اقش استاناسى ۆاشينگتوندا كوكتەم مەرەكەسىنە وراي گالا-كەش ءوتتى. قالانىڭ ەڭ بايىرعى دا ادەمى زالدارىنىڭ بىرىندە بەسىنشى رەت وتكىزىلىپ وتىرعان وسى جارقىن دا اسەرلى شارا امەريكاندىق ەليتانىڭ زايىرلى قابىلداۋلارىنىڭ استانالىق كۇنتىزبەسىندە نىق ورنىن تاپقان.  

وسىنداي ماقسات ءۇشىن امەريكاندىق دەمەۋشىلەر مەن قازاقستان ەلشىلىگى باستاماسىمەن قۇرىلعان كوممەرتسيالىق ەمەس جانە قايىرىمدىلىق ۇيىمى - «ناۋرىز» كوميسسياسى وتكىزگەن گالا-كەشكە  اق ءۇيدىڭ، مەملەكەتتىك دەپارتامەنتتىڭ، كونگرەستىڭ، ديپلوماتيالىق كورپۋستىڭ، ىسكەري جانە قوعامدىق ورتالاردىڭ بەس جۇزدەن استام وكىلى جينالدى،- دەپ حابارلايدى قر ءسىم ءباسپاسوز قىزمەتىنەن. 

كەش باعدارلاماسىندا جىبەك جولى ايماعىنان كەلگەن مۋزىكانتتاردىڭ ءداستۇرلى كونتسەرتى مەن ەۋرازيا جانە تاياۋ شىعىس ەلدەرىنىڭ قولداۋىمەن ازىرلەنگەن كوركەم ەتنيكالىق بۇرىشتار قوناقتار نازارىنا ۇسىنىلدى. وندا وسى ەجەلگى مەيرامدى مەرەكەلەيتىن ەلدەردىڭ مادەنيەتى مەن داستۇرلەرى  كورىنىس بەرەدى. "قازاقستان" بۇرىشىندا باۋىرساق پەن ءداستۇرلى تاتتىلەردەن ءدام تاتىپ، ەل تۋرالى كىتاپتار مەن ماتەريالدارمەن تانىسۋعا، سونداي-اق قر-نىڭ زاماناۋي دامۋ جولى تۋرالى بەينەماتەريالدى تاماشالاۋعا مۇمكىندىك بولدى.
سونىمەن قاتار شارا بارىسىندا «ناۋرىز» كوميسسياسىنىڭ توراعاسى ن.كازەمينيگە سالتاناتتى تۇردە تۇركىسوي باس حاتشىسى دۇيسەن قاسەيىنوۆتىڭ سىيى تابىس ەتىلدى. تۇركىسوي دا امەريكا مەن ەۋروپادا ناۋرىز مەيرامىن دارىپتەۋمەن بەلسەندى اينالىسىپ جۇرگەن ۇيىم ەكەندىگى ەرەكشە اتالىپ ءوتتى. شاراعا قاتىسۋشىلار قازاقستاندا، اۋعانستاندا، ازەربايجاندا، گرۋزيادا، يراكتا، قىرعىزستاندا، رەسەيدە، تاجىكستاندا، تۇركيادا، تۇرىكمەنستاندا، ۋكراينادا ناۋرىزدىڭ قالاي مەرەكەلەنەتىندىگى تۋرالى بەينەماتەريالدى تاماشالاپ، بۇل مەيرامدى بىرلەسە اتاپ ءوتۋدىڭ امەريكادا دارىپتەۋگە سەپتىگىن تيگىزىپ قانا قويماي، ەۋرازيا مەن تاياۋ شىعىس حالىقتارىنىڭ ءوزارا دوستىعىن نىعايتۋعا دا وڭ اسەر تيگىزەتىنىن تىلگە تيەك ەتتى.

اباي-اقپارات.