2013 جىلى «قازاقستان ارۋى» اتانعان ايداي يساەۆا (سۋرەتتە) كتك ارناسىنداعى ءبىر باعدارلاماعا قاتىسىپ، ورىس تىلىندە پىكىر بىلدىرەدى. تەگىندە، ستۋديادا، كامەرانىڭ الدىندا، كىم بولسا دا ابدىراپ قالادى ەمەس پە؟ ايداي قارىنداسىمىز دا سويتسە كەرەك. ايدايدىڭ ابىرجىپ، ورىس تىلىندە ويىن تولىق جەتكىزە الماعان سۇحباتىن الگى ارنادان ارمان يۋسۋپوۆ دەگەن بىرەۋ الادى دا، instagram.com جەلىسىنە سالىپ جىبەردى. سول سول-اق ەكەن، ايدايدىڭ جاڭىلىسقانىن ايداي الەمگە جەتكىزۋگە تىرىسقان توپ ونى اتالعان جەلىدە ءاجۋالاپ، كەلەكە، مازاق ەتە جونەلدى.   

قۇدايدىڭ قۇدىرەتى، مەن مۇنداي ءاجۋانى ءبىرىنشى رەت كورىپ وتىرمىن. ول بويجەتكەن ورىسشا سويلەۋگە مىندەتتى دە ەمەس، ەكىنشىدەن، كامەرانىڭ الدىندا ادامنىڭ قالاي قوبالجىپ، ويىنىڭ شاشىراپ كەتەتىنىن ءبارىمىز دە بىلەمىز. وكىنىشكە قاراي، سول بالانى جاقتاپ شىققان قازاقتىلدى باق پەن الەۋمەتتىك جەلى ازىرگە كوزىمىزگە تۇسپەي تۇر. انشەيىندە «قازاق» دەپ اتوي سالىپ، «ەلىم» دەپ ەڭىرەپ جۇرەتىن باتىرلاردىڭ ءبىرى دە جوق. ولارعا، ءسىرا، نە بولعان؟ تۇسىنبەدىم. 

مەن بۇل جەردە بىرەۋدىڭ «باسىن جارىپ، كوزىن شىعارۋ» ماسەلەسىن ايتىپ وتىرعان جوقپىن: پرينتسيپ دەگەن ماسەلە بار، بۇل پرينتسيپ ماسەلەسى. ءوز ەلىندە، ءوز جەرىندە تۋىپ، ءومىر ءسۇرىپ جاتقان جاندى وزگەنىڭ ءتىلىن بىلمەدىڭ دەپ ءاجۋالاۋ نە دەگەن سۇمدىق؟!. ورىسشا ءمۇلت كەتۋ، سويلەمەۋ، ءتىپتى، سويلەي الماۋ – بۇل كۇندە كۇلكى ەمەس. مىسالى، ءبىز قازاقشا سويلەپ جۇرگەن، سويلەي باستاعان وزگە ۇلت وكىلىنە كۇلمەيمىز عوي. كۇلۋ، مازاق ەتۋ – كۇنى بىتكەندەردىڭ تىرلىگى. باۋىرعا باسۋ، باۋراپ الۋ – تاڭى اتقان ەلدىڭ ەستىلىگى. جىرتىڭدايتىندار جىرتىڭداي بەرسىن. «يت شارشاسا، ۇرەدى، ادام شارشاسا، كۇلەدى» دەگەن – وسى.  

ارمان يۋسۋپوۆ، ايتەۋىر، ايدايدان ەفيرگە شىقپاعان سۇحباتىن الەۋمەتتىك جەلىگە سالىپ جىبەرگەنى ءۇشىن كەشىرىم سۇراعان بولىپ جاتىر. بىراق، مەنىڭ ويىمشا، ايداي يساەۆانىڭ «ار-ۇجدانى مەن ىسكەرلىك ابىرويىنا نۇسقان كەلتىرىپ»، ازاماتتىق كودەكستىڭ 143-بابىن بۇزعانى ءۇشىن كتك ارناسىنىڭ باسشىلىعى الدىمەن كەشىرىم سۇراۋى كەرەك.  

مەن ايداي يساەۆانى قولدايمىن، قازاقتىڭ ءبىر ازاماتى، اعاسى رەتىندە قارىنداسىمنىڭ ار-وجدانىن قورعايمىن!

ەرلان سايروۆ

Abai.kz