كەشە عانا ورتامىزدا جارقىلداپ جۇرگەن اقىن، اۋدارماشى، «اق قۇس» جانە فيزۋلي اتىنداعى سىيلىقتاردىڭ لاۋرەاتى، «قۇرمەت» وردەنىنىڭ يەگەرى ءابىلدا ايماق ەل-جۇرتىنىڭ ەسىندە ماڭگى ساقتالاتىن تۇلعا. ونى كوزى تىرىسىندە سەزگەندەي-اق، «مۇمكىن ەمەس، ءولۋىم ەسكەرۋسىز، وسكەننەن سوڭ ولەڭنىڭ سۇتىمەنەن» دەپ اق قاعازعا قالام تەربەپتى.

ءساۋىردىڭ 13-ءى كۇنى اقىننىڭ تۋعان كۇنىنە وراي، وڭتۇستىك قازاقستان وبلىستىق ا.س.پۋشكين اتىنداعى كىتاپحانا ۇجىمى ءابىلدا ايماقتى ەسكە الۋ كەشىن ۇيىمداستىردى.

كەشكە اقىننىڭ قالامداس دوستارى، شاكىرتتەرى، ستۋدەنتتەر مەن جالپى وقىرمان قاۋىم قاتىستى. ەسكە الۋ كەشىنىڭ قوناقتارى − م.بايعۇت، ق.بايدۋللا، ن.بەگالى، ز.قىستاۋبايۇلى، ا.كەندەباي، س.ساحابات، س.نۇرمانۇلى،  ب.الديار، اقىننىڭ جۇبايلارى وزيپا قۇرالوۆا مەن اقمارال قىپشاقباەۆا جەڭگەلەر قاتىسىپ، اقىننىڭ ءومىرى مەن شىعارماشىلىعى جايىندا، ازاماتتىعى تۋراسىندا جاستارعا اڭگىمەلەپ بەردى. كىتاپ كورمەسى جاساقتالىپ، دەرەكتى فيلم كورسەتىلدى. جاستار جالىندى جىرلارىن وقىدى.

− اقىن ءابىلدا اعامىزدىڭ جارقىن بەينەسى كوز الدىمىزدان كەتپەيدى. ول كىتاپحانامىزعا ءجيى-ءجيى باس سۇعىپ، اقىن-جازۋشىلاردىڭ ادەبي شىعارماشىلىق كەشتەرىن وتكىزۋگە ءوزى ۇيىتقى بولاتىن، ءارى باسى-قاسىندا جۇگىرىپ جۇرەتىن. قىمباتتى وقىرماندار، جاستار! اقىننىڭ ءومىرى مەن شىعارماشىلىعىن تانۋ ماقساتىندا كىتاپحانامىزعا كەلىپ تۇرىڭىزدار!− دەدى وبلىستىق ا.س.پۋشكين اتىنداعى كىتاپحانا ديرەكتورى ش.ءدىناسىلوۆا.

كەشتى قىزىقتاعان وقىرمان قاۋىم رۋحاني ءلاززات الا الدى. اقىندى ەسكە الۋ كەشى شىعارماشىل جاستاردان قۇرالعان شىمكەنت قالاسىنداعى «تەمىرقازىق» تۇنگى كىتاپحاناسىنىڭ كەزەكتى وتىرىسىنا جالعاستى.

گۇلداريا اشىرباەۆا،

وڭتۇستىك قازاقستان وبلىسى.

اباي-اقپارات