانىڭ اتى 31 شىلدەدە كۋالا-لۋمپۋردە انىقتالادى.

Abai.kz